Mecatronista d’automobils AFQ
Mecatronist d’automobils AFQ

Sco mecatronista u mecatronist d'automobils lavuras ti en lavuratoris da differenta grondezza, ubain en garaschas per autos da persunas u vehichels utilitars. En lavuratoris pli pitschens da reparaturas surpiglias ti tut las lavurs che resultan. En lavuratoris gronds ta spezialiseschas ti percunter savens sin tschertas incumbensas e surveglias autras collavuraturas ed auters collavuraturs, p.ex. assistentas ed assistents per il mantegniment d'autos. Ti fas regularmain viadis da test e mintgatant acziuns da servetsch da pannas ordaifer il lavuratori. Tar il servetsch da pannas stos ti er lavurar la notg e la fin d'emna. Per lavurar vi da sistems da tracziun moderns dovras ti savens utensils spezials, apparats da diagnosa ed il computer. Tut tenor l'incumbensa portas ti in equipament da protecziun, sco protecziun d'udida e guants isolants.

Ti has bunas perspectivas professiunalas en manaschis da garaschas, tar commerziants d'autos, en filialas da producents d'autos u en centers d'autos che reparan e mantegnan vehichels. Er tar interpresas da transport e da midada, firmas grondas u administraziuns publicas che mantegnan lur vehichels chattas ti engaschaments. Ti pos lavurar per ina u per pliras marcas d'autos u ta spezialisar sin in tip da vehichel. Cun experientscha ed ina furmaziun supplementara correspundenta pos ti surpigliar posiziuns directivas, p.ex. sco manadra d'in lavuratori, spezialist tar in'assicuranza ubain experta da traffic tar l'Uffizi per il traffic sin via. Ti pos er ta far independenta u independent e manar in agen lavuratori.