Lavurs
Ferrers e ferreras d’armas reparan e produceschan pistolas, revolvers e schluppets sco era autras armas da maun e da pugn. La plipart da las armas vegnan duvradas per la chatscha e per il sport sco era per l’ordonanza (armas da l’armada e da la polizia). Ferrers d’armas demonteschan las armas, nettegian las parts singulas, remplazzan tocca isada e monteschan tocs da reserva. Suenter che l’arma è nettegiada e reparada vegn ella puspè montada. Els unschan ils tocs movibels e controlleschan che tut funcziuna.
Ferrers d’armas lavuran oravant tut cun metal, dentant era cun lain e material sintetic. Els èn buns da duvrar tecnicas d’elavurar metal sco glimar, furar, turnar, resgiar, tagliar crennadiras ed era lutegiar e buglir. Els taglian la crennadira da la channa, drizzan portamustgas e portavisiers, sfruschan las chombras da patronas e drizzan il lain dal schluppet.
Ils tocs da reserva mancants produceschan ferrers d’armas en atgna reschia: percussurs, plattas da statgament, pennas e chaussas sumegliantas. Els produceschan ils tocs pitschens tenor skizzas e dissegns. Ferrers d’armas san dentant era producir tocca senza agid d’in plan.
Ferrers d’armas monteschan e regleschan apparats optics. Els cumpletteschan per exempel armas da chatscha e da sport cun perspectivs da mirar. Tar lur lavurs tutga era da modifitgar las armas. Per collecturs u per museums restaureschan els era armas istoricas.
Sulettamain en gronds manaschis vegnan producids schluppets cumplets, perquai ch’ils manaschis pitschens n’han betg tut l’equipament necessari. Il pli savens monteschan els perquai tocca prefabritgada tar ina nova arma. Ferrers d’armas reguleschan l’arma (cun sajettar) ed emprovan las armas reparadas (medemamain cun sajettar). L’atgna pratica da sajettar pussibilitescha era ina cussegliaziun cumpetenta. Els surdattan las armas a la clientella a moda segira ed instrueschan ella areguard diever e manipulaziuns tenor legislaziun davart las armas. Mintgatant èn els era engaschads tar occurrenzas da sport da tir, nua ch’els controlleschan e giusteschan las armas dals participants e da las participantas. Durant la lavur resguardan els las prescripziuns da l’ambient, da la sanadad e da la segirezza a la lavur.
Scolaziun
Basa legala
Ordinaziun federala 11-7-2012
Durada
4 onns
Furmaziun en la pratica
En ina ferraria d’armas
Furmaziun en scola
1 - 1½ dis per emna a la scola professiunala (ensemen cun ils polimecanists / las polimecanistas AFQ (profil G ed E, pretensiuns da basa e pretensiuns extendidas); l’enconuschientscha dal rom vegn instruida a Lenzburg en furma da curs da bloc (mintgamai 6 – 8 dis en il 3. ed il 4. onn d’emprendissadi)
Roms professiunals
- tractament professiunal da las armas
- vendita e cussegliaziun da clientella
- garantir la segirezza a la lavur, protecziun da la sanadad e da l’ambient
- basa tecnica
- englais tecnic
- tecnica da materials e tecnica da furmaziun
- tecnica da dissegn e da maschinas
- electrotecnica e tecnica da regulaziun
- projects interdisciplinars
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "ferrer / ferrera d’armas AFQ"
Premissas
Furmaziun preliminara
- scola populara terminada, stgalim da scola mesaun u superiur
- bunas prestaziuns en matematica e geometria
Pretensiuns
- enclegientscha tecnica
- dun manual
- moda da lavurar exacta
- mauns inschignaivels e ruassaivels
- grond senn da responsabladad
Furmaziun supplementara
Curs
purschidas da scolas professiunalas e scolas spezialisadas, da l’Associaziun svizra dals ferrers e dals commerziants dad armas sco era da producents dad armas
Examen professiunal (EP)
cun certificat professiunal federal: p.ex. spezialist / spezialista da process
Examen professiunal superiur (EPS)
maister / maistra d’industria
Scola spezialisada superiura (SSS)
p.ex. tecnicist diplomà / tecnicista diplomada SSS construcziun da metal
Scola auta spezialisada (SAS)
tar ina furmaziun preliminara adequata, p.ex. Bachelor of Science (SAS) en microtecnica, Bachelor of Science (SAS) en tecnica da maschinas
Cundiziuns da lavur
Ferrers d’armas lavuran en general en in lavuratori. Da temp en temp liquideschan els era lavurs definidas en chamonas da tir. Els lavuran principalmain a moda autonoma e cun gronda atgna responsabladad.
Durant occurrenzas da tir lavuran ferrers d’armas era las sondas e dumengias.
La purschida da plazzas d’emprendissadi en Svizra è fitg pitschna. Da preschent datti mo paucs manaschis che prendan emprendists.
Ulteriuras infurmaziuns
Schweiz. Büchsenmacher- und Waffenhändlerverband SBV
3400 Burgdorf
Tel: 034 422 12 20
URL: www.sbv-asa.ch