Spezialist dad ICT AFQ
Spezialista dad ICT AFQ
![[object Object],[object Object]](https://media.sdbb.ch/transform/c73ee137-e4f9-4dce-be65-ff624538cdc8/OPINFO-NH-2704-jpg?io=transform:fill,width:740,height:490)
1. onn d’emprendissadi: CHF 550–750.–
2. onn d’emprendissadi: CHF 800–1000.–
3. onn d’emprendissadi: CHF 1050–1250.–
Sco spezialista u spezialist dad ICT installeschas e configureschas ti l'infrastructura dad ICT da firmas e d'organisaziuns. Latiers tutgan computers, accessoris, servers, applicaziuns e software. Ti collias apparats e servetschs, sco servetschs da cloud, cun la rait. Ti t'occupas dal mantegniment ed elimineschas disturbis. Ultra da quai sustegnas, scoleschas e cusseglias ti las utilisadras ed ils utilisaders da quests sistems.
Incumbensas
- installar e configurar apparats sco computers, stampaders, tablets e smartphones sco er sistems operativs, p.ex. per drizzar en in nov plaz da lavur
- mantegnair hardware, p.ex. chartas graficas u cartas d'arcunaziun
- installar, configurar ed actualisar software ed applicaziuns
- adattar la hardware, la software u la rait, p.ex. engrondir l'arcun, agiuntar ina carta da rait u prolungar la durada da l'accumulatur
- sviluppar plans da tests, far tests e documentar ils resultats, sche necessari, schliar problems
- examinar, applitgar ed adattar programs d'automatisaziun
- cooperar a projects che pertutgan l'infrastructura dad ICT, p.ex. per dischlocar ina partiziun
- planisar incumbensas e pass da lavur
- controllar, sch'ils apparats, las applicaziuns ed ils servetschs, p.ex. servetschs da cloud, èn cumpatibels cun ils conturns dad IT da l'interpresa, pia sch'els èn adattads
- colliar apparats cun la rait sco computers u stampaders, p.ex. via router
- colliar servetschs sco servers u clouds cun la rait
- eliminar disturbis u trametter vinavant problems ad ina spezialista u in spezialist
- proteger apparats cun agid da tools da segirezza sco firewalls e programs antivirus, p.ex. cunter virus u malware
- determinar reglas da segirezza per las utilisadras ed ils utilisaders, p.ex. en cas d'emprovas da phishing
- scolar e gidar las utilisadras ed ils utilisaders tar l'introducziun da tools e d'applicaziuns dad ICT, infurmar ellas ed els davart la segirezza e davart la protecziun da datas
- elavurar instrucziuns da diever, videos d'emprender, preschentaziuns e glistas da controlla, per part er en englais
- tgirar il helpdesk: sustegnair en cas da problems per telefon u al lieu
- schliar ils cas independentamain u en il team, trametter vinavant en cas da basegn ad ina spezialista u in spezialist
- elavurar incumbensas administrativas ed empustar hardware
- chattar ora, tge che la clientella vul e la cussegliar tar la cumpra d'apparats dad ICT
Ambient da lavur
Sco spezialista u spezialist dad ICT lavuras ti suletta u sulet ed en il team. Savens has ti contact cun collavuraturas e collavuraturs da tia interpresa, cun utilisadras ed utilisaders u la clientella, dals quals ti t'occupas independentamain u ensemen cun auters. Tes temps da lavur èn regulars.
Ti pos lavurar en tut las branschas, p.ex. en interpresas da servetsch, d'industria e da commerzi u en las administraziuns publicas. Ti lavuras sin ils champs support tecnic u vendita, e quai entaifer ina interpresa u tar ina interpresa externa dad ICT. Ti stos t'infurmar cuntinuadamain davart novaziuns en connex cun apparats dad IT ed applicaziuns.
Pretensiuns e interess
- Chapientscha tecnica
- Abilitad da s'adattar a novas tecnologias
- Moda da lavurar sistematica
- Abilitads analiticas
- Moda da lavurar conscienziusa ed exacta
- Abilitad da communitgar
- Plaschair dal contact cun glieud
- Abilitad da lavurar en in team
- Lavurar al computer
- Lavurar cun cifras
- Schliar incumbensas tecnicas
- S'occupar cun electricitad ed electronica
- Lavurar endadens
Scolaziun
La scolaziun vegn fatga sco emprendissadi en in manaschi u en ina scola a temp cumplain.
furmaziun pratica en in manaschi da servetschs, d'industria u da mastergn ubain en l'administraziun: 3 fin 4 dis per emna
1 fin 2 dis per emna en las scolas professiunalas spezialisadas chantunalas
en plirs chantuns: 24 dis durant 3 onns
3 onns
- terminà la scola obligatorica
- intgins manaschis pretendan in test da qualificaziun
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Spezialist / Spezialista dad ICT AFQ
Furmaziun cuntinuonta
Emprendissadi supplementar
Sco spezialista u spezialist dad ICT pos ti per regla far in emprendissadi scursanì d'informaticra u informaticher AFQ.
Examen professiunal (EP)
- Spezialist / Spezialista da l'informatica economica EP
- ICT-Application Development Specialist EP
- ICT-Platform Development Specialist EP
- Cyber Security Specialist EP
- Digital Collaboration Specialist EP
- AI Business Specialist EP
Examen professiunal superiur (EPS)
- Manager / Managera ICT EPS
- Information Security Manager / Managera EPS
Scola spezialisada superiura (SSS)
- Informaticher / Informaticra SSS
- Informaticher / Informaticra d'economica SSS
Scola auta spezialisada (SAS)
- Bachelor of science en informatica
- Bachelor of science en informatica economica
- Bachelor of science en data engineering
- Bachelor of science en electrotecnica e tecnologia d'infurmaziun
- Bachelor of science en informatica medicinala
Tut tenor la scola auta spezialisada valan differentas cundiziuns d'admissiun.
Eveniments
Professiuns sumegliantas
