Sulader AFP
Suladra AFP
![[object Object],[object Object]](https://media.sdbb.ch/transform/df3406a1-3e62-4d10-aefe-f1ad826b0134/BE_8_Steinsetzer_PEK-JPG?io=transform:fill,width:740,height:490)
1. onn d’emprendissadi: CHF 900–1100.–
2. onn d’emprendissadi: CHF 1300–1500.–
Sco suladra u sulader construeschas e reparas ti vias, plazzas e mirs da crappa natirala. Per quest intent tschentas ti crappa da salaschada e plattas da crap natiral. Ti gidas er a metter lingias, tumbins e crappa da l'ur e fas pitschnas lavurs da betun.
Incumbensas
- leger plans e dissegns da vias e plazzas
- preparar il material ed ils utensils, p.ex. crappa da salaschada, gera, martels e paluttas
- controllar la rauba empustada
- transportar il material ed ils utensils sin il plazzal
- endrizzar ils apparats e las maschinas tenor las instrucziuns da la persuna superiura
- barricadar plazzals, installar las barrieras da segirezza, montar las tavlas
- preparar surfatschas, p.ex. allontanar cuvrida veglia u chavar si u auzar il terren
- deviar aua, per ch'il sutterren restia sitg
- fixar e densifitgar il terren cun chaltschina
- metter crappa da bordura e cementar u betunar, nua che quai è necessari
- pitgar cun il martè da salaschar crappa da salaschada u plattas da crap natiral en il fundament da sablun e gera
- tagliar la crappa en moda adattada e plazzar tala, emplenir las chavas cun quità
- terminar las lavurs
- mantegnair e reparar apparats ed utensils
- dismetter ruments e material vegl en moda ecologica
- scriver rapports da lavur
Ambient da lavur
Sco suladra u sulader lavuras ti da tutt'aura al liber, mintgatant en posiziuns malempernaivlas. Ti portas chalzers robusts, guants e vestgadira da colur traglischanta.Ils temps da lavur èn tut tenor la stagiun differents. La stad datti per regla dapli lavur che l'enviern. Mintgatant lavuras ti er la notg per betg impedir il traffic.
Ti lavuras en salascharias u en interpresas da construcziun per salaschadas e cuvridas da crappa natirala. Per il solit èn quai manaschis pli pitschens cun paucas collavuraturas e paucs collavuraturs en citads. Il martgà da lavur è bun.
Pretensiuns e interess
- Inschign manual
- Imaginaziun tridimensiunala
- Resistenza corporala
- Moda da lavurar conscienziusa ed exacta
- Resistenza a la temperatura u a l'aura
- Gronda toleranza da canera
- Abilitad da lavurar en in team
- Senn per estetica
- Lavurar en il liber
- Lavurar cun ils mauns
- Lavurar cun arschiglia, crap e vaider
- Esser corporalmain activ
Scolaziun
Furmaziun pratica en ina salascharia u en ina interpresa da construcziun per salaschadas e cuvridas da crappa natirala
Curs da bloc a la Scola professiunala spezialisada Verkehrswegbauer a Sursee (LU) ed al Center da furmaziun e d'orientaziun professiunala ad Alpnach (OW)
Sursee: 30 dis durant 2 onns
2 onns
Terminà la scola obligatorica
Sulader / Suladra AFP
Furmaziun cuntinuonta
Curs
Curs da l'Associaziun svizra dals maisters salaschaders (ASP)
Emprendissadi supplementar
Sco suladra u sulader AFP pos ti per regla far in emprendissadi scursanì da salaschadra u salaschader AFQ.
Professiuns sumegliantas
