Lavurs
La lavur en la vigna cumenza per viticulturs il favrer u il mars cun tagliar las vits. Uschia procuran els che las vits creschian optimalmain. Suenter ils emprims dis chauds lian els las vits. Els dattan aua e ladan las culturas.
Ultra da las vits dovra er il terren ina tgira intensiva. Las bleras vignas vegnan inverdidas u cuvridas cun material organic sco scorsa e strom. Uschia vegn evità ch’il terren vegn lavà davent tras la plievgia ed a medem temp vegn la fritgaivladad dal terren meglierada.
Viticulturas stgaffeschan in bun conturn per animals utils e cumbattan parasits uschè effizient sco pussaivel e favuraivel a l’ambient. Cunzunt la glieud da professiun cun accent agricultura biologica è spezialisada sin ina cultivaziun persistenta en accord cun la natira.
Durant la stad laschan sulegl ed umiditad crescher fitg svelt las vits. Viticulturs allontaneschan chatschs e feglia ch’èn da memia. Plinavant controlleschan els las plantas sin bulieus e parasits.
Spezialmain intensiva è la vendemia durant il settember enfin il november. Il meglier temp da racolta dura tut tenor regiun ed aura per part mo paucs dis e sto vegnir determinà exactamain dals spezialists. Els racoltan las ivas communablamain cun gidanters e gidantras la plipart a maun. Spezialmain suenter periodas da plievgia ston las ivas marschas vegnir assortidas conscienziusamain.
Per bleras viticulturas munta la producziun dad agens vins e sucs la finiziun da las lavurs annualas. Las ivas vegnan smatgadas e strucladas. Per la fermentaziun emplainan ellas il suc en tancs e surveglian la temperatura e la durada da la procedura. Er tar la conservaziun ston vegnir resguardadas per mintga vin cundiziuns optimalas. Quai garantescha la qualitad da las victualias.
Tar la commerzialisaziun dals products ston viticulturs savair tge vins ch’èn tschertgads. Els s’infurmeschan davart trends en la societad e tecnicas actualas en connex cun la producziun da vin.
Viticulturas dovran maschinas agriculas e dirigian tscherts process al computer. Bleras lavurs vegnan dentant anc adina fatgas a maun. En lur mintgadi da lavur resguardan ellas tut las prescripziuns da protecziun da la segirezza, da l’ambient e da la sanadad.
Scolaziun
Basa legala
Ordinaziun federala dals 8-5-2008 (versiun dal 1-3-2017)
Durada
3 onns
Furmaziun en la pratica
En almain dus manaschis d’emprendissadi
Furmaziun en scola
Curs da bloc da pliras emnas al Strickhof, Au ZH
Roms professiunals
- cultivaziun da plantas (cultivar terren; plantar, nutrir e tgirar culturas da vits; racoltar e nobilisar ivas; vender products)
- mecanisaziun ed implants tecnics (drizzar e mantegnair maschinas ed apparats; nizzegiar e mantegnair edifizis ed indrizs)
- conturn da lavur
- champ da tscherna
La furmaziun da basa po er vegnir absolvida cun l’accent agricultura biologica.
Curs ordaifer il manaschi
segirezza da la lavur e protecziun da la sanadad, igiena e garanzia da la qualitad, diever da vehichels idraulics e d’apparats per la protecziun da las plantas, tecnologia da vins
Maturitad professiunala
Cunquai che la furmaziun en scola ha lieu en curs da bloc vegn la scola da maturitad professiunala visitada la plipart suenter la furmaziun da basa.
Diplom
Attestat federal da qualificaziun "viticultur / viticultura AFQ"
Premissas
Furmaziun preliminara
- scola obligatorica terminada cun pretensiuns mesaunas u autas
- cun in attestat federal da qualificaziun (AFQ) dad in’autra professiun agricula po la scolaziun sco viticultur / viticultura sa scursanir sin 1 onn
- cun in attest professiunal agricul (AFP), cun in attestat federal da qualificaziun (AFQ) dad in’autra professiun u cun ina maturitad sa scursanescha la scolaziun sco viticultur / viticultura per regla sin 2 onns
Pretensiuns
- plaschair vi da la lavur en il liber
- bun dun d’observaziun per process en la natira
- inschign manual
- chapientscha tecnica per maschinas ed apparats
- sanadad robusta per lavurs da tutt’aura
- forza corporala
- bun gust e bun nas (per degustar)
Furmaziun supplementara
Curs
purschidas dal Strickhof, Au ZH, dal Institut für Umwelt und Natürliche Ressourcen IUNR (ZHAW), Wädenswil e da l’École d'Ingénieurs de Changins (HES-SO)
Furmaziun supplementara
suenter la furmaziun da basa po vegnir absolvida ina furmaziun da basa scursanida dad 1 onn en in’autra professiun agricula
Examen professiunal (EP)
manader / manadra da gestiun viticultura u tecnologia da vin cun certificat professiunal federal u in auter examen professiunal en il champ professiunal
Examen professiunal superiur (EPS)
maister viticultur / maistra viticultura, maister tschalerer / maistra tschalerera u in auter examen professiunal superiur en il champ professiunal agricultura
Scola spezialisada superiura (SSS)
agro-tecnicist / agro-tecnicista dipl. SSS, agro-commerziant / agro-commerzianta dipl. SSS, tecnicist viticultur / tecnicista viticultura dipl. SSS
Scola auta spezialisada (SAS)
Bachelor of Science (SAS) en enologia, Bachelor of Science (SAS) en agronomia (p. ex. approfundaziun scienzas da plantas), Bachelor of Science (SAS) en inschigneria da l’ambient (p. ex. agricultura biologica ed orticultura)
Cundiziuns da lavur
Viticulturas e viticulturs lavuran tar in manaschi da viticultura privat u cooperativ u mainan in agen manaschi. Blers viticulturs lavuran er a l’exteriur. Els lavuran bler en il liber. Lur dis da lavur dependan da l’aura e da la stagiun e pon esser durant la stad e l’atun fitg lungs. Durant il temp da fulla vegn er lavurà la fin d’emna.
Tar las plazzas d’emprendissadi è la purschida per il mument pulit equilibrada, ins sto dentant esser pront da tschertgar en differentas regiuns.
Ulteriuras infurmaziuns
OdA AgriAliForm
Laurstr. 10
5201 Brugg AG
Tel: +41 56 462 54 40
URL: www.agri-job.ch
Branchenverband Deutschschweizer Wein
Schloss 1
8820 Wädenswil
Tel: +41 58 460 61 01
URL: swisswine.ch
Strickhof
Lebensmitteltechnologie und Hortikultur
Seestrasse 295
8804 Au ZH
Tel: +41 58 105 94 00
URL: www.strickhof.ch
Revistas professiunalas:
"Schweiz. Zeitschrift für Obst- und Weinbau"