![[object Object],[object Object]](https://media.sdbb.ch/transform/91c12972-27a8-41a3-9997-f2d598531971/09_Kaminfeger_TPA-jpg?io=transform:fill,width:740,height:490)
Sco spazzachamina u spazzachamin controlleschas e nettegias ti installaziuns termicas e ventilaziuns en chasas ed interpresas. Uschia procuras ti che stgaudaments dovran main energia ed èn segirs. Ti pos ta spezialisar sin in da quests dus accents: nettegiament e mantegniment d'indrizs da ventilaziun u mesiraziuns da l'igiena da l'aria e da l'energia tar installaziuns termicas.
Incumbensas
- identifitgar mancanzas e disturbis d'installaziuns termicas, che funcziunan cun laina, gas u ieli da stgaudar, d'egl u cun agid da mesiraziuns electricas
- far mesiraziuns da las svapurs, p.ex. mesirar la concentraziun da fulin, la concentraziun da dioxid carbonic u la temperatura da las svapurs
- far controllas da la protecziun cunter incendis
- discutar las lavurs exequidas cun la clientella ed en cas da basegn mussar soluziuns per disturbis
- metter en funcziun las installaziuns termicas d'edifizis novs ed en connex cun midadas d'edifizis e controllar, che quellas funcziunian en moda segira e senza incaps
- preparar differents meds da lavur, p.ex. apparats da mesiraziun, stgalas, nettegiaders a pressiun auta, tschitschapulvra e tschitsch'aua u dissolvents alcalics (per restanzas da combustiun persistentas)
- nettegiar chamins, pignas, plattas, cheminés e stgaudaments centrals
- mantegnair e nettegiar stabiliments industrials sco stabiliments per arder ruments
- remplazzar las parts isadas e las stuppadiras
- cussegliar la clientella areguard il remplazzament dal stgaudament, il clima dals locals, l'effizienza energetica e la protecziun da l'ambient
- planisar en moda independenta termins per la clientella u coordinar quels cun il biro
- en il rom da la controlla uffiziala d'installaziuns da combustiun far rapports ed annunziar indrizs cun sbagls
- cussegliar la clientella davart aspects da la sanadad d'indrizs da ventilaziun sco l'igiena da l'aria
- nettegiar parts d'indrizs da ventilaziun sco chanals e conducts, controllar ils filters e sche necessari remplazzar els en cas da basegn
- controllar, sche l'indriz funcziuna e sche necessari mussar a la clientella soluziuns substitutivas
- garantir, ch'ils apparats da mesiraziun funcziunian
- mesirar, co che la qualitad da l'aria or dals indrizs è e quant energia ch'els dovran
- giuditgar ils resultats, registrar en moda digitala e discutar quels cun la clientella
Ambient da lavur
Sco spazzachamina u spazzachamin lavuras ti savens en moda independenta u en pitschens teams. Ti visitas la clientella en chasas privatas ed en manaschis. En quest connex portas ti per il solit vestgadira da lavur stgira ed in equipament da protecziun sco egliers da protecziun, guants e mascra – sche necessari. Ti lavuras cunzunt en locals interns, per part però er sin tetgs.
Per regla lavuras ti en manaschis da spazzachamin pitschens. Per ta far independenta u independent dovras ti l'examen professiunal superiur (EPS) sco maistra u maister spazzachamin. Las autoritads chantunalas assegnan als districts, uschenumnadas concessiuns.
Pretensiuns e interess
- Chapientscha tecnica
- Inschign manual
- Moda da lavurar independenta
- Senza sturnizi
- Plain fantasia e savair sa gidar
- Prontezza d'esser savens sin viadi
- Senn per igiena e per nettezza
- Resistenza corporala
- Schliar incumbensas tecnicas
- Lavurar cun ils mauns
- Lavurar en il liber
- Esser corporalmain activ
- Esser savens sin viadi
Scolaziun
Furmaziun pratica en in manaschi da spazzachamin: 4 dis per emna
1 di per emna en las scolas professiunalas spezialisadas chantunalas
En plirs chantuns: 22 dis durant 3 onns
3 onns
- mantegnair e nettegiar indrizs da ventilaziun
- far mesiraziuns da l'igiena da l'aria e da l'energia vi d'installaziuns termicas
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Spazzachamin / Spazzachamina AFQ
Furmaziun cuntinuonta
Curs
Purschidas da l'Associaziun Spazzachamin Svizra
Examen professiunal (EP)
- Capolavurer / Capolavurera da spazzachamin EP
- Controllader / Controlladra d'installaziuns da combustiun EP
- Spezialist / Spezialista da sistems termics EP
- Expert / Experta da la protecziun cunter incendis EP
- Spezialist / Spezialista ventilaziun da confort EP
Examen professiunal superiur (EPS)
- Maister spazzachamin / Maistra spazzachamina EPS
Scola spezialisada superiura (SSS)
- Tecnicist / Tecnicista d'edifizis SSS
Scola auta spezialisada (SAS)
- Bachelor of science en tecnica d'edifizis / energia
Tut tenor la scola auta spezialisada valan differentas cundiziuns d'admissiun.
Professiuns sumegliantas
