Lavurs
Lur lavurs èn las suandantas:
Cultivaziun da plantas
- analisar il terren e determinar, co ch'el vegn utilisà, per exempel cun alternar tranter cultivaziun dad ers, da pavel e pastgiras, per che la fritgaivladad restia mantegnida
- mantegnair e promover la biodiversitad, en spezial tras surfatschas da cumpensaziun ecologica sco prads, chaglias u flurs
- semnar e cultivar differentas culturas sco graun, tartuffels u ravun sco er las proteger cunter malsognas e parasits
- duvrar differentas metodas da producziun: producziun integrada u biologica ubain producziun a cundiziuns ecologicas
- far in plan da fertilisaziun ed applitgar ils ladims en moda ecologica
- racoltar; tegnair en salv, commerzialisar, furnir a commerziants a l'engrossa ils products u fixar lur pretsch per la vendita directa
Tegnida d’animals
- tegnair e trair si animals da niz, per exempel vatgas da latg, arments, giaglinom u portgs
- cultivar la prada verda per producir pavel; calcular e distribuir las raziuns da pavel als animals; administrar las provisiuns
- observar il cumportament da la muntanera, procurar per ses bainstar e resguardar las prescripziuns davart la protecziun dals animals, per exempel tras la pasculaziun, in pavel equilibrà e tras mulscher cun quità
- selecziunar ils animals adattads per il paregliament, per meglierar la tratga
- survegliar la sanadad dals animals e prevegnir ad epidemias tras vaccinaziuns ed autras mesiras; proteger ils animals cun saivs u cun chauns
-
depositar e pachetar products sco latg, jogurt, chaschiel, charn u ovs per la vendita u per als elavurar vinavant; als furnir a commerziants a l'engrossa
Duvrar e mantegnair apparats ed edifizis
- duvrar vehichels agriculs, maschinas ed utensils resguardond las prescripziuns da segirezza
- mantegnair tractors, apparats ed indrizs sco giagliners, serras u silos
- mantegnair e renovar edifizis; cooperar a projects da construcziun u da modernisaziun
Gestiun
- far in plan da producziun e manar la contabilitad
- registrar datas davart il manaschi, sco per exempel dumber d'animals, e transmetter quellas als uffizis respectivs
Scolaziun
Durada
3 onns
Furmaziun pratica
Sin in bain puril
Furmaziun en scola
- 1. + 2. onn: 1 di per emna en la scola professiunala spezialisada
- 3. onn: curs da bloc en la scola professiunala spezialisada
Roms professiunals
- cultivar la cultira
- mantegnair e duvrar l'infrastructura tecnica
- organisar e communitgar entaifer il manaschi
- emplantar culturas da verdura
- cultivar culturas da verdura
- racoltar e commerzialisar verdura
Curs ordaifer il manaschi
Emprender, approfundar ed exercitar las basas professiunalas.
- sectur professiunal tegnida d'arments: 11 dis durant 3 onns
- auters secturs professiunals: 12 dis durant 3 onns
Maturitad professiunala
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Pur / Pura AFQ
Premissas
Furmaziun preliminara
- terminà la scola obligatorica
- intgins manaschis pretendan in examen d'admissiun
Premissas
- moda da lavurar independenta
- abilitad da supportar squitsch corporal
- prontezza da lavurar durant uras irregularas
- ritga fantasia e savair sa gidar
- inschign manual
- atgna iniziativa
- bun dun d'observar
- abilitad da supportar spizzas
Furmaziun supplementara
Curs
Purschidas da centers da furmaziun e da cussegliaziun agricula.
Scolaziun supplementara
Puras e purs AFQ pon per regla far in emprendissadi scursanì en in'autra professiun agricula.
Examen professiunal (EP)
Cun attest federal da qualificaziun, per exempel:
- Mainagestiun Agricultura
- Mainagestiun Cultivaziun da verdura
- Mainagestiun Pumicultura
- Mainagestiun Giaglinom
- Spezialist / Spezialista d'agricultura biodinamica
Examen professiunal superiur (EPS)
Cun diplom federal, per exempel:
- Maister pur / Maistra pura
- Maister / Maistra d'economia da giaglinom
- Maister ortulan / Maistra ortulana da verdura
- Maister / Maistra da pumicultura
Scola spezialisada superiura (SSS)
Studis en secturs spezialisads parentads, per exempel Agrotecnicist / Agrotecnicista dipl. SSS u Agrocommerziant / Agrocommerzianta dipl. SSS.
Scola auta spezialisada (SAS)
Studis en secturs parentads, per exempel bachelor of science en agronomia, inschigneria da l'ambient u tecnologia da victualias. Tut tenor la scola auta spezialisada valan differentas cundiziuns d'admissiun.
Cundiziuns da lavur
Puras e purs lavuran sin lur agen bain u han prendì a tschains quel. La planticultura dependa da l'aura, ina gronda part da la lavur vegn fatga cun il sustegn da maschinas. Ils animals ston vegnir tgirads mintga di ed ils temps da lavur èn lungs. En las muntognas èn las cundiziuns da lavur pli difficilas pervia da las spundas taissas e dal clima criv. Las puras ed ils purs collavuran tranter auter cun veterinarias, cun commerziants a l'engrossa e cun furnituras.
Ellas ed els lavuran per il pli independentamain en in manaschi da famiglia ch'è sa spezialisà en ina u en pliras branschas da producziun. I dat paucas plazzas da lavur; talas chattan ins cunzunt en manaschis gronds. La diminuziun dals pretschs dals products ha per consequenza, ch'i dat adina main manaschis. In pèr puras e purs cumpletteschan lur entradas tras in'activitad da gudogn accessoric sco la vendita directa da products da lur bain, l'agroturissem u ina lavur pajada d'ordaifer il sectur agricul. Plazzas datti er en interpresas che han ina relaziun cun l'agricultura sco tar furniturs da semenza, producents da meds per proteger las plantas u tar associaziuns agriculas. Savens sa decidan puras giuvnas e purs giuvens per ina segunda scolaziun, per exempel en il sectur da la mecanica, dals fatgs da construcziun u da la selvicultura, quai per augmentar lur entradas.
Ulteriuras infurmaziuns
OdML
AgriAliForm
5201 Brugg AG
URL: www.agri-job.ch