![[object Object],[object Object]](https://media.sdbb.ch/transform/c1a4eeff-8368-4b85-bbbc-8790d8c750ee/MM-JvB-110-jpg?io=transform:fill,width:740,height:490)
1. onn d’emprendissadi: CHF 650.–
2. onn d’emprendissadi: CHF 850.–
3. onn d’emprendissadi: CHF 1050.–
4. onn d’emprendissadi: CHF 1250.–
Mecanistas e mecanists da motos demonteschan, nettegian, examineschan, giusteschan u remplazzan parts defectas da motos cun motor da combustiun u cun motor electric. Ellas ed els s'occupan da lavurs da service e da reparatura, giusteschan motors e monteschan accessoris. Ultra da quai vendan las persunas da questa professiun vehichels novs u duvrads e cusseglian la clientella.
Incumbensas
- discurrer cun la clientella per eruir ils motivs da problems e per interpretar indicaziuns sin ramurs insolitas u funcziuns sbagliadas
- identifitgar sbagls vi da parts da la moto, en spezial cun agid da cameras d'endoscop cun moniturs
- stimar la dimensiun da la panna ed il temp da reparatura necessari
- scriver offertas
- diagnostitgar sbagls en il sistem da bord da motos, p.ex. tar l'aviader, il sistem antibloccant u il tempomat
- tschentar ora motos electricas e puspè tschentar en suenter la terminaziun da las lavurs
- controllar ils sistems electrics ed ils sistems d'auta tensiun, p.ex. maschinas da glisch, battarias, illuminaziun ed indrizs da signal
- actualisar la software ed installar novas funcziuns
- controllar ils roms ed identifitgar sco er eliminar ils problems
- demontar, controllar e configurar sistems per midar girs
- controllar, emplenir u midar il liquid dals frains
- reparar rodas, p.ex. equilibrar rodas, drizzar giavegls, demontar e montar pneus sco er controllar la pressiun da l'aria e sch'ils pneus èn isads
- giustar l'envidader da motors termics, pia controllar las chandailas, l'isolaziun dals cabels e dals spols sco er engrondir, demontar, nettegiar, reparar e puspè montar il motor termic ed il mecanissem
- nettegiar carburaturs da motors termics, tancar benzin, midar e svidar l'ieli
- producir e montar parts da metal fatgas sin mesira, p.ex. marcar, storscher, glimar, resgiar, furar, rebatter e buglir las parts da metal
- testar motos e far adattaziuns, tant en il lavuratori sco er sin via
- documentar reparaturas fatgas
- controllar ils quints e las reparaturas cun la clientella
- emplenir formulars d'empustaziun e da furniziun
- controllar inventaris dal magasin
- dismetter las parts, ils materials, las battarias ed ils liquids duvrads en moda ecologica
Ambient da lavur
Mecanistas e mecanists da motos lavuran en pitschens teams en lavuratoris da motos. Ellas ed els lavuran er en locals da vendita, cura ch'ellas ed els cusseglian la clientella. Las stagiuns cun aura chauda lavuran las persunas dal fatg dapli, durant las periodas fraidas da l'onn damain.
Mecanistas e mecanists da motos lavuran en lavuratoris u tar producents da motos. Intginas persunas da questa professiun lavuran en moda independenta.
Pretensiuns e interess
- Inschign manual
- Moda da lavurar independenta
- Dun per cifras
- Chapientscha tecnica
- Moda da lavurar sistematica
- Moda da lavurar conscienziusa ed exacta
- Resistenza corporala
- Plaschair da vender e da cussegliar
- Schliar incumbensas tecnicas
- Lavurar cun maschinas
- Lavurar en moda exacta
- Lavurar cun ils mauns
- Avair contact cun persunas
Scolaziun
En in lavuratori da motos
1 di per emna en la scola professiunala spezialisada
Emprender, approfundar ed exercitar las basas professiunalas, 72 dis durant 4 onns
4 onns
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala
Mecanist / Mecanista da motos AFQ
Las emprendistas ed ils emprendists acquistan supplementarmain durant la scolaziun:
• permiss da manischar categoria A
• certificats da cumpetenza UPSA per tractar sistems d'auta tensiun en la tecnica da vehichels
Furmaziun cuntinuonta
Curs
Purschidas da scolas professiunalas spezialisadas e da 2rodas Svizra, URL: www.2radschweiz.ch
Emprendissadi supplementar
Mecanistas e mecanists da motos AFQ pon per regla far in emprendissadi scursanì sco mecanista u mecanist da velos AFQ.
Examen professiunal (EP)
P.ex. Commerziant tecnic / Commerzianta tecnica cun attestat professiunal federal
Examen professiunal superiur (EPS)
P.ex. Mainagestiun dal sectur da duas rodas cun diplom federal
Professiuns sumegliantas
