Chalgers exequeschan tut ils pass da lavur per producir chalzers sin mesira. Els fabritgeschan era chalzers da confecziun e chalzers spezials. Perquai che la dumonda per chalzers producids a maun è pitschna, s'occupan chalgers oravant tut cun reparaturas e correcturas ortopedicas pitschnas.

Chalgeras fan la differenza tranter reparaturas da la sola e dal nutigl. Tar las reparaturas da las solas remplazzan ellas per exempel ils pizs dals chalzers, midan solas e tatgs u monteschan paraglischnaders. Reparaturas dal nutigl pertutgan il tgirom dal nutigl, pia la part sura dal chalzer. Chalgeras remplazzan per exempel anzas e serranetgas, applitgeschan futterals egl intern u cusan da nov las cusadiras vedras.

Per clientella cun chalzers ortopedics fan ils chalgers pitschnas correcturas ortopedicas vi dal chalzer. Els auzan ils tatgs e las solas per gulivar las differentas lunghezzas da las chommas u per curreger posiziuns falladas dal corp, els pulstreschan smatgadas u monteschan agids per rudlar giu il pe. Per questas lavurs dovran els enconuschientschas en l'anatomia e la patologia.

En il lavuratori lavuran chalgeras cun materials sco tgirom, gumma, materias sinteticas, collas, textilias, corc e.u.v. Ellas dovran quests materials senza sfarlattar ed als magasineschan a moda professiunala.

Per las differentas lavurs da tagliar, collar, glimar e cuser elegian ellas tecnicas, maschinas e guaffens adattads. Tar lur guaffens tutgan il martè da chalgers, forschs da tgirom, zangas da morder, molas, siblas e raspas. Ultra da quai dovran ellas utensils sco apparats da rebatter, maschinas da mular, maschinas da cuser u apparats da schlargiar. Ellas mantegnan lur guaffens e fan pitschnas reparaturas vi da las maschinas.

Chalgers cusseglian lur clientella areguard reparaturas adattas e la tgira dals chalzers e vendan en lur negozi products supplementars sco curegias e products da nettegiar.

Els tegnan net lur plaz da lavur e resguardan las prescripziuns per proteger l'ambient e la sanadad e per la segirezza da lavur.