Installatura da stgaudaments AFQ
Installatur da stgaudaments AFQ
Correspunda questa professiun a mai?![[object Object],[object Object]](https://media.sdbb.ch/transform/47425b03-c8b8-4afa-b3c7-262879959449/Heizungsinst-AW-117-JPG?io=transform:fill,width:740,height:490)
1. onn d’emprendissadi: CHF 850.–
2. onn d’emprendissadi: CHF 1200.–
3. onn d’emprendissadi: CHF 1400.–
4. onn d’emprendissadi: CHF 1600.–
Sco installatura u installatur da stgaudaments monteschas ti stgaudaments ed autras installaziuns termicas sco pumpas da stgaudar u indrizs solars. Ti fixeschas radiaturs, mettas conducts e prendas en funcziun ils indrizs. Ultra da quai fas ti mantegniments e reparaturas e fas attenziun, ch'ils sistems funcziunian en moda effizienta areguard l'energia ed en moda ecologica.
Incumbensas
- dissegnar indrizs termals sin basa dals plans da construcziun
- calcular la lunghezza dals bischens e stimar il material necessari
- organisar il transport ed il deposit da material e da maschinas sin il plazzal
- metter a disposiziun auzaders
- segirar il plazzal
- planisar ils pass da lavur en il lavuratori e sin il plazzal
- montar ed isolar pumpas da stgaudar
- installar indrizs solars e metter conducts da colliaziun per il brischader
- installar brischaders per combustibels dirs sco fessels, pellets u stalizzas e montar conducts per l'apport dal carburant e per la dismessa da la tschendra
- montar e colliar brischaders d'ieli, tancs d'ieli ed indrizs da gas, installar termostats e sensurs
- controllar ils indrizs ed als preparar per metter en funcziun
- tagliar, furmar e montar u buglir bischens
- colliar ils conducts cun ils indrizs, montar armaturas, ventils ed indrizs da segirezza
- metter tenor plan radiaturs e bischens per stgaudaments da palantschieu u da palantschieu sura e colliar quels cun la distribuziun da chalur
- reglar la pressiun, la temperatura u il current a l'indriz per cuntanscher l'effect giavischà
- controllar las configuraziuns e nudar ils resultats
- scriver rapports da construcziun
- surdar e declerar l'indriz a la clientella
- demontar, midar u adattar indrizs existents
- chattar sbagls e disturbis ed eliminar quels
- barattar parts defectas sco radiaturs u pumpas
- mantegnair ils indrizs tar la clientella
- demontar material e reciclar ruments
- tegnair en urden urdains e maschinas
Ambient da lavur
Sco installatura u installatur da stgaudaments lavuras ti en pitschens teams e lavuras tant en il lavuratori sco er sin il plazzal. Per part poi esser dad aut. Tut tenor l'incumbensa portas ti in equipament da protecziun cun egliers, chapellina, mascrina, protecziun d'udida e guants. Ils temps da lavur èn regulars. Mintgatant stos ti lavurar pli ditg per respectar tscherts termins.
Ti lavuras en manaschis d'installaziun da stgaudaments u en manaschis cumbinads da stgaudament, da ventilaziun e sanitars. Energias regenerablas sco pumpas da stgaudar u indrizs solars daventan adina pli impurtantas, perquai has ti bunas schanzas per l'avegnir. Cun l'experientscha correspundenta pos ti surpigliar posiziuns da gronda responsabladad sco manader da team u manadra da plazzals u ta far independenta u independent.
Pretensiuns e interess
- Inschign manual
- Chapientscha tecnica
- Abilitad da lavurar en in team
- Dun per cifras
- Moda da lavurar sistematica
- Prontezza d'esser savens sin viadi
- Resistenza corporala
- Gronda toleranza da canera
- Schliar incumbensas tecnicas
- Elavurar metal
- Lavurar cun ils mauns
- Esser corporalmain activ
Scolaziun
Furmaziun pratica en in manaschi da la branscha da stgaudaments u en in manaschi maschadà da stgaudament, ventilaziun e sanitar: 4 dis per emna
1 di per emna en las scolas professiunalas spezialisadas chantunalas
En plirs chantuns: 51 dis durant 4 onns
4 onns
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Installatur / Installatura da stgaudaments AFQ
Furmaziun cuntinuonta
Curs
Curs da l'associaziun suisstec
Emprendissadi supplementar
Sco installatura u installatur da stgaudaments AFQ pos ti per regla far in emprendissadi scursanì da constructura u constructur da ventilaziuns AFQ, dad installatura sanitara u installatur sanitar AFQ u da planisadra u planisader da tecnica d'edifizis da stgaudament AFQ.
Examen professiunal (EP)
- Schefmontader / Schefmontadra da stgaudaments EP
Examen professiunal superiur (EPS)
- Maister / Maistra da stgaudaments EPS
Scola spezialisada superiura (SSS)
- Tecnicist / Tecnicista d'edifizis SSS
Scola auta spezialisada (SAS)
- Bachelor of science en energia da tecnica d'edifizis
Tut tenor la scola auta spezialisada valan differentas cundiziuns d'admissiun.
Professiuns sumegliantas
