![[object Object],[object Object]](https://media.sdbb.ch/transform/94f29495-7829-4923-b7e0-8bc353e191a8/Geomatitien-BG-015-jpg?io=transform:fill,width:740,height:490)
Sco geomaticra u geomaticher mesiras ti bains immobigliars, edifizis e terren. Ti cusseglias la clientella davart disposiziuns giuridicas e tecnicas. Per mintga incumbensa tschernas ti la metoda da mesiraziun adattada. Ti procuras che las datas da mesiraziun restian exactas ed actualas e dovras quellas en plans, chartas, sistems d'infurmaziun geografica e models tridimensiunals.
Incumbensas
- tadlar ils giavischs da la clientella e la cussegliar davart dumondas giuridicas, tecnicas u economicas
- planisar incumbensas, p.ex. far plans da lavur e documentar las activitads exequidas
- selecziunar metodas da mesirar ed apparats da mesirar ch'èn adattads per il terren, p.ex. scanners da laser mobils, dronas u apparats da nivellaziun per determinar differenzas d'autezza
- integrar en moda structurada las datas en sistems d'infurmaziun geografica (SIG) ed identifitgar, co che las datas dependan ina da l'autra
- interpretar ils resultats dal SIG per survegnir infurmaziuns per tschertas incumbensas, p.ex. per allontanar u per stimar pendenzas da la spunda
- garantir che las datas sajan correctas ed actualas e che las prescripziuns legalas vegnian observadas
- crear models 3D per projects cun programs da computer, p.ex. per plantar guaud en in territori u per construir quartiers u vias
- crear e tgirar bancas da datas e formatar quellas en moda adattada per computers e smartphones
- far sbozs da models da terren, chartas geograficas cun lingias d'autezza u models digitals da citads
- programmar scripts, p.ex. per retrair automaticamain infurmaziuns da datotecas, reunir datas u las transfurmar
- utilisar il SIG per cumbinar u per preschentar datas, p.ex. tut las datas da mesiraziun d'in tschert territori, ch'èn pli veglias che 50 onns
- mesirar ils cunfins dal bain immobigliar e marcar cun segns da cunfin, p.ex. per evitar dispitas tranter vischins
- marcar en la cuntrada il lieu exact per ina construcziun futura sco in edifizi u ina via
- infurmar la clientella davart differents segns da cunfin sco craps da cunfin da granit u bulluns da mesch
- documentar il segn da cunfin cun skizzas e rapports
Ambient da lavur
Sco geomaticra u geomaticher lavuras ti en il liber per far registraziuns dal terren e per rimnar datas. En il biro administreschas ti las datas al computer e fas plans e chartas tematicas.
Ti chattas pussaivladads professiunalas en biros d'inschigneria, l'administraziun publica, interpresas da construcziun, la telecommunicaziun e servetschs industrials.
Pretensiuns e interess
- Imaginaziun tridimensiunala
- Dun per cifras
- Pensar abstract e logic
- Talent da dissegnar
- Moda da lavurar conscienziusa ed exacta
- Buna vesida
- Abilitad da lavurar en in team
- Lavurar en moda exacta
- Lavurar cun cifras
- Planisar, construir, far dissegn tecnic
- Lavurar al computer
- Lavurar en il liber
Scolaziun
Furmaziun pratica en in biro d'inschigneria, sin la vischnanca, tar il chantun u tar in'ovra electrica u d'aua.
Curs da bloc dad 8 fin 12 emnas per onn a la Scola professiunala artisanala da construcziun da Turitg BBZ
Curs intermanaschials en blers chantuns: 20 dis durant 4 onns
4 onns
- Geoinfurmaziun
- Mesiraziun
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Geomaticher / Geomaticra AFQ
Furmaziun cuntinuonta
Curs
Purschidas dal center da furmaziun Geomatica Svizra
Examen professiunal (EP)
- Tecnicist / Tecnicista da geomatica EP
Scola spezialisada superiura (SSS)
- Tecnicist / Tecnicista SSS Planisaziun da construcziun
Scola auta spezialisada (SAS)
- Bachelor of science en geomatica
Tut tenor la scola auta spezialisada valan differentas cundiziuns d'admissiun.
Professiuns sumegliantas
