Lavurs
Construiders e construidras da furmas fabritgeschan models, furmas, apparats da producziun, prototips, models da funcziun e models da design tridimensiunals. Quests products vegnan duvrads en l’industria da materia sintetica, cularias da metal, tecnica medicinala, en la construcziun da vehichels ed aviuns, en il design da products ed en auters secturs da l’industria. Per l’industria d’elavuraziun da materia sintetica fabritgeschan construiders da furmas las furmas per pressegiadas ad injecziun ed autras furmas spezialas. Per produciders d’elements da culaditsch da metals produceschan els models da cularia e per designras creeschan els a maun da skizzas prototips.
Construiders da furmas construeschan al computer cun programs spezials CAD l’element da construcziun tridimensiunal. Els elavuran las datas 3D vi dal computer e fan ils programs da resgiar ch’èn necessaris per la producziun. Uschespert che tut las infurmaziuns per reglar ils indrizs e las maschinas da resgiar èn prontas, cumenzan els cun la producziun.
Sper las tecnicas da producziun dirigidas dal computer san construiders da furmas er tecnicas d’elavuraziun manualas sco resgiar, gizzar, tatgar, glimar, furar, laminar, fresar e storscher. Differenta materia sintetica en furma liquida ed insolubla e differents metals èn ils materials da fabricaziun che vegnan duvrads il pli savens.
Construiders da furmas guardan da lur atgna segirezza e sanadad. Cun lavurar vi da las maschinas resguardan els strictamain las prescripziuns. En contact cun materia privlusa tiran els p.ex. en guants ed egliers da protecziun, tar lavurs cun gronda canera portan els ina protecziun da l’udida. Ultra da quai allontaneschan els il rument a moda correcta e dovran material da construcziun ed energia a moda conscienta per l’ambient.
Scolaziun
Basa legala
Ordinaziun federala 30-10-2009, cun midada dals 22-2-2016
Durada
4 onns
Furmaziun en la pratica
En in manaschi da construcziun da models u da furmas
Furmaziun en scola
1½ di per emna a la scola professiunala
Roms professiunals
- instrucziun da roms construcziun da tocs en elavuraziun
- instrucziun da roms mecanica: basa tecnica, englais tecnic, tecnica da material da fabricaziun e tecnologia, tecnica da dissegn e maschinas, electrotecnica e tecnica da regulaziun, projects interdisciplinars
Curs ordaifer il manaschi
tecnica da fabricaziun manuala, fabricaziun convenziunala cun la maschina, elavuraziun CAM
Maturitad professiunala
Tar fitg bunas prestaziuns da scola po vegnir frequentà la scola da maturitad professiunala durant la furmaziun da basa.
Diplom
Attestat federal da qualificaziun "construider / construidra da furmas AFQ"
Premissas
Furmaziun preliminara
- scola populara terminada
- bunas prestaziuns en quint, geometria e dissegn tecnic
Pretensiuns
- abilitad pregnanta da s’imaginar chaussas en il spazi
- inschign manual
- enclegientscha tecnica
- pensar analitic resp. chapir ils connexs
- talent da dissegn (dissegn tecnic e dissegn a maun liber)
- moda da lavurar exacta e conscienziusa
- abilitad da sa concentrar, pazienza e perseveranza
- bun dun receptiv
Furmaziun supplementara
Curs
purschidas da scolas professiunalas, da SWISS FORM ed autras associaziuns professiunalas
Examen professiunal (EP)
spezialist / spezialista da process cun certificat professiunal federal
Examen professiunal superiur (EPS)
maister / maistra en l’industria
Scola spezialisada superiura (SSS)
p.ex. tecnicist / tecnicista dipl. SSS construcziun da maschinas, tecnicist / tecnicista dipl SSS construcziun en metal
Scola auta spezialisada (SAS)
p.ex. Bachelor of Arts (SAS) en design da products e d’industria, Bachelor of Science (SAS) en tecnica da maschinas
Cundiziuns da lavur
Construiders da furmas lavuran surtut en manaschis da construcziun da models ed en cularias, latiers sa tracti da firmas pitschnas e mesaunas. Els han la pussaivladad da sa spezialisar en differentas direcziuns, p.ex. sco constructur, programmader CAD/CAM u fresader CAM.
Construiders da furmas han bunas schanzas sin la fiera da lavur, cunquai ch’els èn disads tras lur furmaziun extendida da lavurar cun different material, da manevrar differentas maschinas e da schliar incumbensas cumplexas.
Ulteriuras infurmaziuns
SWISS FORM – Verband Schweiz. Modellbaubetriebe
Sekretariat
6210 Sursee
Tel: 041 926 07 89
URL: www.swiss-form.ch