![[object Object],[object Object]](https://media.sdbb.ch/transform/2cef8d96-c956-43e8-b223-6a6e59c56654/Metalcostruttore-JI-047?io=transform:fill,width:740,height:490)
1. onn d’emprendissadi: CHF 750.–
2. onn d’emprendissadi: CHF 1000.–
3. onn d’emprendissadi: CHF 1200.–
4. onn d’emprendissadi: CHF 1500.–
Constructuras e constructurs da metal produceschan e monteschan las parts da metal d'edifizis. Da quai fan part faschadas, puntanadas da metal, fanestras, portas, spundas, stgalas u saivs. Els elavuran elements sin mesira e monteschan quels sin il plazzal. Ultra da quai reparan els lavurs da metal artisticas donnegiadas.
Incumbensas
- s'infurmar, tgeninas ch'èn las pretensiuns a las parts da metal, per exempel giatters da fanestras, portas, passamauns, stgalas, spundas u punts
- sa barattar cun spezialistas e spezialists, sco per exempel inschigneras, architects ed electricistas, ed analisar il lieu da construcziun, tranter auter ses access e ses sutterren
- far mesiraziuns exactas cun lasers
- far skizzas a maun u al computer
- leger il plan da construcziun da l'incumbensader
- tscherner il metal, per exempel atschal u aluminium
- en cas da basegn far marcaziuns sin ils profils e sin las tolas
- programmar las maschinas urdains per fabritgar automaticamain ils tocs en elavuraziun
- resguardar las limitas da grevezza dals elements
- fabritgar las parts da metal tenor indicaziuns e dissegns
- mesirar exactamain las parts e segnar las marcaziuns
- tagliar, fresar, furar, punschar, arder, storscher, arrundar u furar ora plattas, travs e pitgas cun il laser u cun il tagliader a radis d'aua
- manipular indrizs che vegnan reglads per computer, per tagliar ora profils, per exempel tagliaders a plasma, maschinas da buglir u pressas da squadrar
- buglir e struvegiar ensemen las singulas parts sco er agiuntar parts supplementaras, per exempel vaider, materia sintetica u elements d'ina isolaziun termica
- plazzar sin il millimeter maniglias, serradiras, autras ferradiras e stuppadiras
- trametter elements a spezialists per als tractar cun surtratga da pulvra u cun meds cunter ruina
- emballar, proteger e depositar elements per il transport
- tegnair en urden ils urdains e l'equipament
- allontanar elements d'edifizis e d'ovras architectonicas
- dismetter ruments en moda regulara
- montar elements e trair si elements gronds cun agid d'ina schirella u d'ina crana
- en cas da basegn adattar ils elements ed als francar cun struvas, cun darschuns u cun ancras, als buglir u als tatgar
- montar fanestras e portas
- montar spundas ed auters elements da fatschada
- per part reparar e mantegnair elements istorics
Ambient da lavur
Constructuras e constructurs da metal fan lavurs multifaras tant en il lavuratori sco er sin il plazzal. Intginas lavurs èn privlusas e cumbinadas cun canera. Perquai portan els in equipament da protecziun cun egliers, chapellina, protecziun d'udida e chalzers da segirezza. Las lavurs da montascha sin il plazzal èn dependentas da l'aura. Las constructuras ed ils constructurs da metal ston coordinar lur lavurs cun quellas dals auters lavurants da construcziun, per exempel architects, sondadras, constructurs da fatschadas e lainarias.
La gronda part da las constructuras e dals constructurs da metal lavuran en l'industria da construcziun u da maschinas, en l'elavuraziun da metals sco er en la construcziun da vehichels. Sch'els han in'avaina artistica, pon els sa deditgar a l'art dal fier battì u a la concepziun da vitrinas e da locals d'exposiziun. Lur lavur dependa fermamain da l'accent ch'els han tschernì durant lur emprendissadi. Suenter in'experientscha professiunala d'in pèr onns pon questas persunas spezialisadas daventar manadra u manader d'in lavuratori e da montaschas u sa far independents.
Pretensiuns e interess
- Inschign manual
- Imaginaziun tridimensiunala
- Chapientscha tecnica
- Senza sturnizi
- Resistenza corporala
- Gronda toleranza da canera
- Abilitad da lavurar en in team
- Dun per cifras
- Elavurar metal
- Lavurar cun ils mauns
- Esser corporalmain activ
- Lavurar en moda exacta
- Planisar, construir, far dissegn tecnic
Scolaziun
En in manaschi da l’industria d’atschal, da l’industria da metal u da la branscha da fanestras e fatschadas
1 di per emna a la scola professiunala
Emprender ed exercitar la basa professiunala en la pratica, 46-49 dis durant 4 onns.
- Scola tecnica spezialisada, Berna
- Albisbrunn, Hausen am Albis/ZH
- Centre de formation professionnelle Construction, Genevra
- Centre d'orientation et de formation professionelles, Losanna
4 onns
- Construcziun da metal
- Construcziun d’atschal
- Lavurs da ferrer
Terminà la scola obligatorica
En cas da fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Constructur / Constructura da metal AFQ
Furmaziun cuntinuonta
Curs
Purschidas da scolas professiunalas spezialisadas, da scolas spezialisadas superiuras e dad AM Suisse.
Emprendissadi supplementar
Dissegnader-constructur / Dissegnadra-constructura en metal AFQ: access al 3. onn d'emprendissadi.
Examen professiunal (EP)
Cun certificat professiunal federal, p.ex:
- Manader da construcziun en metal, dal lavuratori e da la montascha
- Constructura da metal
- Spezialist da buglir
Examen professiunal superiur (EPS)
Cun diplom federal, p.ex.:
- Maistra da construcziun en metal
- Manader da project en construcziun en metal
Scola spezialisada superiura (SSS)
Furmaziuns en direcziuns spezialisadas parentadas, p.ex. tecnicist / tecnicista dipl. SSS construcziun en metal
Scola auta spezialisada (SAS)
P.ex. bachelor of science (SAS) en inschigneria da construcziun. Tut tenor scola auta spezialisada valan differentas cundiziuns d’admissiun.
Professiuns sumegliantas
