Start myBerufswahl

Interessen und Stärken - Schritt 1: Ich lerne meine Interessen und Stärken kennen

Berufe und Ausbildungen - Schritt 2: Ich lerne die Berufs- und Ausbildungswelt kennen

Stärken und Anforderungen - Schritt 3: Ich vergleiche meine Stärken mit den Anforderungen der Berufe und Ausbildungen, die mich interessieren

Schnuppern - Schritt 4: Ich schaue mir die interessanten Berufe genauer an

Überprüfen und entscheiden - Schritt 5: Ich überprüfe die möglichen Berufe oder Schulen und entscheide mich

Lehrstelle finden – Schule anmelden - Schritt 6: Ich setze meine Entscheidung um, suche eine Lehrstelle oder melde mich bei einer Schule an

Vorbereiten auf die Zukunft - Schritt 7: Ich bereite mich auf die Lehre oder die Mittelschule vor oder ich kläre ein Brückenangebot ab

Arbeitsmappe - Deine Ergebnisse

Einen Moment bitte...

myBerufswahl wird geladen.

Abgemeldet

Ihre Login-Session ist abgelaufen. Sie werden auf die Startseite weitergeleitet. Bitte melden Sie sich erneut an, um Ihr Login fortzusetzen.

Spezialist / Spezialista da tgira AFQ

Spezialists e spezialistas da tgira sustegnan uffants, giuvenils, persunas attempadas e persunas cun impediments en lur mintgadi ed en lur temp liber. Els promovan e mantegnan lur independenza uschè bain sco pussaivel.

Lavurs

Spezialists e spezialistas da tgira lavuran per uffants en instituziuns cumplementaras a la famiglia ed a la scola, per carstgauns cun impediments en gruppas d'abitar e centers dal di, sco er per persunas attempadas en purschidas da sustegniment staziunaras u ambulantas. Els accumpognan las persunas en differentas situaziuns dal mintgadi, gidan els da sa vestgir e da sa trair ora, da sa lavar, da lavar ils dents, da mangiar e baiver sco era dad exequir lavurs dal tegnairchasa.

Spezialistas u spezialists da tgira structureschan il mintgadi ed accumpognan la convivenza en la gruppa. Els procuran per relaziuns professiunalas cun las persunas las qualas els assistan. Els lavuran el team,  cun confamigliars ed ulteriuras persunas d'ordaifer. Spezialistas e spezialist da tgira preparan activitads, las exequeschan e las evalueschan.  Tar lur lavur integreschan els d'in cuntin las abilitads e las pussaivladads da las persunas assistidas.

En la tgira da persunas impedidas u attempadas giogan las restricziuns mentalas, psichicas e/u corporalas ina rolla. Spezialistas da tgira en quellas duas direcziuns da spezialisaziun enconuschan ils basegns spezials dals pertutgads. Ellas als accumpognan e promovan tant sco pussaivel. Era en situaziuns difficilas sco tar disturbis da la persunalitad u da la percepziun, tar malsogna u tar la mort dals assistids reageschan ellas a moda professiunala.

Il svilup cumplessiv dals uffants è central en il sectur da la tgira d’uffants. Latiers tutgan las capacitads linguisticas, mentalas e motoricas, il cumportament social e la persunalitad. Spezialistas da tgira organiseschan il mintgadi tenor la vegliadetgna dals uffants e tenor la situaziun cun parts manadas e parts da gieu liber, cun activitads individualas u en gruppa. Ellas permettan als uffants da far experientschas variantas, da sa sviluppar individualmain ed il medem mument da s’arranschar en ina gruppa.

Scolaziun

Basa legala

Ordinaziun federala 16-6-2005 (stadi dal 1-1-2018)

Durada

3 onns, per creschids è ina furmaziun scursanida pussaivla

Direcziuns

  • uffants
  • persunas cun impediments
  • persunas attempadas
  • furmaziun generala

Furmaziun en la pratica

En in manaschi da la direcziun tschernida

Furmaziun en scola

Per ordinari 1½ dis per emna a la scola professiunala, tut tenor chantun differentas direcziuns: la glista da scolas è da retrair tar SAVOIRSOCIAL

Roms professiunals

Tar las differentas cumpetenzas d'agir tutgan tranter auter accumpagnar en  il mintgadi, pussibilitar l'atgna autonomia e participaziun u acziun en situaziuns d'accumpagnament specificas.

