Zum Titel springen

Vaidrer / Vaidrera AFQ

Vaidreras e vaidrers elavuran, monteschan e reparan elements da vaider en e vid edifizis: per exempel fanestras, fatschadas, ischs da vaider, tetgs da vaider, duschas, vitrinas u verandas. Els elavuran differentas sorts da vaider ed installeschan endrizzaments sco ischs da stuschar, paraids da spievels, ischs da vaider ed aquaris.

Lavurs

Els exequeschan suandantas lavurs:

Preparaziun da las lavurs
  • studegiar plans, dissegns ed indicaziun da las architectas
  • examinar e respunder dumondas da possessurs e possessuras da chasas
  • cussegliar la clientella areguard las sorts da vaider e mussar models
  • mesirar ils elements che vegnan envaidrads, far sbozs, calcular ils materials necessaris e far offertas
  • retschaiver grondas lastras da vaider e las controllar sin sbagls da producziun
  • tagliar, furar e furmar differentas spezias da vaider per fanestras, ischs da vaider, vitrinas, mantelladas da fatschada, spievels sco e vaider segir cunter ballas cun agid da maschinas
  • transportar e magasinar a moda segira parts da vaider, organisar la spediziun a la clientella
  • elavurar il spievel, per exempel per spievels decorativs u vid portas da stgaffas e surfatschas da maisas
Montascha e reparaturas
  • montar il vaider en roms da fanestras u portas e las isolar cun chit u isolaziun per garantir la stabilitad e l’impermeabladad da l’edifizi
  • montar spezialas installaziuns ch’èn cumplettamain da vaider: per exempel vitrinas, vaider da segirezza per spurtegl u paraids d’ascensurs
  • montar serradiras u fallas
  • remplazzar tocca da vaider rutta en il lavuratori u sin il plazzal
  • allontanar e dismetter scalgias da vaider a moda ecologica, nettegiar il plaz da lavur

Scolaziun

Durada

4 onns

Furmaziun en la pratica

En in manaschi da vaider

Furmaziun en scola

1 di l'emna a la scola professiunala ad Olten

Roms professiunals

  • Elavuraziun da vaider e d’objects da vaider
  • concepziun d’objects da vaider e lur utilisaziun
  • enconuschientschas dals materials
  • quints dal rom
  • enconuschientschas da basa en fisica e chemia
  • dissegn e skizzar

Curs ordaifer il manaschi

Emprender ed exercitar en la pratica las basas professiunalas.28-32 dis durant 4 onns

Maturitad professiunala

Fitg bunas prestaziuns da scola permettan da frequentar la scola da maturitad professiunala durant la furmaziun da basa.

Diplom

Attestat federal da qualificaziun "vaidrer / vaidrera AFQ"

Premissas

Furmaziun preliminara
  • temp da scola obligatoric terminà
Pretensiuns
  • inschign manual
  • enclegientscha pratica
  • interess tecnic
  • senn da visualisaziun spaziala
  • buna cundiziun fisica
  • abilitad da lavurar en ina gruppa

Furmaziun supplementara

Curs

purschidas da scolas spezialisadas e professiunalas sco era d’associaziuns professiunalas, particularmain da l'Associaziun svizra dal vaider plat SFV u da l'Institut svizzer dal vaider en la construcziun SIGAB

Examen professiunal (EP)

schef / scheffa dal lavuratori e da la montascha (vaider) cun certificat professiunal federal, manader / manadra da project (vaider) cun certificat professiunal federal

Examen professiunal superiur (EPS)

maister / maistra da vaidraria

Scola spezialisada superiura (SSS)

curs da furmaziun e secturs parentads, p.ex. tecnicist diplomà SSS construcziun da metal u tecnicista diplomada SSS planisaziun da construcziun

Scola auta spezialisada (SAS)

direcziun da studi en secturs parentads, p.ex. Bachelor of Science (SAS) en inschigneria da construcziun. Tut tenor scola auta spezialisada valan differentas cundiziuns d’admissiun

Cundiziuns da lavur

Vaidrers lavuran en manaschis da vaider pli gronds u pli pitschens en collavuraziun cun mastergnants, patruns da chasas ed architectas. Els auzan e muventan paisas grevas e rumpaivlas. La glieud professiunala è savens sin viadi e lavur sin plazzals, era da nausch’aura. Lur temps da lavur è per il solit regulars, i po dentant era dar fasas intensivas cun gronda chargia da lavur.

Vaidrers e vaidreras èn persunas dal fatg tschertgadas. Cun experientscha correspundenta pon els sa spezialisar sin tschertas spartas, per exempel sin l’energia solara u segirezza sco er surpigliar responsabladad da manaders u sa far independents.

Ulteriuras infurmaziuns

Associaziun svizra dal vaider plat SFV
Schweizerischer Flachglasverband SFV
8952 Schlieren
Tel: +41 755 50 40
URL: www.sfv-asvp.ch

Schweizer Institut für Glas am Bau SIGAB
8952 Schlieren
URL: www.sigab.ch



berufsberatung.ch