Lavurs
La lavur vi da fitg pitschnas parts d’uras pretenda precisiun maximala. Or d’atschal, mesch ed auter material fan urers ed ureras parts d’uras ed ils utensils pitschens ch’els dovran per la lavur. Els gliman, foran, fresan e storschan parts pitschnas, taglian crennadiras e puleschan surfatschas.
Urers mettan ensemen uras mecanicas, automaticas e simplas uras electronicas ed enconuschan lur moda da funcziun. Els controlleschan e nettegian las parts, las unschan e monteschan cun agid da fegls da datas tecnics. Suenter regleschan els l’ura en differents pass da lavur, per ch’ella giaja exactamain.
Tar lavurs da reparatura e mantegniment tschertgan urers suenter funtaunas da sbagls ed als reparan. Cun utensils spezials avran els la chascha d’uras, demonteschan il mecanissem da l’ura e prendan dapart las singulas parts. Cun la marella controlleschan els mintga singula part sin funcziunalitad e midan or parts defectas. Durant il metter ensemen fan els adatg ch’i na dettia betg particlas da pulvra. En il labor controlleschan els cun apparats da mesiraziun spezials e proceders da controlla l’exactadad dal mecanissem da l’ura e schebain la chascha da l’ura è impermeabla.
Urers cun accent rhabillage lavuran per exempel en la partiziun da service d’in producider d’uras u en ina fatschenta spezialisada d’uras. Els èn spezialists per il mantegniment e la reparatura d’uras da tuttas sorts, d’uras da bratsch mecanicas ed electronicas sur uras cun perpendicul fin uras spezialas sco cronografs cun funcziun da retegnair il temp.
Urers cun accent metodas industrialas collavuran surtut tar la fabricaziun seriala d’uras da bratsch. Els lavuran en partiziuns da service e montascha.
Tar lur lavur resguardan urers las prescripziuns da la segirezza da la lavur sco er la protecziun da la sanadad e da l’ambient. Els dovran las maschinas correctamain, tenor las directivas dal manaschi e da la branscha.
Scolaziun
Basa legala
Ordinaziun federala 19-12-2014
Durada
4 onns
Accents
- rhabillage
- metodas industrialas
Furmaziun en la pratica
En in manaschi da l’industria d’uras, en ina fatschenta spezialisada d’uras u a la scola professiunala ZeitZentrum a Grenchen (en connex cun la scolaziun a temp cumplain)
Furmaziun en scola
1½ dis per emna a la scola professiunala ZeitZentrum
Roms professiunals
- fabritgar apparats specifics per la branscha, applitgar las directivas areguard la segirezza da la lavur, la protecziun da la sanadad e da l’ambient
- metter ensemen tocs singuls
- reglar e regulaziun da precisiun
- reparar
- manar tras analisas
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "urer / urera AFQ"
Premissas
Furmaziun preliminara
- scola populara terminada, stgalim da scola aut
- bunas prestaziuns en matematica e fisica
Pretensiuns
- abilitad da s’imaginar chaussas en il spazi
- inschign manual
- pensar logic
- bun dun da percepziun
- enclegientscha tecnica
- pazienza e perseveranza
- abilitad da sa concentrar
- senn per urden e nettezza
- vesida normala (era vesida curregida)
Furmaziun supplementara
Curs
purschidas da la federaziun dals patruns da l’industria d’uras svizra e da scolas spezialisadas da la branscha d’uras
Examen professiunal superiur (EPS)
maister urer / maistra urera: actualmain na vegnan manads tras nagins examens.
Scola spezialisada superiura (SSS)
p.ex. tecnicist / tecnicista dipl. SSS microtecnica (cun differentas approfundaziuns), tecnicist / tecnicista dipl. SSS construcziun da maschinas, approfundaziun tecnica da producziun
Scola auta spezialisada (SAS)
p.ex. Bachelor of Science (SAS) en microtecnica, Bachelor of Arts (SAS) en design da product ed industria
Cundiziuns da lavur
Urers èn spezialists cun abilitads multifaras ed experts tschertgads. Els lavuran tant en l’industria d’uras ed en fatschentas spezialisadas d’uras, sco er en manaschis da la microtecnica u en in’autra branscha da precisiun. Els lavuran en manaschis pitschens, mesauns e gronds che produceschan u vendan palettas da products differentamain multifaras. Urers chattan ina plazza da lavur en il servetsch da clientella, en la vendita, en labors u en ils differents process da producziun.
La tschertga da plazzas d’emprendissadi sa restrenscha principalmain sin l’industria d’uras en la regiun da l’artg dal Giura tranter Germania e Schaffusa.
Ulteriuras infurmaziuns
ZeitZentrum Uhrmacherschule Grenchen
2540 Grenchen
Tel: 032 654 27 00
URL: www.bbzsogr.so.ch
Arbeitgeberverband der schweiz. Uhrenindustrie
2301 La Chaux-de-Fonds
Tel: 032 910 03 83
URL: www.cpih.ch
Verband Schweizer Goldschmiede und Uhrenfachgeschäfte VSGU
3000 Bern 7
Tel: 031 329 20 72
URL: www.detail.ch