Lavurs
Practicists forestals e practicistas forestalas collavuran tar tut las lavurs en il guaud. Els tgiran plantas e fan plantaziuns. Cun resgias a motor e turns da suga derschan els plantas, allontaneschan suenter la roma e taglian il bist. La laina vegn silsuenter transportada cun camiun-tractors u cranas a cabel al deposit. Durant la primavaira e la stad tgiran els surtut il guaud giuven. Per che las plantas giuvnas possian crescher bain e survegnian avunda glisch allontaneschan els zerclim sco era chaglias e plantinas cun la fautsch a motor e cun la resgia a motor. Sch’i fa da basegn, protegian practicists forestals las plantas giuvnas cun cundrezs spezials da las morsas da chavriels e tschiervs.
Practicists forestals gidan er da bajegiar vias da guaud, da segirar spundas, da surbajegiar auals e d’eriger rempars da lavinas sin ils culms. Els lavuran savens cun sigirs, scursets, mazzas da sfender e cugns, dentant surtut cun resgias a motor. Lur lavur prestada vegn nudada en in rapport.
Tar lavurs forestalas è la ristga d’accident gronda. Perquai lavuran practicists forestals attentamain cun resguardar las prescripziuns da protecziun da la sanadad e la segirezza da lavur. Els preparan conscienziusamain las lavurs e prendan las mesiras necessarias avant che derscher las plantas. Els tiran en la dretga vestgadira da lavur - per exempel ina chapellina, egliers da protecziun e guants. Avant che derscher las plantas segireschan els las vias da guaud cun marcaziuns e barricadas. Tar cundiziuns difficilas lavuran els tenor ils cumonds dals schefs.
Practicists forestals èn ultra da quai responsabels per la tgira ed il funcziunament dals guaffens e dals apparats. Per exempel tiran els si regularmain la chadaina da la resgia a motor sco er nettegian ed unschan las maschinas.
Scolaziun
Basa legala
Ordinaziun federala 15-10-2012, cun midada 1-8-2015
Durada
2 onns
Furmaziun en la pratica
En ina interpresa forestala publica u privata u en in manaschi forestal
Furmaziun en scola
Per regla curs da bloc a la scola professiunala
Roms professiunals
- exequir lavurs cun laina cun agid da proceders motormanuals
- utilisar e tgirar meds da lavur
- resguardar las prescripziuns da la protecziun da la sanadad e da l’ambient sco er da la segirezza da la lavur
- exequir la tgira da guauds giuvens e plantaziuns
Curs ordaifer il manaschi
lainaria e meds da lavur per il mantegniment, agid d’urgenza per il persunal forestal, tgira dal guaud
Diplom
Attest federal professiunal "practicist forestal / practicista forestala AFP"
Premissas
Furmaziun preliminara
- scola populara terminada
- fufragnadi vegn recumandà
Pretensiuns
- plaschair da lavurar en il liber
- bun dun d’observar la natira
- senn da responsabladad per lavurs privlusas (ristga d’accidents)
- buna sanadad per lavurs en il liber da tutt’aura
- forza corporala
- enclegientscha pratica
- enclegientscha tecnica per la lavur cun apparats e maschinas
- abilitad da lavurar en ina gruppa
- supplementarmain: examinaziun corporala tras in medi
Furmaziun supplementara
Curs
purschidas da centers da furmaziun per selvicultura ed agricultura, da federaziuns e d’organisaziuns per la protecziun da l’ambient; ina survista dals curs porscha Codoc
Bostger / Bostgera AFQ
practicists forestals / practicistas forestalas AFP pon far ina furmaziun scursanida sco bostger / bostgera AFQ cun attestat federal da qualificaziun (access al 2. onn da furmaziun).
Suenter han els las medemas pussaivladads da furmaziun supplementara sco bostgers / bostgeras AFQ.
Cundiziuns da lavur
Practicists forestals lavuran per manaschis forestals privats e publics u en champs da lavurs sumegliants, per exempel en l’industria da laina, orticultura e cuntrada u sin il sectur ambiental. Practicists forestals lavuran per gronda part en il liber ed èn suttaposts a tut las influenzas da l’aura. Lur lavur è corporalmain fitg stentusa.
Ulteriuras infurmaziuns
Codoc
Koordination und Dokumentation Bildung Wald
Hardernstr. 20
Postfach 339
3250 Lyss
Tel: 032 386 12 45
URL: www.waldberufe.ch