Curs ordaifer il manaschi

Tar differents temas

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant u suenter la furmaziun da basa.

Diplom

Attestat federal da qualificaziun "spezialist / spezialista da tgira AFQ"

Premissas

Furmaziun preliminara
  • scola populara terminada cun pretensiuns mesaunas u autas

Per creschids dat èsi pussaivel d'absolver la furmaziun da basa scursanida. Per infurmaziuns detagliadas pon  ins s'infurmar tar l'uffizi per  la furmaziun professiunala dal chantun.
Avis areguard praticums independents avant il cumenzament dal emprendissadi:
La furmaziun da basa professiunala po vegnir cumenzada directamain suenter la finiziun dil temps da scola obligatoric. Tenor la lescha federala davart la furmaziun professiunala na basegna i betg in praticum independent.

Pretensiuns
  • plaschair vi dal contact cun carstgauns
  • stabilitad psichica ed abilitad da supportar squitsch
  • buna constituziun corporala
  • ferm senn da responsabladad
  • empatia e prontadad da gidar
  • pazienza e respect
  • buna demananza, abilitad da lavurar en in team, da schliar conflicts e da communitgar
  • avertadad
  • abilitad d’organisar
  • abilitad da sa distanziar
  • senn per igiena ed urden
  • dun d’observaziun e sperta reacziun
  • flexibilitad: prontadad per temps da lavur irregulars, abilitad da reagir en situaziuns variablas

Furmaziun supplementara

Curs

purschidas d’associaziuns professiunalas e da scolas autas e spezialisadas

Qualificaziun supplementara

p.ex. manader / manadra d’ina canorta d’uffants pitschens

Examen professiunal (EP)

Cun certificat professiunal federal: accumpagnader social / accumpagnadra sociala,  manader / manadra da team en instituziuns socialas e social medicinalas, spezialist / spezialista da migraziun, spezialist / spezialista  per tgira da lunga durada ed accumpagnament, spezialist / spezialista per l'accumpagnament da persunas impedidas, accumpagnader socioprofessiunal / accumpagnadra socioprofessiunala , Job Coach, spezialist / spezialista per tgira psichiatrica ed accumpagnament

Examen professiunal superiur (EPS)

p. ex. manader d’instituziuns diplomà / manadra d’instituziuns diplomada en il sectur social e social medicinal, Supervisur /a - Coach, cussegliader / cussegliadra d'organisaziun

Scola spezialisada superiura (SSS)

spezialist d’activaziun diplomà / spezialista d’activaziun diplomada SSS, pedagog social diplomà / pedagoga sociala diplomada SSS, educatur d’uffants diplomà  / educatura d’uffants diplomada SSS, manader sociopedagogic da lavuratoris / manadra sociopedagogica da lavuratoris cun diplom SSS (furmaziun en la Svizra franzosa), animatur da communitads diplomà / animatura da communitads diplomada SSS.

Scola auta spezialisada (SAS)

p.ex. Bachelor of Arts/Science (SAS) da lavur sociala (cun approfundaziun en in dals secturs suandants: lavur sociala, pedagogia sociala u animaziun socioculturala), Bachelor of Science (SAS) da psicologia applitgada, Bachelor of Science (SAS) d’ergoterapia.

Cundiziuns da lavur

Spezialistas da tgira èn occupadas en differents lieus: en instituziuns cumplementaras a la famiglia ed a la scola per uffants, en purschidas d'abitar e centers dal di per carstgauns cun impediments e persunas attempadas.

Il temp da lavur po esser irregular ed includer engaschis durant la notg u durant la fin d’emna.

La purschida da plazzas d’emprendissadi variescha tenor direcziun da furmaziun e tenor regiun. Cunzunt en il sectur da la tgira d’uffants dovri grond engaschi durant la tschertga da plazzas d’emprendissadi, cunquai che la dumonda è pli gronda che la purschida.

Ulteriuras infurmaziuns

SAVOIRSOCIAL
URL: www.savoirsocial.ch





berufsberatung.ch