Spezialists e spezialistas da tgirom elavureschan differentas materialias. Tut tenor il product tschernan els tgirom ferm e resistent u tgirom fin e lom. Ultra da quai elegian els per mintga material las maschinas ed ils instruments adequats. Dal sboz fin a la surdada al clients planiseschan e calculeschan els mintga lavur conscienziusamain.

Spezialists da tgirom e textilias produceschan unicats u pitschnas serias. Els sviluppeschan l’emprim ils prototips e creeschan ils models. Els pon transponer furmas e s’imaginar la realisaziun da sbozs dissegnads. Per la fabricaziun tschernan els il material adequat ed al taglian tenor il model da tagl. Tut tenor l’artitgel utiliseschan els tocca da metal sco ferradira ed anzas e material d’emplenir. Els lavuran per part a maun e per part cun maschinas.

En la direcziun speziala da l’equitaziun vegnan fabritgads artitgels da tgirom per il sport da chavals u per l’agricultura, per exempel sellas, chavazzinas u cumets. Tar tut quai tegnan ils spezialists da tgirom e textilias quint da l’anatomia da l'uman e da l'animal.

En la direcziun da vehichels e tecnica elavureschan spezialists da tgirom e textilias l’equipament interiur ed ils plimatschs da seser d’autos, da bartgas u d’eroplans. Plinavant fabritgeschan els artitgels tecnics sco filters da tessì spezial u culs textils. Quests products da hightec vegnan per exempel cumprads da l’industria da stampa, da la tecnica da medischina, da l’industria da victualias u da l’industria farmaceutica.

Spezialists da tgirom e textilias en la direcziun speziala da rauba da tgirom fin fabritgeschan, modifitgeschan e repareschan tastgas, mappas, bursas, etuis per bischutaria ed artitgels sumegliants. Tar tut quai è impurtant in bun senn per furmas, colurs e materials sco er in flair per la moda.

En la fatschenta da vendita cusseglian spezialists da tgirom e textilias la clientella. Els resguardan ils giavischs e basegns dals clients ed als infurmeschan davart differents materials e differentas pussaivladads da fabricaziun.