?global_aria_skip_link_title?

Practicist / Practicista da construcziun en metal AFP

Practicists e practicistas da construcziun en metal fabritgeschan elements da construcziun da metal, d’atschal, da fanestras e da fatschadas. Els exequeschan simplas lavurs a moda autonoma e sa participeschan a la lavur da montascha.

Lavurs

Practicists e practicistas da construcziun en metal gidan a fabritgar elements da construcziun sco portas, fanestras, vitrinas, verandas d’enviern, stgalas, balcuns, fatschadas e construcziuns en atschal. Els san applitgar las tecnicas principalas da l’elavuraziun da metal ed exequeschan simplas lavurs a moda autonoma.

Avant che practicists da construcziun en metal cumenzan cun la lavur, legian els ils documents tecnics. Tar incumbensas difficilas als explitgan ils superiurs ils singuls pass da lavur ed als gidan en la realisaziun da quels.

En il lavuratori elavureschan els differentas sorts d’atschal ed utiliseschan materia sintetica, materials d’isolaziun e vaider. Practicists da construcziun en metal taglian stangas, bischens e tolas cun fresas e taglieras. A maun, cun utensils e cun maschinas dirigidas da computers dattan els als elements tagliads tras storscher, stanzar, furar e fresar la furma giavischada. Quels elements da construcziun mettan els ensemen cun agid da tecnicas da buglir, struvegiar e collar. Lura adatteschan els ils scharniers, ils marschlos u las stuppadiras minuziusamain.

Sin il plazzal gidan practicists da construcziun en metal a montar ils elements da construcziun en lavur da team.

Practicists da construcziun en metal mantegnan e tgiran ils guaffens e las maschinas. Ultra da quai resguardan els las prescripziuns davart la segirezza da lavur e davart la protecziun da la sanadad e da l’ambient. Els portan per exempel ina protecziun da l’udida ed egliers da protecziun. Ils ruments dismettan els a moda professiunala ed adattada a l’ambient..

Scolaziun

Basa legala

Ordinaziun federala 20.12.2006 (stan dals 1-1-2018)

Durada

2 onns

Furmaziun en la pratica

En in manaschi da l’industria da metal

Furmaziun en scola

1 di per emna a la scola professiunala

Roms professiunals

  • organisaziun da manaschi
  • ambient e segirtad
  • construcziun
  • fabricaziun
  • montascha
  • basa planisatorica

Curs ordaifer il manaschi

Tar differents temas

Diplom

Attest federal professiunal "practicist / practicista da construcziun en metal AFP"

Premissas

Furmaziun preliminara
  • scola populara terminada cun pretensiuns fundamentalas
Pretensiuns
  • chapientscha tecnica (p.ex. per la lavur cun maschinas dirigidas da computers)
  • inschign manual
  • constituziun dal corp ferma e sauna
  • movibladad
  • naginas allergias cunter metals

Furmaziun supplementara

Curs

purschidas da scolas professiunalas, da scolas spezialisadas superiuras sco era da la l’Uniun svizra dal metal SMU.

Construider / Construidra da metal AFQ

Practicists da construcziun en metal AFP pon absolver ina furmaziun da basa scursanida sco construider / construidra en metal cun attestat federal da qualificaziun AFQ (entrada en il 2. onn da la furmaziun da basa).

Suenter èsi pussaivel da frequentar las medemas furmaziuns supplementaras sco construiders / construidras da metal AFQ.

Cundiziuns da lavur

Practicists da construcziun en metal lavuran en firmas da construcziun en atschal e manaschis da la construcziun en metal, en l’industria sco era en firmas spezialisadas en la construcziun da fanestras u da fatschadas.

Ulteriuras infurmaziuns

AM Suisse
Seestr. 105
Postfach
8027 Turitg
Tel: 044 285 77 77
URL: www.metall-und-du.ch



berufsberatung.ch