Zum Titel springen

Spezialist / Spezialista per il mantegniment dal manaschi AFQ

Lavurs

Spezialists e spezialistas per il mantegniment dal manaschi tgiran e nettegian edifizis e lur conturns. Els surveglian la tecnica da chasa, fan reparaturas, , mantegnan maschinas e dismettan rument e surpiglian pensums da l'administraziun. Ultra da quai tgiran e mantegnan els spazis verds ed indrizs da sport e s’occupan da las vias da traffic ed d’ulteriura infrastructura. Lur lavurs concretas sa distinguan tut tenor direcziun spezialisada.

Els exequeschan suandantas lavurs:

Direcziun servetsch da chasa
  • nettegiar e mantegnair differents geners d’edifizis
  • nettegiar per exempel fanestras e palantschieus da sulers, pastrigns, e tualettas
  • tractar palantschieus e palantschieus sura cun meds spezials
  • controllar  e mantegnair indrizs da la tecnica da chasa, sco per exempel indizis solars e sanitars, indrizs da stgaudament, da ventilaziun e da climatisaziun sco er indrizs da serradiras ed apparats electrics
  • far pitschnas reparaturas vid ils cumplex e las appreturas ed eliminar disturbis
Direcziun servetsch tecnic
  • mantegnair infrastructuras sco sendas e vias, eliminar per exempel donns vid signalisaziuns da vias e u vid vials
  • reparar donns vid las cuvridas da vias e sendas
  • tgirar auas sco er parcs e spazis verds
  • far ora naiv l’enviern, per che las sendas ed ils access als edifizis sajan transibels u charrabels
Direcziun indrizs da sport
  • tgirar las cuvridas da sport, per exempel surfatgas da pastget u cirquits per l’atletica leva
  • survegliar la qualitad da l’aua en ils bogns
  • tscherner tschertas mesiras sche la qualitad na correspunda betg a las pretensiuns
  • sustegnair persunas che surveglian il manaschi da bogn, per exempel il guardiabogn
  • elavurar las surfatschas da bogn per tscherts basegns, per exempel per hockey sin glatsch u curling
  • mantegnair las surfatschas da glatsch, las demontar puspè e resguardar latiers las prescripziuns per la protecziun da l’ambient
Tut las direcziuns
  • consultar persunas spezialisadas per schliar tscherts problems u disturbis
  • dismetter u reciclar il rument a moda adattada a l'ambient
  • planisar il decurs da la lavur ed avair endament da quel el team
  • lavurar cun differents vehichels pitschen, guaffens ed apparats, als nettegiar e mantegnair
  • examinar las reservas da material en il deposit e far empustaziuns tenor basegn

Scolaziun

Durada

3 onns

Accents

  • servetsch da chasa
  • servetsch tecnic
  • indrizs da sport

Furmaziun en la pratica

En in manaschi grond, en in’instituziun pli gronda (scola, chasa da tgira, chasa d’uffants, ospital, indrizs da sport, manaschi da bogn etc.), ina vischnanca, in uffizi da construcziun bassa in purschider da lavurs per il mantegniment dal manaschi.

Furmaziun en scola

1 di per emna a la scola professiunala

Furmaziun da scola a temp cumplain

  • Albisbrunn/ZH

Roms professiunals

  • organisaziun da las lavurs da mantegniment
  • finir giu lavurs da mantegniment
  • lavurar ensemen cun collavuraturs e clientella
  • nettegiar, tgirar e mantegnair indrizs or en il liber, installaziuns ed edifizis

Curs ordaifer il manaschi

Emprender ed exercitar a moda pratica la basa professiunala. 25-29 dis durant 3 onns

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Spezialist / Spezialista per il mantegniment dal manaschi AFQ

Premissas

Furmaziun preliminara
  • temp da scola obligatoric terminà
Pretensiuns
  • inschign manual
  • enclegientscha pratica e tecnica
  • fidadadad
  • forza fisica
  • abilitad da s’organisar

Furmaziun supplementara

Curs

purschidas da scolas spezialisadas e professiunalas sco era da l’Associaziun professiunala mantegniment da manaschi (SFB)

Examen professiunal (EP)

direcziun servetsch da chasa:
  • pedel cun certificat professiunal federal
  • spezialista da mantegniment cun certificat professiunal federal
direcziun servetsch tecnic:
  • polier per il mantegniment da vias cun certificat professiunal federal

Examen professiunal superiur (EPS)

Direcziun servetsch da chasa:

- pedella dipl.
- manader en facility management e mantegniment dipl.

Scola spezialisada superiura (SSS)

curs da furmaziun en champs spezials parentads, dependent da la direcziun spezialisada.
Direcziun tecnic: tecnicist SSS en surveglianza da construcziun

Scola auta spezialisada (SAS)

studis en champs spezials parentads, p.ex. Bachelor of Science (SAS) en inschigneria da construcziun (direcziun servetsch tecnic cun EFZ) u Bachelor of Science (SAS) en facility management. Tut tenor scola auta spezialisada valan differentas cundiziuns d'admissiun.

Cundiziuns da lavur

Spezialists e spezialistas da mantegniment èn responsabels per tscherts edifizis e lur stabiliments en il liber. Els lavuran per regla en teams pitschens. Cunquai ch’els manischeschan maschinas e traffitgan magari cun substanzas toxicas, portan els equipament da protecziun, chalzers da segirezza e mascrinas per tschertas lavurs.

Els lavuran da tuttas stagiuns e da tut aura or en il liber e lur temp da lavur po esser irregulars. La glieud da professiun chatta lavur en administraziuns da vischnanca, lavuratoris communals, ospitals, scolas, indrizs da sport, centers da tgira, chasas, baselgias, administraziuns d’immobiglias, firmas da nettegias u manaschis gronds. Cun in pau experientscha pon els organisar e controllar las lavurs da lur collavuraturs subordinads.

Ulteriuras infurmaziuns

SFB - Schweizerischer Fachverband Betriebsunterhalt
3076 Worb
URL: www.betriebsunterhalt.ch



berufsberatung.ch