![[object Object],[object Object]](https://media.sdbb.ch/transform/d78df281-1976-4b5a-8440-d95bd3b4fb8a/papiertechnologe-af-0319-jpg?io=transform:fill,width:740,height:490)
1. onn d’emprendissadi: CHF 750–800.–
2. onn d’emprendissadi: CHF 950–1040.–
3. onn d’emprendissadi: CHF 1300.–
4. onn d’emprendissadi: CHF 1400.–
Tecnologas e tecnologs da palpiri AFQ produceschan palpiri e chartun a moda industriala. Els dirigian las maschinas basadas sin computers, surveglian la producziun, controlleschan la qualitad e mantegnan ils indrizs.
Incumbensas
- calcular las quantitads necessarias da la materia prima ed auxiliara che tutga tar la producziun da mintga palpiri e chartun che vegn producì
- preparar las materias primas per l’elavuraziun
- producir ina maschaida bletscha da cellulosa, materia auxiliara ed aua che vegn numnada en il linguatg professiunal buglia da fibras
- svidar la buglia da fibras en la maschina da palpiri, nua ch’il material vegn crivlà, smatgà, sientà e silsuenter zuglià sin grondas rollas
- examinar en il labor ch’il palpiri u il chartun saja suffizientamain resistent u haja la spessezza necessaria
- gulivar e meglierar la surfatscha u cuvrir ella cun ina surtratga
- tagliar las rollas da palpiri en formats pli pratics ed las emballar
- nettegiar las maschinas cun nettegiaders a pressiun auta e las endrizzar per la proxima producziun
- survegliar ils pass da lavur en la producziun ed eliminar immediat eventuals disturbis
- leger giu las datas mesiradas e las nudar en ils protocols
- dismetter il material che vanza a moda adattada a l'ambient
Ambient da lavur
Tecnologs da palpiri lavuran en fabricas da palpiri e da chartun, però er en manaschis da furniziun sco per exempel en l’industria da chemia, da fieuter e da recicladi. Ultra da quai pon els vegnir engaschads da producents da maschinas da palpiri. Per gronda part vegn producì da di e da notg durant set dis l'emna. Perquai fan tecnologs da palpiri lavur da squadra. La purschida da plazzas d’emprendissadi è gronda.
Pretensiuns e interess
- Abilitad da s'adattar a novas tecnologias
- Abilitad da lavurar en in team
- Gronda toleranza da canera
- Moda da lavurar sistematica
- Chapientscha tecnica
- Resistenza corporala
- Inschign manual
- Senn per igiena e per nettezza
- Schliar incumbensas tecnicas
- Lavurar cun taila, tgirom e palpiri
- Lavurar cun maschinas
Scolaziun
En ina fabrica da palpiri u da chartun en Svizra.
2-3 blocs d’instrucziun da 4 fin 8 emnas en il Center da palpiri a Gernsbach, Germania. Ils custs per il viadi e l'alloschi surpiglia il manaschi d’emprendissadi.
3 onns
Temp da scola obligatoric terminà
Fitg bunas prestaziuns da scola permettan da frequentar durant u suenter la furmaziun fundamentala ils curs da la scola professiunala a Gernsbach, Germania. Il certificat è la premissa per pudair frequentar furmaziuns supplementaras a l’exteriur vischin.
- Tecnolog / Tecnologa da palpiri AFQ
- Certificat d’examen tudestg Tecnolog / Tecnologa da palpiri
Furmaziun cuntinuonta
Curs
Purschidas da l’agen manaschi sco era purschidas dal Center da palpiri a Gernsbach, Germania, u dal Center da furmaziun Steyrermühl, Austria.
En Svizra na datti nagina furmaziun supplementara per tecnica da palpiri. Numerusas pussaivladads datti dentant sin champs parentads sco la stampa, l'emballadi, la chemia, la gestiun, euv.
Furmaziuns supplementaras a l'exteriur
- Maister / maistra d’industria direcziun elavuraziun da palpiri, producziun da palpiri u elavuraziun da materia sintetica al Center da palpiri a Gernsbach, Germania
- Tecnicist / tecnicista direcziun tecnica da palpiri en diversas scolas spezialisadas superiuras (SSS) en la Germania ed en l’Austria
- Inschigner diplomà / inschignera diplomada en tecnica da proceder cun approfundaziun en tecnica da palpiri a l’Universitad tecnica da Dresden
- Bachelor en tecnica da palpiri e proceder a la Scola auta spezialisada per scienzas applitgadas a Minca resp. a l’Universitad tecnica da Graz
Professiuns sumegliantas
