Mecanista da maschinas agriculas AFQ
Mecanist da maschinas agriculas AFQ
Correspunda questa professiun a mai?![[object Object],[object Object]](https://media.sdbb.ch/transform/014a242a-fd00-4981-bc50-f062d8e2c923/LandmaschMech-AH-101-131-JPG?io=transform:fill,width:740,height:490)
1. onn d’emprendissadi: CHF 700.–
2. onn d’emprendissadi: CHF 900.–
3. onn d’emprendissadi: CHF 1100.–
4. onn d’emprendissadi: CHF 1300.–
Mecanistas e mecanists da maschinas agriculas mantegnan, reparan e construeschan maschinas e vehichels sco er indrizs ed apparats ch'èn installads fix e che vegnan duvrads en l'agricultura. Quai èn p.ex. tractors, vehichels da transport, maschinas da semnar, da racoltar u da segar, suflafains ubain pressas per ballas. Savens èn quai apparats cumplexs cun regulaziuns electronicas.
Incumbensas
- discurrer cun il possessur per chapir il problem
- interpretar las explicaziuns da l'utilisadra u da l'utilisader, p.ex. ramurs nunusitadas, fim u funcziuns falladas da differents sistems
- utilisar apparats da mesiraziun per eruir il motiv exact per il disturbi
- prender dapart maschinas e reparar u remplazzar tocs defects
- resgiar differents materials, tagliar, furar, buglir u storscher, p.ex. atschal, aluminium u materias sinteticas
- controllar u reparar differents sistems da maschinas a maun da las indicaziuns dal constructur, p.ex. sistems electrotecnics ubain sistems sin basa da liquids u tals che vegnan fatgs ir cun aria
- mantegnair motors da diesel u da benzin, p.ex. controllar ventils u envidaders ubain nettegiar carburaturs
- Cussegliar la clientella davart dumondas tecnicas, tar la cumpra u tar l'utilisaziun da maschinas ed apparaturas per l'agricultura, per la viticultura u per l'economia forestala.
- adattar novas maschinas als basegns specifics da la cumpradra u dal cumprader
Ambient da lavur
Mecanistas e mecanists da maschinas agriculas lavuran en lavuratoris da maschinas agriculas u en interpresas che vendan e repareschan talas maschinas. Ellas ed els lavuran en in lavuratori, sulets u en in pitschen team u van directamain tar la clientella. Là repareschan ellas ed els ils indrizs installads fix u maschinas ch'èn ruttas al lieu u ch'èn memia grondas per il transport.
Lur temps da lavur èn il pli savens regulars. Oravant tut la stad e l'atun durant il temp da racolta datti però fitg blera lavur ed ils dis da lavur pon perquai esser pli lungs.
Mecanistas e mecanists da maschinas agriculas pon sa spezialisar sin in tschert tip da vehichel u sin ina tscherta marca. Cun pli e pli experientscha pon ellas ed els manar in lavuratori u lavurar en moda independenta.
Pretensiuns e interess
- Inschign manual
- Moda da lavurar independenta
- Chapientscha tecnica
- Moda da lavurar sistematica
- Resistenza corporala
- Gronda toleranza da canera
- Plaschair da vender e da cussegliar
- Dun per cifras
- Schliar incumbensas tecnicas
- Elavurar metal
- Lavurar cun ils mauns
- Lavurar cun maschinas
- Esser corporalmain activ
Scolaziun
En in lavuratori per maschinas agriculas
1 di per emna a la scola professiunala
Emprender la lavur pratica, approfundar ed exercitar las basas professiunalas, 36-38 dis durant 4 onns.
4 onns
Terminà la scola obligatorica
Tgi che ha fitg bunas prestaziuns da scola, po frequentar la scola da maturitad professiunala durant l'emprendissadi.
Mecanist / Mecanista da maschinas agriculas AFQ
Furmaziun cuntinuonta
Curs
Purschidas dad AM Suisse e da scolas spezialisadas professiunalas
Examen professiunal (EP)
Tecnicista u tecnicist da diagnosa per maschinas agriculas cun certificat professiunal federal
Examen professiunal superiur (EPS)
P.ex. maistra u maister mecanist da maschinas agriculas cun diplom federal
Scola spezialisada superiura (SSS)
P.ex. tecnicista u tecnicist da construcziun da maschinas dipl. SSS, tecnicista u tecnicist da construcziun da fatschadas dipl. SSS ubain electrotecnicista u electrotecnicist dipl. SSS
Scola auta spezialisada (SAS)
Studis en secturs spezials parentads, p.ex. bachelor of science en tecnica d'automobils, en tecnica da maschinas u en electrotecnica. Tut tenor la scola auta spezialisada valan differentas cundiziuns d'admissiun.
Professiuns sumegliantas
