![[object Object],[object Object]](https://media.sdbb.ch/transform/9fcd363b-ae76-4125-a7fb-ca3e220c5ef2/15_Elektroplanerin_FM-jpg?io=transform:fill,width:740,height:490)
1. onn d’emprendissadi: CHF 700.–
2. onn d’emprendissadi: CHF 850.–
3. onn d’emprendissadi: CHF 1200.–
4. onn d’emprendissadi: CHF 1550.–
Sco electroplanisadra u electroplanisader planiseschas ti installaziuns electricas per edifizis privats u commerzials. Per quest intent calculeschas ti il basegn d'electricitad e fixeschas, tge conducts, colliaziuns sco er elements da segirezza che vegnan duvrads. Ti fas plans per sistems da communicaziun, per l'automatisaziun d'edifizis e per sistems da segirezza sco parachametgs. Ultra da quai planiseschas ti sistems per energias regenerablas, sco p.ex. indrizs solars.
Incumbensas
- controllar ils plans da l'edifizi che vegn construì u renovà
- mussar soluziuns a l'incumbensadra u l'incumbensader ed als cussegliar a tscherner sistems ed apparats
- determinar las pretensiuns e las mesiras exactas da las installaziuns resguardond las prescripziuns da segirezza
- far ils plans da distribuziun per differents sistems, p.ex. per l'illuminaziun, la communicaziun, ils sistems da segirezza e d'alarm
- definir la lunghezza da las lingias e dals cabels sco er ils lieus ed ils dumbers da las bischlas da contact e da las clavellas
- elavurar – cun agid d'ina software da dissegn e da design – ils plans detagliads per la montascha, ils encablaments e las colliaziuns dals indrizs electrics
- dumandar offertas a firmas d'installaziuns electricas
- far offertas
- controllar quints
- survegliar e controllar il progress da las lavurs da construcziun e l'installaziun dals indrizs durant las differentas fasas
- garantir, ch'in project vegnia realisà tenor ils plans ed ils termins sco er tenor las prescripziuns vertentas
- sa participar a discussiuns cun represchentantas e represchentants da las differentas gruppas professiunalas e coordinar las lavurs
- organisar tests e la messa en funcziun dals indrizs
- organisar l'introducziun per las utilisadras ed ils utilisaders
- far la documentaziun finala cun tut las infurmaziuns sco p.ex. l'instrucziun d'utilisaziun e las cumprovas da segirezza
Ambient da lavur
Sco electroplanisadra u electroplanisader lavuras ti tant en biro sco er sin il plazzal, nua che ti surveglias e controlleschas las lavurs. Mintgatant stos ti ta cunvegnir cun autoritads. Ils temps da lavur èn regulars.
Ti lavuras en biros d'inschigneria, firmas d'installaziuns electricas ed ovras electricas. Cun dapli experientscha pos ti surpigliar posiziuns da cader, p.ex. sco manadra da project u manader d'in biro da planisaziun. Perquai che las installaziuns electricas en tut ils geners d'edifizis daventan pli e pli impurtantas, es ti dumandada u dumandà sin il martgà da lavur.
Pretensiuns e interess
- Imaginaziun tridimensiunala
- Pensar abstract e logic
- Dun per cifras
- Nagins disturbis da vesair colurs
- Moda da lavurar conscienziusa ed exacta
- Talent da dissegnar
- Abilitad da planisar e d'organisar
- Abilitad da communitgar
- Planisar, construir, far dissegn tecnic
- S'occupar cun electricitad ed electronica
- Lavurar cun cifras
- Schliar incumbensas tecnicas
Scolaziun
Furmaziun pratica en in biro d'inschigneria, en ina firma d'installaziuns electricas u en in'ovra electrica: 4 fin 5 dis per emna
2 mais per onn d'emprendissadi durant ils emprims 3 onns d'emprendissadi sco praticum d'installaziun sin il plazzal
1 fin 2 dis per emna en las scolas professiunalas spezialisadas chantunalas
En plirs chantuns: 36 dis durant 4 onns
4 onns
- terminà la scola obligatorica
- intgins manaschis pretendan tests da qualificaziun
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Electroplanisader / Electroplanisadra AFQ
Furmaziun cuntinuonta
Curs
Curs da l'Associaziun svizra da las firmas d'installaziuns electricas EIT.swiss
Emprendissadi supplementar
Electroplanisadras u electroplanisaders pon per regla far in emprendissadi scursanì dad electroinstallatura u electroinstallatur AFQ
Examen professiunal (EP)
- Electricist / Electricista mainaproject planisaziun EP
Examen professiunal superiur (EPS)
- Expert / Experta d'electroplanisaziun EPS
Scola spezialisada superiura (SSS)
- Electrotecnicist / Electrotecnicista SSS
Scola auta spezialisada (SAS)
- Bachelor of science en electrotecnica
Tut tenor la scola auta spezialisada valan differentas cundiziuns d'admissiun.
Professiuns sumegliantas
