Mecanist d’apparats a motor AFQ
Mecanista d’apparats a motor AFQ
Correspunda questa professiun a mai?![[object Object],[object Object]](https://media.sdbb.ch/transform/4c45582e-6351-4133-8e54-4e5ca9aa8912/11_Motorgeratemechaniker_LV-jpg?io=transform:fill,width:740,height:490)
1. onn d’emprendissadi: CHF 800.–
2. onn d’emprendissadi: CHF 900.–
3. onn d’emprendissadi: CHF 1100.–
4. onn d’emprendissadi: CHF 1300.–
Mecanistas e mecanists d'apparats a motor tgiran e reparan vehichels, maschinas ed apparats che vegnan duvrads per cultivar parcs ed ierts, per rumir naiv, per nettegiar vias u per far lavurs agriculas. Per exempel èn quai zappas a motor, segapastgets, tagliels da maun, schlavazzuns, segascarpas u maschinas da scuar. Ultra da quai cusseglian las mecanistas ed ils mecanists d'apparats a motor la clientella.
Incumbensas
Mecanists d’apparats a motor mantegnan e reparan maschinas ed apparats a motor che vegnan oravant tut utilisads en la cultivaziun da l’iert ed en la selvicultura, en la pumicultura ed en la viticultura, en il servetsch communal e d’enviern e per il nettegiament. Latiers tutgan segapastgets, nettegiaders a pressiun auta, maschinas da rumir naiv, resgias e fautschs a motor, tagliels da maun, maschinas da nettegiar palantschieus e vehichels communals.
Mecanistas d’apparats a motor lavuran il pli savens en in lavuratori. Durant la stad reparan ellas oravant tut maschinas utilisadas en la cultivaziun da l’iert e l’enviern reparan ellas per exempel farguns da naiv e resgias a motor. En tscherts manaschis sa spezialiseschan ellas ultra da quai sin maschinas che vegnan utilisadas en in sectur spezial.
Mecanists d’apparats a motor reparan motors da benzin, da diesel e d’electro. Els allontaneschan tocca da motors defecta u isada, demonteschan ella en tocca singula, nettegian ella e remplazzan la tocca defecta. Sche la tocca n’è betg da retrair a termin util, produceschan els sezs quella. Els dumognan las tecnicas ch’i dovra latiers: furar, struvegiar e buglir. Suenter la reparatura controllan els l'electronica.
Mecanistas d’apparats a motor fan lavurs da controlla e da service. Ellas exequeschan lavurs da rutina sco midar ventils, stuppadiras e chandailas, midar l’ieli dal motor, nettegiar filters e mular cuntels. Tar vehichels controllan ellas il motor, l’accuplament, il manischadi ed ils frains, mantegnan il schassis e controllan l’electronica.
D'ina vart tutga la lavur corporala tar il mintgadi, da l'autra vart dovran mecanists d’apparats a motor er ina gronda abilitad da la detta, per exempel per regular la precisiun dals envidaders e dals carburaturs. Cun apparats da diagnosa dirigids dal computer e sensurs chattan ils mecanists d'apparats a motor la raschun per disturbis en ils sistems electronics, mecanics u idraulics. Tar maschinas cumplitgadas vegnan en funcziun ils manuals dals apparats, plans da las tavlas electricas e lur funcziuns sco er protocols d’examinaziun.
En lur lavur resguardan mecanistas d’apparats a motor las prescripziuns da segirezza, las prescripziuns sanitaras e da la protecziun da l’ambient. Ellas preparan ils apparats tenor las directivas legalas.
Ambient da lavur
Las mecanistas ed ils mecanists d'apparats a motor lavuran individualmain u en pitschens teams en lavuratoris da reparatura da manaschis che produceschan u che vendan apparats a motor. Ellas ed els van er directamain tar la clientella e reparan là maschinas che na pon betg vegnir messas en moviment. Durant la stad è il temp da lavur savens pli lung che durant l'enviern. Las mecanistas ed ils mecanists d'apparats a motor chattan er lavur en l'administraziun communala e chantunala u en garaschas per camiuns u per maschinas da construcziun. Cun in pau experientscha pon ellas ed els manar in lavuratori u lavurar en moda independenta. Mo paucs manaschis prendan emprendistas ed emprendists.
Pretensiuns e interess
- Inschign manual
- Moda da lavurar independenta
- Chapientscha tecnica
- Moda da lavurar sistematica
- Resistenza corporala
- Gronda toleranza da canera
- Plaschair da vender e da cussegliar
- Dun per cifras
- Schliar incumbensas tecnicas
- Elavurar metal
- Lavurar cun ils mauns
- Lavurar cun maschinas
- Esser corporalmain activ
Scolaziun
En lavuratoris da reparatura
1 di per emna a la scola professiunala
Emprender la lavur pratica, approfundar ed exercitar las basas professiunalas, 37 dis durant 4 onns.
4 onns
Terminà la scola obligatorica
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun da basa.
Mecanist / Mecanista d'apparats a motor AFQ
Furmaziun cuntinuonta
Curs
Purschidas dad AM Suisse e da scolas spezialisadas professiunalas
Examen professiunal (EP)
Tecnicist / tecnicista da diagnosa d’apparats a motor cun certificat professiunal federal
Examen professiunal superiur (EPS)
Maister mecanist / maistra mecanista d’apparats a motor
Scola spezialisada superiura (SSS)
P.ex. tecnicista u tecnicist da construcziun da maschinas dipl. SSS, tecnicista u tecnicist da construcziun en metal u da fatschadas dipl. SSS ubain electrotecnicista u electrotecnicist dipl. SSS
Scola auta spezialisada (SAS)
Studis en secturs spezials parentads, p.ex. bachelor of science en tecnica d'automobils, en tecnica da maschinas u en electrotecnica. Tut tenor la scola auta spezialisada valan differentas cundiziuns d'admissiun.
Professiuns sumegliantas
