![[object Object],[object Object]](https://media.sdbb.ch/transform/4e55da90-01d9-4677-b31a-a516f535ca3f/BuechsenmacherEFZ-GA-JS-0111-jpg?io=transform:fill,width:740,height:490)
Ferrers e ferreras d’armas produceschan, reparan, fan adattaziuns, tgiran e vendan armas da fieu. Ozendi mainan els cunzunt manaschis che s’occupan cun la vendita e la reparatura da differentas sorts da buis e pistolas. Lur clientella èn chatschadurs, sportists da prestaziun, tiradurs d’uniuns e collecturs.
Incumbensas
- preparar differents tocs da lain u da metal, p.ex. la channa, la serradira, il paratgiet, il lain u moni da la buis per montar las armas u tocca da las armas
- montar differenta tocca dad in’arma cun agid da maschinas dirigidas da computers
- far midadas vid tocca singula tut tenor giavisch da la clientella, p.ex. in dubel paratgiet, magazins u perspectivs
- construir inizialas embellidas sin plachettas da metal, uschenumnadas plachettas da monogram u far e montar magazins integrads en il moni
- controllar sistematicamain la funcziunalitad da las armas e resguardar strictamain las normas vertentas
- controllar la singula tocca ed identifitgar ils mancos
- tgirar las armas cun las nettegiar ed unscher cun ieli, far las controllas da finiziun, rechargiar cun muniziun e far l’agiustament final
- tractar tocca veglia a moda speziala per ch’ella vesia puspè or nova
- curreger mancos e fenomens d’isada, demontar e remplazzar tocca defecta
- vender armas, muniziun, accessoris sco perspectivs, tastgas da buis e vestgadira da chatscha
- cussegliar la clientella tut tenor il diever da l’arma
- interprender ils pass necessaris tar ils uffizis responsabels ed emplenir ils formulars correspundents
- declerar a la clientella l’utilisaziun da l’arma ed infurmar davart las perscripziuns da segirezza
- registrar empustaziuns
- far offertas
- tschentar quint
- manar la contabilitad
- controllar las reservas dal deposit
Ambient da lavur
La pli part da las ferreras e dals ferrers d’armas vendan armas fabritgadas industrialmain perquai che la producziun a maun è fitg limitada. Els lavuran savens en in lavuratori, stattan dentant er en contact direct cun lur clientella ed han temps da lavur regulars.
Las perspectivas professiunalas per ferreras e ferrers d’armas èn limitadas. Mo paucs manaschis scoleschan emprendists. Uschè èsi grev da chattar ina plazza d’emprendissadi. I na è er betg simpel da chattar ina plazza suenter l’emprendissadi. La glieud da professiun chatta pel pli lavur en fabritgas industrialas d’armas en la Svizra tudestga, en l’exteriur u en in arsenal federal nua ch’ella controllescha e giustescha las armas.
Intgins avran lur atgna fatschenta e sa spezialiseschan sin la vendita da differentas sorts dad armas specificas; sin la restauraziun d’armas istoricas u sin la producziun da serias pitschnas. Savens amplifitgeschan els lur sortiment e vendan vestgadira da sajettar u da chatscha u artitgels da sport da cumbat. I è er pussaivel da daventar in represchentant d’in manaschi d’import dad armas.
Pretensiuns e interess
- Inschign manual
- Imaginaziun tridimensiunala
- Chapientscha tecnica
- Moda da lavurar conscienziusa ed exacta
- Dun per cifras
- Talent da dissegnar
- Plaschair da vender e da cussegliar
- Lavurar cun ils mauns
- Elavurar metal
- Lavurar en moda exacta
- Schliar incumbensas tecnicas
- Planisar, construir, far dissegn tecnic
Scolaziun
La scolaziun vegn fatga sco emprendissadi en in manaschi.
En ina ferraria d’armas
1 - 1½ dis per emna a la scola professiunala, ensemen cun ils polimecanists AFQ
l’enconuschientscha dal rom vegn instruida a Lenzburg en furma da curs da bloc: mintgamai 6 – 8 dis en il 3. ed il 4. onn d’emprendissadi
Emprender ed exercitar la basa professiunala a moda pratica, 34 dis durant 4 onns
4 onns
Temp da scola obligatoric terminà
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Ferrer / Ferrera d’armas AFQ
Furmaziun cuntinuonta
Curs
purschidas da scolas professiunalas e scolas spezialisadas, da l’Associaziun svizra dals ferrers e dals commerziants dad armas sco era da producents dad armas
Examen professiunal (EP)
Spezialista da process cun certificat professiunal federal
Examen professiunal superiur (EPS)
Manadra da producziun dipl.
Scola spezialisada superiura (SSS)
p.ex. tecnicist diplomà SSS construcziun da metal
Scola auta spezialisada (SAS)
studis en direcziuns parentadas, p.ex. Bachelor of Science (SAS) en microtecnica u en tecnica da maschinas. Tut tenor scola auta spezialisada valan differentas cundiziuns d’admissiun
Professiuns sumegliantas
