![[object Object],[object Object]](https://media.sdbb.ch/transform/f9b06111-503f-48e6-9bc9-f9d50d502319/15_Zeichner_IK-jpg?io=transform:fill,width:740,height:490)
1. onn d’emprendissadi: CHF 630.–
2. onn d’emprendissadi: CHF 790.–
3. onn d’emprendissadi: CHF 1000.–
4. onn d’emprendissadi: CHF 1320.–
Sco dissegnadra u dissegnader fas ti dissegns tecnics per projects da la planisaziun dal territori e da construcziun. En quest connex lavuras ti tenor las prescripziuns d'architectas e planisaders dal territori. Ti sviluppas, elavuras e concepeschas documents da planisaziun. Tut tenor il sectur professiunal ta spezialiseschas ti sin architectura, inschigneria, architectura d'interiurs, architectura da cuntradas u planisaziun dal territori.
Incumbensas
- architectura: far plans d'edifizis, p.ex. da chasas d'abitar, da centers da cumpra, d'edifizis da biro u d'edifizis d'industria
- inschigneria: far plans d'ovras da construcziun u da vias da traffic, p.ex. da punts, tunnels, vias u stgalas
- architectura d'interiurs: elavurar plans per projects d'engrondiment e da renovaziun da locals interns, p.ex. d'abitaziuns, da locals da negozi u da stans da fiera
- architectura da cuntradas: far plans per zonas verdas e per cuntradas ed integrar en quest connex enconuschientschas da plantas, p.ex. en il sectur d'abitar e da lavur, en il turissem u en la protecziun da la natira
- planisaziun dal territori: gidar a concepir il svilup dals abitadis e la mobilitad per quartiers, citads u entiras regiuns
- far plans e models digitals per projects da construcziun cun uschenumnads programs da CAD al computer
- scriver las ideas, ils sbozs u ils detagls da construcziun sin palpiri u in tablet
- en cas da basegn far mesiraziuns al lieu, p.ex. distanzas u autezzas
- scriver descripziuns da projects e far uraris
- far calculaziuns per parts dal project, en quest connex resguardar las caracteristicas dals materials sco er las prescripziuns dal dretg da construcziun
- resguardar la moda da construir ecologica en connex cun la planisaziun
- communitgar e preschentar soluziuns elavuradas, sche necessari far adattaziuns
- controllar, sche las lavurs sin il plazzal sa sviluppan en moda planisada e sch'il material vegn furnì ad ura
- realisar incumbensas administrativas, p.ex. far offertas e scriver rapports
Ambient da lavur
Sco dissegnadra u dissegnader lavuras ti tant en biro sco er sin plazzals. Tut tenor il gener e la grondezza dal manaschi ta participeschas ti a tscherts projects dal cumenzament fin la fin u es mo responsabla u responsabel per parts da tals. Ils temps da lavur èn da princip regulars.
Tenor tia direcziun professiunala lavuras ti en in biro d'architectura, d'inschigneria da construcziun u da planisaziun u en in uffizi da construcziun d'ina vischnanca. Tut tenor la direcziun professiunala èsi pli difficil da chattar ina plazza d'emprendissadi. Suenter la scolaziun has ti bunas schanzas sin il martgà da lavur. Las perspectivas professiunalas dependan fermamain dal svilup en ils fatgs da construcziun. Cun furmaziuns supplementaras e cun experientscha professiunala correspundenta pos ti manar projects e surpigliar incumbensas directivas.
Pretensiuns e interess
- Imaginaziun tridimensiunala
- Moda da lavurar conscienziusa ed exacta
- Pensar abstract e logic
- Talent da dissegnar
- Abilitad da planisar e d'organisar
- Chapientscha tecnica
- Senn per estetica
- Abilitad da communitgar
- Planisar, construir, far dissegn tecnic
- Lavurar al computer
- Schliar incumbensas tecnicas
- Lavurar cun cifras
Scolaziun
Furmaziun pratica en in manaschi dal sectur professiunal correspundent, p.ex. en in biro d'architectura u d'inschigneria: 3 fin 4 dis per emna
En il sectur professiunal architectura da cuntradas absolvan las emprendistas ed ils emprendists supplementarmain in praticum da plazzal da 3 fin 5 mais. En il sectur professiunal architectura, inschigneria ed architectura d'interiurs absolvan las emprendistas ed ils emprendists supplementarmain in praticum da plazzal da 2 emnas.
1 fin 2 dis per emna a las scolas professiunalas spezialisadas chantunalas u sco instrucziun en bloc, tut tenor il chantun ed il sectur professiunal tschernì.
Curs intermanaschials en blers chantuns: 15 fin 20 dis durant 4 onns
4 onns
- Architectura
- Inschigneria
- Architectura d'interiurs
- Architectura da cuntradas
- Planisaziun dal territori
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Dissegnader / Dissegnadra AFQ cun indicaziun dal sectur professiunal
Furmaziun cuntinuonta
Examen professiunal (EP)
- Tecnicist / Tecnicista da geomatica EP
Examen professiunal superiur (EPS)
- Manader / Manadra da construcziun EPS
- Expert / Experta per la construcziun sauna e persistenta EPS
Scola spezialisada superiura (SSS)
- Tecnicist / Tecnicista SSS planisaziun da construcziun
Scola auta spezialisada (SAS)
- Bachelor of science en inschigneria da construcziun
Tut tenor la scola auta spezialisada valan differentas cundiziuns d'admissiun.
Professiuns sumegliantas
