Tschentaplattas AFQ

Cuvridas da plattas èn resistentas cunter umiditad, variaziuns da temperatura e pais gronds, ellas èn igienicas, èn senza ristgs per l’ambient e guardan or bain.

Tschentaplattas tschentan cuvridas da funds e da paraids en edifizis novs e tar renovaziuns. Els tschentan plattas en secturs d’abitar, en bogns e cuschinas, sin terrassas, en edifizis industrials ed edifizis da mastergn, en ospitals, bogns cuverts, restaurants euv.

Al cumenzament da lur lavur controlleschan tschentaplattas il stadi dal fund, sin il qual els tschentan las platta ed al mesiran exactamain. Suenter planiseschan els, co ch’els ston parter en las plattas, per ch’i dettia a la fin ina surfatscha armonica. Els èn creativs tar la cumposiziun da las plattas, s’interesseschan per novas metodas da tschentar plattas e valiteschan las plattas ch’èn adattadas il meglier areguard material, grondezza, colur e furma.

Tut tenor cuvrida preparan ils tschentaplattas lura il fund da maulta u tiran si ina massa da tatgar speziala. Sin quel tschentan els las plattas. En singuls lieus ston las plattas vegnir tagliadas a moda exacta sin la grondezza correspundenta. Suenter che la surfatscha è setga vegnan emplenidas las fugas tranter las plattas cun maulta da fugas e lura vegnan nettegiadas las plattas.

Per tagliar las plattas, quai che pretenda in lavurar a moda exacta, dovran tschentaplattas maschinas per tagliar plattas, fresas da maun u fresas bletschas. Guaffens impurtants èn er zangas spezialas e maschinas da mular chantuns.

Tschentaplattas cusseglian lur clientella a moda cumpetenta ed amiaivla. Els la infurmeschan davart differents products, colurs e furmas, davart differentas metodas da tschentar plattas sco er davart il decurs e la durada da las lavurs. En il sectur administrativ fan els plans da lavur ed uraris, scrivan rapports da lavur e noteschan il consum da material.

Tschentaplattas lavuran bunamain adina en teams. Els enconuschan ils privels sin ils plazzals e protegian sasezs e lur collavuraturs cun resguardar las prescripziuns davart la segirezza da la lavur e la protecziun da la sanadad. Els sa tegnan plinavant vi da las directivas pertutgant protecziun da l’ambient e dismettan materials da construcziun tenor prescripziuns.