![[object Object],[object Object]](https://media.sdbb.ch/transform/ac1cdb82-4d18-4627-9617-031cb1c4b10f/ferblantier_AdG_269-JPG?io=transform:fill,width:740,height:490)
1. onn d’emprendissadi: CHF 850.–
2. onn d’emprendissadi: CHF 1200.–
3. onn d’emprendissadi: CHF 1400.–
4. onn d’emprendissadi: CHF 1600.–
Sco stagnera u stagner protegias ti tetgs e fatschadas cunter plievgia, naiv, granella, vent e sulegl. Ti produceschas elements da construcziun sco bischens e roms da fanestras. Ti fixeschas surtratgas spezialas vi da paraids exteriuras d'edifizis. Cun tia lavur contribueschas ti a l'effizienza energetica d'edifizis.
Incumbensas
- guardar plans e far mesiraziuns al lieu
- cun meds auxiliars digitals far dissegns d'elements da construcziun per tetgs plats e tetgs spundivs
- cussegliar la clientella e recumandar mantelladas da fatschadas adattadas
- calcular ed empustar la quantitad dal material necessari
- organisar il transport e la magasinaziun dal material e la segirezza sin il plazzal, p.ex. cun puntanadas u tavlas
- planisar ils singuls pass da la producziun e da la montascha
- producir construcziuns da lain e da metal che vegnan duvradas per montar ils elements da construcziun
- transferir las dimensiuns exactas per bischens da deflussiun u da ventilaziun sin la tola
- tagliar tolas cun forschs electricas, resgias u maschinas CNC ed en quest connex observar las prescripziuns da segirezza
- storscher, squadrar e smatgar tolas, metter ensemen parts, p.ex. struvegiar, rebatter e buglir
- producir elements decorativs sin mesira
- metter stresas d'isolaziun vi da fatschadas e tetgs e montar surtratgas e cuvridas
- montar elements prefabritgads sco fanestras da tetg, foras da glisch, allontanaziuns d'aua da terrassa, sistems da retegnair la naiv u sistems da segirezza
- fixar, colliar ed installar bischens e chamins
- installar parachametgs ed indrizs solars tenor las indicaziuns dals furniturs e laschar colliar quels da persunas spezialisadas d'electricitad
- far la controlla finala e scriver rapports
- far lavurs da reparatura, isolar sfessas
- demontar e dismetter materials en moda ecologica
- tegnair en urden urdains e maschinas
Ambient da lavur
Sco stagnera u stagner lavuras ti en lavuratoris e sin plazzals. Sin il plazzal lavuras ti da tutt'aura en il liber. En quest connex portas in equipament da protecziun cun chapellina, egliers e chalzers da segirezza. Tes temps da lavur èn regulars, ma i dat fasas intensivas cun blera lavur per observar termins.
Ti lavuras en stagnarias, en manaschis sanitars e da stagnaria ubain en manaschis da stagnaria e cuvratetgs, per il solit en manaschis pitschens u mesauns. Cun dapli experientscha pos ti surpigliar posiziuns da responsabladad e daventar p.ex. manader da team u manadra da plazzal. Ti pos er ta spezialisar sin la cussegliaziun da la clientella u surpigliar direcziuns da projects.
Pretensiuns e interess
- Inschign manual
- Senza sturnizi
- Abilitad da lavurar en in team
- Imaginaziun tridimensiunala
- Gronda toleranza da canera
- Prontezza d'esser savens sin viadi
- Resistenza corporala
- Chapientscha tecnica
- Elavurar metal
- Lavurar cun ils mauns
- Esser corporalmain activ
Scolaziun
Furmaziun pratica en ina stagnaria: 4 dis per emna
1 di per emna en las scolas professiunalas spezialisadas chantunalas
En plirs chantuns: 51 dis durant 4 onns
4 onns
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Stagner / Stagnera AFQ
Furmaziun cuntinuonta
Curs
Purschidas da l'associaziun suissetec
Emprendissadi supplementar
Sco stagnera u stagner AFQ pos ti per regla far in emprendissadi scursanì da constructura u constructur da ventilaziuns AFQ, d'installatura sanitara u installatur sanitar AFQ ubain installatura u installatur d'indrizs solars AFQ.
Examen professiunal (EP)
- Polier stagner / Poliera stagnera EP
- Spezialist / Spezialista da buglir EP / international welding specialist
Examen professiunal superiur (EPS)
- Maister stagner / Maistra stagnera EPS
Scola spezialisada superiura (SSS)
- Tecnicist / Tecnicista d'edifizis SSS
Scola auta spezialisada (SAS)
- Bachelor of science en tecnica d'edifizis / energia
Tut tenor la scola auta spezialisada valan differentas cundiziuns d'admissiun.
Professiuns sumegliantas
