Practicista d'indrizs da ventilaziun AFP
Practicist d'indrizs da ventilaziun AFP
![[object Object],[object Object]](https://media.sdbb.ch/transform/48cf5065-76ec-4867-b811-4f1ea6eacd24/aide_instal_ventil_RS_116?io=transform:fill,width:740,height:490)
1. onn d’emprendissadi: CHF 700.–
2. onn d’emprendissadi: CHF 900.–
Sco practicista u practicist da ventilaziuns gidas ti ad installar ed a demontar indrizs da ventilaziun per edifizis privats u publics. Ti preparas tias lavurs e construeschas en il lavuratori tocs che ti pos montar sin il plazzal.
Incumbensas
- prender encunter e chapir las incumbensas
- guardar, ch'il material, las maschinas ed ils utensils sajan pronts, p.ex. colliar las maschinas en moda segira cun l'electricitad
- controllar las parts furnidas, p.ex. guardar, sche la furniziun è cumpletta e che nagut na saja rut
- far skizzas da conducts da ventilaziun
- gidar a fabritgar elements da construcziun sco tocs furmads, conducts da ventilaziun u surdinas
- calcular, tge furma e tge grondezza che las parts da tola ston avair
- tagliar las parts da tola e las storscher en la dretga furma, manevrar las maschinas d'urdains che vegnan regladas per computer, uschenumnadas maschinas CNC u NC
- controllar e cumponer tocs furmads e conducts da ventilaziun
- gidar a fabritgar roms per surdinas e material d'isolaziun, p.ex. tagliar launa minerala
- sortir e dismetter correctamain differents ruments, observar las prescripziuns da l'ambient
- guardar – ensemen cun la persuna superiura – sin il plan, nua ch'ils elements da construcziun ston vegnir montads
- gidar a montar ils elements da construcziun ed ad installar sistems da ventilaziun
- isolar perforaziuns da paraids e da palantschieus sura, quai vul dir plazzar material d'isolaziun en las chavas per ils conducts
- gidar ad installar currents d'aria, quai èn averturas, tras las qualas aria vegn suflada en il local
- demontar en il team ventilaziuns veglias
Ambient da lavur
Sco practicista u practicist da ventilaziuns lavuras ti en teams cun constructuras e constructurs da ventilaziuns che ta dattan incumbensas. Tias incumbensas exequeschas ti en il lavuratori u sin il plazzal. En quest connex poi per part esser dad aut. Ti portas ina chapellina, guants, chalzers da segirezza, protecziun d'udida ed egliers da protecziun. Tes temps da lavur èn regulars, ma mintgatant stos ti lavurar pli ditg, per observar ils termins.
Ti lavuras en manaschis pitschens u mesauns per installaziuns da ventilaziuns, per tecnica da ventilaziun e da clima u en manaschis da stgaudament, da ventilaziun e sanitars. Per regla n'èsi betg difficil da chattar ina plazza d'emprendissadi. Suenter l'emprendissadi has ti differentas pussaivladads per ta perfecziunar, p.ex. en il sectur da l'effizienza energetica che daventa adina pli impurtanta en la branscha da construcziun.
Pretensiuns e interess
- Inschign manual
- Chapientscha tecnica
- Imaginaziun tridimensiunala
- Resistenza corporala
- Gronda toleranza da canera
- Moda da lavurar sistematica
- Prontezza d'esser savens sin viadi
- Abilitad da lavurar en in team
- Elavurar metal
- Lavurar cun ils mauns
- Esser corporalmain activ
Scolaziun
Furmaziun pratica en in manaschi per installaziuns da ventilaziuns: 4 dis per emna
1 di per emna en las scolas professiunalas spezialisadas chantunalas
En plirs chantuns: 21 dis durant 2 onns
2 onns
Terminà la scola obligatorica
Practicist / Practicista d'indrizs da ventilaziun AFP
Furmaziun cuntinuonta
Curs
Curs da l'associaziun suissetec
Emprendissadi supplementar
Practicistas e practicists da ventilaziuns AFP pon per regla far in emprendissadi supplementar scursanì sco constructura u constructur da ventilaziuns AFQ.
Suenter pon vegnir absolvidas las medemas furmaziuns supplementaras sco per constructura u constructur da ventilaziuns AFQ.
Professiuns sumegliantas
