Tecnologa da medias AFQ
Tecnolog da medias AFQ

Tecnologs da medias creeschan products sin il sectur da print e medias digitalas: gasettas, revistas, prospects, flyers u placats. Stampar palpiri, chartun, folias ed autras materialias è lur lavur principala.

Tecnologas da medias surpiglian incumbensas da clients, planiseschan la producziun e coordineschan las lavurs. Quai fan els tant cun las partiziuns che surdattan u surprendan il product sco la fasa da stampa preliminara e l'evaluaziun ulteriura sco cun furniturs e partenaris da spediziun.

Tecnologs da medias surveglian, elavuran ed optimeschan las datas da stampa. Uschè segireschan els in resultat da squitsch optimal. Els endrizzan las maschinas ed ils sistems da squitsch ed exequeschan tut las lavurs da preparaziun.

Tecnologas da medias surveglian il process da squitsch e prendan las dretgas mesiras tar interrupziuns u disturbis. Simplas elavuraziuns ulteriuras exequeschan ils tecnologs da medias gest uschè independentamain sco incumbensas da spediziun.

Tut tenor direcziun as differenzieschan las structuras da manaschi, las tecnologias da squitsch ed ils products: Tecnologs da medias da la direcziun print applitgeschan differentas tecnologias da squitsch en ils manaschis artisanals u industrials. Per il solit lavuran als cun gronds e cumplex sistems da squitsch da la stampa da offset u da la stampa digitala. Els surveglian il process da squitsch, controlleschan la qualitad cun tecnicas da mesirar ed interprendan optimaziuns. Savens èn els occupads en lavur en squadras.

En la direcziun tecnica da medias stampadas elavuran tecnologas da medias incumbensas da squitsch digital en grond u pitschen format. Els accumpognan las incumbensas da squitsch dal discurs cun il client, preparan las datas da squitsch e furneschan ils products finals. Sin giavisch persunaliseschan els las datas da squitsch u creeschan layouts tenor directivas da coporate-design.

Sco spezialists per incumbensas spezialas da squitsch stampan tecnologs da medias da la direcziun serigrafia differents materials. Els èn ils artisans sin il sectur da squitsch e maschaidan a maun las colurs. Els lavuran en manaschis artisanals ed industrials.