1. onn d’emprendissadi: CHF 900–1100.–
2. onn d’emprendissadi: CHF 1300–1500.–
3. onn d’emprendissadi: CHF 1900–2100.–
Sco salaschadra e salaschader concepeschas ti vias, sendas e plazzas. Ti planiseschas, construeschas e reparas surfatschas cun crappa da salaschada e cun plattas da crap natiral. Ultra da quai construeschas ti mirs da crappa natirala e cuvridas da palantschieu, mettas conducts e tumbins ed exequeschas lavurs da betun pli pitschnas.
Incumbensas
- leger plans e dissegns d'architectas ed architects
- discutar projects cun la clientella ed eventualmain cun las autoritads
- planisar ils pass da lavur e coordinar quels cun autras persunas da professiun
- calcular ed empustar il material necessari, p.ex. crappa da salaschada, plattas da crap natiral, gera u maulta da chavas
- controllar la rauba empustada
- preparar utensils, p.ex. martels, paluttas u rudellas da separaziun
- barricadar plazzals, p.ex. montar barrieras da segirezza e tavlas d'avertiment e d'infurmaziun
- far models per tagliar las plattas u la crappa
- preparar surfatschas, p.ex. allontanar cuvrida veglia u chavar si u auzar il terren
- fixar e densifitgar il terren cun chaltschina
- metter crappa da bordura e cementar u betunar, nua che quai è necessari
- allontanar l'aua ed installar deflussiuns
- pitgar cun il martè da salaschar crappa da salaschada u plattas da crap natiral en il fundament da sablun e gera
- controllar, sche las prescripziuns da la clientella vegnan observadas, p.ex. la furma e la grondezza dal design giavischà
- examinar la posiziun da la crappa cun corda tendida, controllar cun la latta da planar, sche la surfatscha è guliva ed eventualmain meglierar
- emplenir chavas e far colliaziuns
- mantegnair e reparar apparats ed utensils
- dismetter ruments e material vegl en moda ecologica
- scriver rapports da lavur
Ambient da lavur
Sco salaschadra u salaschader lavuras ti ordadora al liber, da tutt'aura e mintgatant davantgiu, en posiziuns dischagreablas. Ti portas chalzers robusts, guants e vestgadira da colur traglischanta. Ils temps da lavur èn differents tut tenor la stagiun. La stad datti per regla dapli lavur che l'enviern. Mintgatant lavuras ti er durant la notg per betg impedir il traffic.
Ti lavuras en ina salascharia u en ina interpresa da construcziun per salaschadas e cuvridas da crappa natirala. Il martgà da lavur è bun. Suenter intgins onns experientscha professiunala e cun la furmaziun supplementara correspundenta pos ti surpigliar posiziuns directivas, p.ex. sco manadra da team u polier.
Pretensiuns e interess
- Inschign manual
- Senn per estetica
- Imaginaziun tridimensiunala
- Moda da lavurar conscienziusa ed exacta
- Resistenza corporala
- Resistenza a la temperatura u a l'aura
- Gronda toleranza da canera
- Abilitad da lavurar en in team
- Lavurar en il liber
- Lavurar cun ils mauns
- Lavurar cun arschiglia, crap e vaider
- Esser corporalmain activ
Scolaziun
Furmaziun pratica en ina salascharia u en ina interpresa da construcziun per salaschadas e cuvridas da crappa natirala
Curs da bloc da 9 emnas a la Scola professiunala spezialisada Verkehrswegbauer a Sursee (LU) ed al Center da furmaziun e d'orientaziun professiunala ad Alpnach (OW)
Sursee: 50 dis durant 3 onns
3 onns
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Salaschader / Salaschadra AFQ
Furmaziun cuntinuonta
Curs
Curs da l'Associaziun svizra dals maisters salaschaders (ASP)
Emprendissadi supplementar
Sco salaschadra u salaschader pos ti per regla far in emprendissadi scursanì da montadra u montader da binaris AFQ, sondadra u sondader AFQ, tschentapalantschieus industrials e purtants AFQ ubain constructura u constructur da vias AFQ.
Examen professiunal (EP)
- Polier constructur / Poliera constructura da vias EP
- Artisan / Artisana da tgira da monuments EP
Examen professiunal superiur (EPS)
- Manader / Manadra da construcziun EPS
Scola spezialisada superiura (SSS)
- Tecnicist / Tecnicista SSS surveglianza da construcziun
Scola auta spezialisada (SAS)
- Bachelor of science en inschigneria da construcziun
Tut tenor la scola auta spezialisada valan differentas cundiziuns d'admissiun.
Professiuns sumegliantas
