Lavurs
Bostgers e bostgeras cultiveschan e mantegnan il guaud. Las lavurs sa drizzan tenor la stagiun. Durant l’enviern consista la lavur principala en la racolta da laina. La stad èsi impurtant da tgirar e mantegnair las vias ed ils rempars. Bostgers lavuran en manaschis communals u chantunals da l’industria forestala.
Ina da las lavurs centralas dals bostgers è la racolta da laina. Els preparan las lavurs cun premura, uschia che la segirtad è garantida. Avant pinar las plantas vegnan ellas valitadas tenor sort, grondezza e center da gravitad. Bostgers erueschan la direcziun da crudada e serran il proxim conturn. Tar cundiziuns difficilas vegnan las plantas segiradas cun sugas. Per tagliar laina vegn duvrà resgias a motor e per part l’agid d’in turn da suga. Silsuenter vegn la roma allontanada ed il bist vegn taglià tenor qualitad ed elavuraziun ulteriura. La laina vegn transportada cun camiun-tractors u cun cranas a cabel al deposit. La lavur prestada vegn nudada en in rapport.
La primavaira e la stad èn bostgers responsabels per la tgira dal guaud giuven, la construcziun da rempars da lavinas, la segirada da spundas ed auals sco era per il mantegniment da vias. Els enconuschan ils donns che vegnan chaschunads da plantas, animals, bulieus ed umans ed emprovan d’als prevegnir. Sch’i fa da basegn, protegian els las plantas giuvnas da las morsas da chavriels e tschiervs cun cundrezs spezials u cun agid d’ina saiv enturn il guaud giuven. Nua che plantas dal guaud na chatschan betg da sez, plantan els quellas tenor in plan da cultura. Ultra da quai èn bostgers responsabels per il mantegniment ed il funcziunament dals guaffens e dals apparats. Els gizzan las chadainas da las resgias a motor regularmain e mantegnan las maschinas.
La ristga d’accident durant lavurs forestalas è gronda. Perquai ston bostgers lavurar attentamain cun respectar a moda stricta las prescripziuns da segirtad, da protecziun da la sanadad e da l’ambient. La professiun pretenda ina buna furma corporala, perseveranza e concentraziun. Grazia a la lavur da bostger resta il guaud en ses equiliber ecologic. El po vegnir utilisà sco spazi da viver e da protecziun ed era sco lieu da recreaziun. Plinavant ha il guaud era in factur economic.
Scolaziun
Basa legala
Ordinaziun federala 12-06-2019
Durada
3 onns
Furmaziun en la pratica
En ina interpresa forestala publica u privata u en in manaschi forestal
Furmaziun en scola
1 di per emna a la scola professiunala
Roms professiunals
Racoltar e mesirar laina, enconuscher la laina, enconuschientschas selviculturalas da basa, enconuschientschas territorialas, selvicultura, ecologia, protecziun dals guauds, animals dal guaud, selvaschina ed animals selvadis, fatgs da construcziun, uman e lavur, pensum e muntada dal guaud, dretg forestal, planisaziun forestala, organisaziun da l’interpresa e dretg da lavur
Curs ordaifer il manaschi
Racoltar laina, selvicultura ed ecologia, fatgs da construcziuns selviculturalas, agid d’urgenza per il persunal forestal
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "bostger / bostgera AFQ"
Premissas
Furmaziun preliminara
- Pretensiuns minimalas: scola populara terminada cun pretensiuns mesaunas u autas
- fufragnadi vegn recumandà
Pretensiuns
- plaschair da lavurar en il liber
- bun dun d‘observar la natira
- senn da responsabladad e buna abilitad da giuditgar (ristga d’accidents)
- autonomia
- buna sanadad corporala per la lavur stentusa da tutt’aura
- forza corporala
- enclegientscha tecnica per la lavur cun maschinas ed apparats
supplementarmain
- examinaziun corporala tras in medi
Furmaziun supplementara
Curs
purschidas da centers da furmaziun per selvicultura ed agricultura, da WaldSchweiz, d’organisaziuns per la protecziun da l’ambient, da scolas spezialisadas e da scolas spezialisadas superiuras; ina survista dals curs porscha Codoc
Furmaziun da basa scursanida
pumicultur / pumicultura AFQ
Examen professiunal (EP)
cun AFQ: capobostger / capobostgera, manischunz / manischunza da maschinas forestalas, manader / manadra da la crana a cabel, spezialist / spezialista per la tgira da plantas, spezialist / spezialista da laina, spezialist / spezialista per natira ed ambient
Scola spezialisada superiura (SSS)
selvicultur / selvicultura SSS
Scola auta spezialisada (SAS)
Bachelor of Science (SAS) en economia forestala
Cundiziuns da lavur
Bostgers lavuran per manaschis forestals communals e chantunals u era manaschis privats. Bostgers èn era tschertgads en l’industria da laina, orticultura e cuntrada, sin il sectur ambiental u en lavuratoris communals. Bostgers lavuran per gronda part en il guaud ed èn suttaposts a tut las influenzas da l’aura. La lavur stentusa pretenda in corp saun. Las plazzas d’emprendissadi per bostgers èn fitg tschertgadas e praticums da tscherna da professiun èn fitg impurtants.
Ulteriuras infurmaziuns
Codoc - Koordination und Dokumentation Bildung Wald
Hardernstr. 20
Postfach 339
3250 Lyss
Tel: 032 386 12 45
URL: www.waldberufe.ch
WaldSchweiz
Rosenweg 14
4501 Solothurn
Tel: 032 625 88 00
URL: www.waldschweiz.ch
Revistas professiunalas:
"Wald und Holz"
"AmPuls"