Lavurs
Miraduras e miradurs lavuran sin plazzals da construcziun auta e bassa. En la construcziun auta vegnan construids surtut edifizis: chasas, centers da cumpras, cumplexs da scola u edifizis d’industria. Tar la construcziun bassa tutgan construcziuns da tunnels, punts sistems da chanalisaziun u construcziuns d’infrastructura sco sereneras e la rait da vias u da viafier.
La lavur da miradur cuntegna tant lavurs tradiziunalas sco era novas metodas da construcziun. Tar la construcziun d’in mir da quadrels dovran miradurs utensils da mastergnants: Cun la palutta mettan els maulta sin il quadrel, tschentan quel en il mir e fan davent la maulta ch’è danvanz. Cun corda da mesirar e livel controlleschan els, sch’il mir è guliv. Tar la construcziun da mirs betg liads dovran els empè da quadrels u crappa da chaltschina mintgatant era crappa natirala.
La construcziun da paraids e palantschieus da betun pretenda l’utilisaziun da maschinas ed utensils moderns. Or da tavlas da lain construeschan miradurs ina entulada che serva sco furma per il betun. Silsuenter mettan els en armadiras, quai vul dir bastuns u raits d’atschal, che dattan al betun la stabilitad necessaria. A la fin emplainan els giu il betun frestg cun agid d’ina maschina ed al cumpriman cun ina guglia vibranta. Uschia elimineschan els eventualas vaschiettas d’aria en il betun.
Miradurs dattan era si liadiras, construeschan surtratgas da cement, bajegian en parts finidas sco stgalas u tschabargals da balcuns, monteschan palancas, tschentan bischens da chanalisaziun ed èn occupads cun lavurs da terra sco stgavaments da chanals e foss.
Sin construcziuns novas lavuran miradurs en il liber, tar renovaziuns savens era en l’intern da l’edifizi. Per part ston els far lavurs en grondas autezzas, perquai na dastgan els betg avair tema da l’autezza e ston pudair sa mover cun pass ferm e segir. Lur lavur pretenda forza, ma era il chau è dumandà, per exempel cun leger plans da construcziun, tar la preparaziun da la lavur u tar la procuraziun da material.
En il mintgadi da lavur resguardan miradurs normas e reglaments che han da far cun la construcziun. En spezial ston els respectar prescripziuns da segirtad, da protecziun da la sanadad e da l’ambient.
Scolaziun
Basa legala
Ordinaziun federala 14-9-2010 (stan 1-9-2014)
Durada
3 onns
Furmaziun en la pratica
En ina interpresa da construcziun
Furmaziun en scola
1 di per emna a la scola professiunala
Roms professiunals
- interpresa e conturn
- basa da realisaziun
- prefasa da la realisaziun
- realisaziun
- surveglianza da l’incumbensa
Curs ordaifer il manaschi
Tar las tematicas interpresa, basa da realisaziun, prefasa da la realisaziun, realisaziun (lavurs da miradur, lavurs spezialisadas, construcziun da betun preparà al lieu) e surveglianza da l’incumbensa
Maturitad professiunala
Tar fitg bunas prestaziuns da scola po vegnir frequentà la scola da maturitad professiunala durant la furmaziun da basa.
Diplom
Attestat federal da qualificaziun "miradur / miradura AFQ"
Premissas
Furmaziun preliminara
- scola populara terminada
- bunas prestaziuns en matematica
Pretensiuns
- inschign manual
- enclegientscha pratica
- imaginaziun dal spazi
- sanadad robusta
- movibilitad corporala e forza
- avair nagina tema d’autezza
- abilitad da lavurar en ina gruppa
Furmaziun supplementara
Curs
purschidas da scolas spezialisadas e professiunalas sco era da la Societad Svizra dals Impressaris-Constructurs
Furmaziun da basa scursanida
p. ex. sco dissegnader / dissegnadra AFQ
Examen professiunal (EP)
cun certificat professiunal federal: polier / poliera, controllader / controlladra da material da construcziun (betun e maulta), spezialist / spezialista da protecziun d’edifizis, polier / poliera al tagl d’edifizi, artisan / artisana en la tgira da monuments ed auters
Examen professiunal superiur (EPS)
maister constructur / maistra constructura, manader da construcziun diplomà / manadra da construcziun diplomada en construcziun auta u en construcziun bassa
Scola spezialisada superiura (SSS)
tecnicist diplomà / tecnicista diplomada SSS en surveglianza da construcziun
Scola auta spezialisada (SAS)
percurs da studi da bachelor en il champ spezial fatgs da construcziun, p. ex. Bachelor of Science (SAS) en la domena d’inschigner / inschignera da construcziun
Cundiziuns da lavur
Miradurs lavuran en interpresas da construcziun. I dat manaschis d’ina persuna fin manaschis gronds cun dapli che 100 collavuraturs.
Las cundiziuns d’engaschament èn regladas tras il contract collectiv naziunal da lavur per l’industria principala da construcziun svizra e tras contracts collectivs da lavur regiunals.
Las schanzas sin il martgà da lavur èn per miradurs qualifitgads fitg bunas.
Ulteriuras infurmaziuns
Societad Svizra dals Impressaris-Constructurs SSIC
Furmaziun da basa
Weinbergstr. 49
Postfach
8042 Zürich
Tel: 044 258 83 38
URL: www.bauberufe.ch