Lavurs
Automatichers ed automaticras construeschan cumonds electrics, apparats, maschinas u sistems d’automatisaziun. Ensemen cun autras persunas dal fatg s’occupeschan els da la construcziun dals implants automatisads e da lur messa en funcziun, da la reparatura sco era da la projectaziun, programmaziun e da la documentaziun.
Nus avain d’engraziar ad els ch’il dretg product vegn distribuì suenter avair bittà munaida en l’automat da bavrondas, che portas da culissa automaticas s’avran en il dretg mument e che las storas sa serran automaticamain cura ch’i dat sulegl. Automatichers lavuran en differents secturs sco per exempel en il svilup e la construcziun d’implants da distribuziun d’energia sco era en la producziun e la messa en funcziun d’implants da signals da glisch, sistems d’embuttigliar u indrizs da zavrar. Tut tenor lur occupaziun lavuran els en ina halla da producziun u en in biro da planisaziun.
En il sectur da svilup lavuran automatichers vi da carnets da duairs e scrivan offertas tecnicas. Els elavureschan soluziuns per la tecnica d’automatisaziun al monitur. Els programmeschan cumonds ed examineschan programs. Els construeschan las instrucziuns ed ils documents tecnics tar ils implants automatisads.
Automatichers èn responsabels per l’electrica e la pneumatica durant la construcziun da stgaffas d’electrocumond, apparats, maschinas e sistems d’automaziun. Els construeschan ils indrizs automatisads tenor ils documents da fabricaziun. Els collian e mettan puschina cun in sistem dad uders las singulas cumponentas. Els fan controllas da funcziun e qualitad ed examineschan la software da la regulaziun tar la messa en funcziun. Per part prenda la clientella giu il product finì gia en la halla da producziun avant la furniziun. Il pli savens metta la glieud da professiun dentant en funcziun ils implants directamain tar la clientella. Cun agid d’instrucziuns u glistas da controlla mainan els tras controllas e giusteschan la configuraziun sch’i fa da basegn.
Els èn era responsabels per il mantegniment e las reparaturas. Automatichers localiseschan ed elimineschan disturbis vi dals indrizs automatisads. Els fan midadas ed engrondiments. Durant lur lavur resguardan els adina las prescripziuns davart la segirezza da lavur e davart la protecziun da l’ambient e da la sanadad.
Scolaziun
Basa legala
Ordinaziun federala 3-11-2008 (stadi dals 1-1-2018)
Durada
4 onns
Furmaziun en la pratica
En in manaschi da l’industria da maschinas, da metal e da l’electroindustria (industria MEM)
Furmaziun en scola
1 enfin 2 dis per emna a la scola professiunala
Roms professiunals
- Basas tecnicas (matematica, informatica, tecnicas d’emprender e da lavurar, fisica)
- englais tecnic
- tecnica da materials e tecnica da dissegn
- electrotecnica ed electronica
- automaziun
- projects interdisciplinars
Curs ordaifer il manaschi
Emprender ed exercitar la basa professiunala en la pratica
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "automaticher / automaticra AFQ"
Premissas
Furmaziun preliminara
- scola obligatorica terminada cun autas pretensiuns
- bunas prestaziuns en matematica e fisica
Pretensiuns
- enclegientscha tecnica
- interess vi da novas tecnologias, electrotecnica e relaziuns tecnicas
- enclegientscha per relaziuns abstractas
- bun’imaginaziun spaziala
- mauns inschignaivels per ina lavur exacta
- plaschair da lavurar a moda exacta e conscienziusa
- pazienza, perseveranza ed abilitad da sa concentrar
- abilitad da lavurar en in team
- autonomia
- fidadadad
Furmaziun supplementara
Curs
purschidas da scolas spezialisadas e professiunalas sco era d’associaziuns professiunalas sco Swissmechanic, Swissmem Kaderschule e VSAS Verband Schaltanlagen und Automatik Schweiz
Examen professiunal (EP)
p.ex. spezialist / spezialista d’automatica, manader / manadra da project e dal lavuratori en la fabricaziun da tavlas electricas, spezialist / spezialista da fabricaziun
Examen professiunal superiur (EPS)
maister / maistra indrizs da distribuziun ed automatica, maister / maistra industria
Scola spezialisada superiura (SSS)
p.ex. tecnicist diplomà / tecnicista diplomada SSS tecnica da sistems (approfundaziun en automaziun), tecnicist diplomà / tecnicista diplomada SSS electrotecnica, tecnicist diplomà / tecnicista diplomada SSS construcziun da maschinas, tecnicist diplomà / tecnicista diplomada SSS informatica
Scola auta spezialisada (SAS)
p.ex. Bachelor of Science (SAS) en electrotecnica, en tecnica da sistems, en tecnica da maschinas, en mecatronica, en informatica, en tecnica d’edifizis
Cundiziuns da lavur
Automatichers lavuran cunzunt en manaschis da l’industria da maschinas, da metal e da l’electroindustria (industria MEM), da l’industria da chemia, da l’automatisaziun d’edifizis sco era en manaschis da producziun fitg automatisads. Grazia a lur furmaziun sin differents champs pon automatichers lavurar en differentas spartas ed han bunas schanzas era sin il martgà da lavur da l’exteriur.
Ulteriuras infurmaziuns
Swissmem Berufsbildung
Brühlbergstr. 4
8400 Winterthur
Tel: 052 260 55 00
URL: www.swissmem-berufsbildung.ch
URL: tecindustry.ch
Swissmechanic Dachorganisation
Felsenstr. 6
8570 Weinfelden
Tel: 071 626 28 00
URL: www.swissmechanic.ch
VSAS Verband Schaltanlagen und Automatik Schweiz
Werkhofstr. 9
2503 Biel
Tel: 032 322 85 78
URL: www.vsas.ch