Tecnologa da materias sinteticas AFQ
Tecnolog da materias sinteticas AFQ
![[object Object],[object Object]](https://media.sdbb.ch/transform/c64b312d-d552-49ab-b598-f8fc76ef3bc7/kunsstofftechnologe_m_m_4894-jpg?io=transform:fill,width:740,height:490)
1. onn d’emprendissadi: CHF 650.–
2. onn d’emprendissadi: CHF 830.–
3. onn d’emprendissadi: CHF 1100.–
4. onn d’emprendissadi: CHF 1300.–
Tecnologs e tecnologas da materias sinteticas fabritgeschan products sintetics. Els planiseschan e controlleschan process da producziun, sviluppeschan applicaziuns ch’èn orientadas a la clientella e procuran per il mantegniment e la tgira da maschinas, indrizs ed utensils.
Incumbensas
- fabritgar or da differentas sorts da materia sintetica differents products sco artitgels medicinals, apparats per il tegnairchasa, emballadis u cumponentas per l'industria d'autos, da maschinas u da l'aviatica
- producir ils products da materia sintetica a maun u cun agid da proceduras automatisadas, per exempel cun metodas da squitschar 3D, stritgar e sprizzar, laminar, buglir, elavurar a moda termica resp. mecanica
- esser responsabel per la qualitad dals products e per ina producziun senza incaps
- planisar differentas chaussas avant la fabricaziun dals products da materia sintetica: per exempel la construcziun d l'artitgel, co quel vegn fabritgads u tge material ch'è adattà il meglier
- lavurar cun auters teams durant la planisaziun, per exempel cun la construcziun, la vendita u il magasin
- endrizzar indrizs da high-tech per pudair cumenzar cun la producziun: per exempel installar apparats supplementars, programmar maschinas, preparar il material
- prender mesiras per eliminar disturbis e mancanzas sche necessari, megliurar la qualitad u optimar las maschinas
- mantegnair las maschinas ed ils indrizs e far quità latiers dals products da materia sintetica e las maschinas savens charas
- discurrer ensemen cun la clientella davart soluziuns u dumondas spezialas e tschertgar schliaziuns
Ambient da lavur
Tecnologs e tecnologas da materias sinteticas lavuran en manaschis industrials ch'elavuran materia sintetica, davent da manaschis pitschens fin concerns ch'èn activs sin palancà internaziunal.
En lur mintgadi da lavur stattan els en contact cun gruppas da differents interess. Els survegnan incaricas da manaders interns da project e lavuran savens en in team. En fatschenta communitgeschan els ultra da quai cun responsabels en la sparta da la fabricaziun d'utensils, da la direcziun da la producziun ,d'engineering, da l'automatisaziun, da la logistica u da la preparaziun da la lavur. Ordaifer la firma discurran els cun furniturs, cun tecnicists da servetsch e cun clientella.
Sco spezialists èn els dumandads sin il martgà da lavur.
Pretensiuns e interess
- Inschign manual
- Gronda toleranza da canera
- Savair supportar odurs dischagreablas
- Moda da lavurar conscienziusa ed exacta
- Moda da lavurar sistematica
- Abilitad da lavurar en in team
- Abilitad da s'adattar a novas tecnologias
- Imaginaziun tridimensiunala
- Lavurar cun maschinas
- Schliar incumbensas tecnicas
Scolaziun
En in manaschi da l’industria ch’elavurescha materia sintetica.
En ils imprems 1.5 onns da l'emprendissadi 2 dis, suenter 1 di per emna a las scolas professiunalas
Emprender ed exercitar la basa professiunala, 37 dis durant 4 onns.
4 onns
Temp da scola obligatoric terminà
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Tecnolog / Tecnologa da materias sinteticas AFQ
Furmaziun cuntinuonta
Curs
Purschidas d’associaziuns professiunalas, da scolas spezialisadas e professiunalas
Examen professiunal (EP)
Cun certificat professiunal federal: spezialista da process, spezialist d’automatica, commerzianta tecnica
Scola spezialisada superiura (SSS)
Tecnicist dipl. SSS direcziun construcziun da maschinas (approfundaziun en tecnica da materias sinteticas u tecnica da producziun), tecnicista dipl. SSS direcziun process d’interpresas (approfundaziun en tecnica da manaschi), tecnicist dipl. SSS direcziun tecnica da sistems (approfundaziun en mecatronica)
Scola auta spezialisada (SAS)
Bachelor of Science (SAS) en chemia, Bachelor of Science (SAS) en tecnica da maschinas, Bachelor of Science (SAS) en tecnica da sistems. Tut tenor scola auta spezialisada valan differentas cundiziuns d'admissiun.
Professiuns sumegliantas
