Lavurs
Telematichers e telematicras procuran cun l’installaziun ed il mantegniment d’indrizs e raits che la colliaziun internaziunala da las tecnologias d’informatica e da communicaziun funcziunia senza problems. Cun lur savida davart las pussaivladads d’utilisaziun d’indrizs da telematica e da sistems da communicaziun collian e configureschan els per exempel telefons e computers.
Avant che telematichers van al lieu d’acziun legian els ils plans e schemas e discurran cun lur superiurs. Era cun la clientella fan els scleriments preliminars. Sch’i dat dumondas tecnicas davart ils indrizs ed apparats sa drizzan els als furniturs u purschiders da la rait responsabels. Sinaquai preparan els lur instrument da lavur principal, il laptop, sco era il material necessari, ils utensils e guaffens.
Telematichers exequeschan lavurs d’installaziun, da service e da mantegniment directamain tar la clientella, per exempel en biros, stanzas da sedutas e stanzas per servers. Els realiseschan indrizs da telecommunicaziun e da colliaziun da differents participants sco era raits da communicaziun per l’entir edifizi. Els tschernan ils sistems ed apparats adequats e surveglian l’installaziun dals bischens e dals chanals da cabels tenor ils plans. Durant l’emprendissadi tiran els era en cabels e fildaroms e monteschan bischlas da contact ed interrupturs. Els uneschan l’indriz tar ina rait ed al mettan en funcziun. Els collian, configureschan e programmeschan ils apparats finals. Telematichers na lavuran betg mo cun current a bassa tensiun, mabain era cun current ad auta tensiun. Els lavuran savens sulet u en in pitschen team.
Suenter la messa en funcziun da las raits u tar disturbis controlleschan els cun instruments da mesira, sche tut funcziuna ed è segir. Telematichers protocolleschan lur lavur fitg conscienziusamain. Els resguardan las normas, las prescripziuns davart la segirezza e las directivas davart ils custs ed ils termins.
Tar lavurs da mantegniment e da service ston els reparar ils indrizs uschè spert sco pussaivel e savens era lavurar durant la saira u durant la fin d’emna. Cura ch’els han finì lur lavur cusseglian els la clientella e la explitgan il diever correct dals indrizs ed apparats.
Scolaziun
Basa legala
Ordinaziun federala 27-4-2015
Durada
4 onns
Furmaziun en la pratica
En in’interpresa da telematica u en in’interpresa d’installaziuns electricas cun ina partiziun da telematica
Furmaziun en scola
1 di per emna a la scola professiunala, dal segund fin il quart semester 1 fin 2 dis per emna a la scola professiunala
Roms professiunals
- tecnica d’elavuraziun
- basa tecnologica
- documentaziun tecnica
- telematica e tecnica da la rait
- tecnica da sistems electrics
- temas da furmaziun interdisciplinars
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "telematicher / telematicra AFQ"
Premissas
Furmaziun preliminara
- scola populara terminada, en general stgalim superiur
- bunas prestaziuns en geometria, matematica e fisica
Pretensiuns
- interess vi da l’electrotecnica, la tecnica e l’informatica
- patratgar abstract e logic
- enclegientscha tecnica
- motorica fina resp. mauns inschignus per lavurs exactas
- moda da lavurar conscienziusa
- abilitad da lavurar en in team
- nagins problems da la vesida da colurs (ins sto savair distinguer las colurs dals cabels)
- buna demananza (contact cun la clientella)
- flexibilitad (pertutgant il lieu ed il temp da lavur)
Furmaziun supplementara
Curs
purschidas d’associaziuns professiunalas, scolas professiunalas ed instituts tecnics
Examen professiunal (EP)
cun certificat federal: manader / manadra da project da telematica, cussegliader / cussegliadra da segirezza electrica, manader / manader da projects electrics
Examen professiunal superiur (EPS)
Telematicher diplomà / telematicra diplomada, expert da l'electroinstallaziun e da la segirtad diplomà / experta da l'electroinstallaziun e da la segirtad diplomada, expert da l'electroplanisaziun diplomà / experta da l'electroplanisaziun diplomada
Scola spezialisada superiura (SSS)
direcziuns da studi en il sectur tecnic, p.ex. tecnicist / tecnicista telecommunicaziun SSS, tecnicist / tecnicista electrotecnica SSS u tecnicist / tecnicista informatica SSS
Scola auta spezialisada (SAS)
p.ex. Bachelor of Science (SAS) en telecommunicaziun, en electrotecnica u en tecnica d’edifizis (direcziun da studi: Gebäude-Elektroengineering)
Cundiziuns da lavur
Telematichers lavuran en interpresas da telematica u en interpresas d’installaziuns electricas cun ina partiziun da telematica. Tut tenor il lieu da lavur ston els era lavurar durant la notg u durant la fin d’emna u far servetsch da pichet. Els èn savens per via.
Telematichers ston adina frequentar furmaziuns supplementaras, cunquai ch’ils sistems da telecommunicaziun cuntinueschan a sviluppar rasantamain. Persunas dal fatg qualifitgadas èn tschertgadas sin il martgà da lavur.
Ulteriuras infurmaziuns
Verband Schweiz. Elektro- Installationsfirmen VSEI
Limmatstr. 63
8005 Zürich
Tel: 044 444 17 17
URL: www.vsei.ch
Revistas professiunalas:
"Electro Revue"
"Elektrotechnik"