Lavurs
Practicists da mecanica gidan a fabritgar utensils, maschinas e tocca da construcziun. Els elavureschan metals e construeschan maschinas ed utensils. Els lavuran en ina gruppa ed exequeschan lavurs simplas a moda autonoma.
Practicistas da mecanica exequeschan incumbensas da l’entschatta fin a la fin. Sco emprim legian ellas ils documents da l’incumbensa e planiseschan ils pass da lavur. Ellas preparan ils utensils e las maschinas necessarias a la plazza da lavur. Ellas fan attenziun ch’ellas resguardian las prescripziuns.
Practicists da mecanica construeschan tocca singula da construcziun or da metals sco atschal, atschal cromà u aluminium. Per part lavuran els er cun vaider u auters materials. Els lavuran a maun e cun maschinas da turnar, fresar, furar e mular. Els storschan, perforan, squadran, lutegian e rebattan. Ultra da quai utiliseschan els maschinas dirigidas dal computer ch’èn programmadas ed endrizzadas da lur superiurs. Els surveglian la producziun conscienziusamain ed examineschan la qualitad da la tocca singula cun agid d’instruments da mesiraziun e da controlla.
Practicistas da mecanica monteschan era utensils e maschinas simplas sco per exempel maschinas da furar. Ellas construeschan tocca singula e furman qua tras in entir che funcziuna. Tar tut quai resguardan ellas las prescripziuns dals documents da montascha e las directivas da lur superiurs. Ultra da quai gidan ellas da reparar e mantegnair tocca da construcziun ed exequeschan las reparaturas ed ils remplazzaments adequats.
Durant lur lavur sa tegnan practicists e practicistas da mecanica adina vi da las prescripziuns: Els èn attents a la segirezza ed a la protecziun da la sanadad e da l’ambient. Els portan per exempel guants ed egliers da segirezza. Els allontaneschan ruments sco ieli vegl, aua da sfradentar u stalizzas da metal a moda professiunala.
Scolaziun
Basa legala
Ordinaziun federala 3-11-2008 (versiun dal 1-1-2018)
Durada
2 onns
Furmaziun en la pratica
En in manaschi da l’industria da maschinas, da l’electroindustria e da l’industria da metal (industria MEM)
Furmaziun en scola
1 di per emna a la scola professiunala
Roms professiunals
- basa tecnica
- tecnica da dissegnar
- tecnica da materials e da fabricaziun
- furmaziun en il rom d'accent (p.ex. turnar, fresar, stanzar, buglir u montar)
Curs ordaifer il manaschi
Emprender ed exercitar a moda pratica la basa professiunala
Diplom
Attest federal professiunal "practicist / practicista da mecanica AFP"
Premissas
Furmaziun preliminara
- scola populara terminada cun pretensiuns da basa
Pretensiuns
- plaschair vi da l’elavuraziun da metal manuala e maschinala
- inschign manual
- enclegientscha tecnica
- lavurar exactamain
- abilitad da lavurar en ina gruppa
- autonomia
- fidadadad
Furmaziun supplementara
Curs
purschidas da scolas professiunalas e scolas spezialisadas superiuras, da la Swissmem e da Swissmechanic
Mecanist / mecanista da producziun AFQ
Practicists da mecanica AFP pon frequentar ina furmaziun da basa scursanida sco mecanist / mecanista da producziun AFQ (entrada al 2. onn da la furmaziun da basa).
Suenter han els las medemas pussaivladads da furmaziun supplementara sco mecanists / mecanistas da producziun AFQ.
Cundiziuns da lavur
Practicists e practicistas da mecanica lavuran cunzunt en manaschis da l’industria da maschinas, da l’electroindustria e da l’industria da metal (industria MEM).
La purschida da plazzas d’emprendissadis è buna. Suenter la scolaziun chattan las bleras practicistas ed ils blers practicists da mecanica ina plazza.
Ulteriuras infurmaziuns
Swissmem Berufsbildung
Brühlbergstr. 4
8400 Winterthur
Tel: +41 52 260 55 00
URL: www.swissmemberufsbildung.ch
URL: tecindustry.ch
Swissmechanic
Dachorganisation
Felsenstr. 6
8570 Weinfelden
Tel: +41 71 626 28 00
URL: www.swissmechanic.ch