Start myBerufswahl

Interessen und Stärken - Schritt 1: Ich lerne meine Interessen und Stärken kennen

Berufe und Ausbildungen - Schritt 2: Ich lerne die Berufs- und Ausbildungswelt kennen

Stärken und Anforderungen - Schritt 3: Ich vergleiche meine Stärken mit den Anforderungen der Berufe und Ausbildungen, die mich interessieren

Schnuppern - Schritt 4: Ich schaue mir die interessanten Berufe genauer an

Überprüfen und entscheiden - Schritt 5: Ich überprüfe die möglichen Berufe oder Schulen und entscheide mich

Lehrstelle finden – Schule anmelden - Schritt 6: Ich setze meine Entscheidung um, suche eine Lehrstelle oder melde mich bei einer Schule an

Vorbereiten auf die Zukunft - Schritt 7: Ich bereite mich auf die Lehre oder die Mittelschule vor oder ich kläre ein Brückenangebot ab

Arbeitsmappe - Deine Ergebnisse

Einen Moment bitte...

myBerufswahl wird geladen.

Abgemeldet

Ihre Login-Session ist abgelaufen. Sie werden auf die Startseite weitergeleitet. Bitte melden Sie sich erneut an, um Ihr Login fortzusetzen.

Planisader / Planisadra da tecnica d’edifizis sanitars AFQ

Planisadras e planisaders da tecnica d’edifizis sanitars planiseschan indrizs d’aua, d’aua persa e da gas. Els dissegnan ils plans, calculeschan ils detagls d’execuziun e surveglian la montascha.

Lavurs

Planisadras e planisaders da tecnica d’edifizis sanitars planiseschan e calculeschan indrizs sanitars. A basa da lur plans sa il persunal da montascha d’ina reconstrucziun u d’ina construcziun nova p.ex. nua che las tualettas vegnan posiziunadas u nua ch’ins sto metter ils bischens da gas e d’aua. Cun lur lavur contribueschan els a l’igiena ed al confort en chasa.

Ils planisaders da tecnica d’edifizis sanitars sclereschan al cumenzament da mintga project cun ils architects, ils inschigners ed ils patruns da construcziun tge pretensiuns che las installaziuns sanitaras ston ademplir. Els resguardan ils giavischs da la clientella, las cundiziuns architectonicas e las prescripziuns legalas, p. ex. normas en connex cun l’igiena d’aua. Els infurmeschan ils spezialists davart differents materials, sistems e products. Cura ch’ils apparats èn tschernids, planiseschan planisaders da tecnica d’edifizis sanitars ils indrizs sanitars a moda favuraivla a l’ambient. Els nizzegian, sche pussaivel, aua da plievgia u energias regenerablas sco current solar u energia geotermica.

Planisaders da tecnica d’edifizis sanitars calculeschan la grondezza ed ils custs dals indrizs d’aua e da gas ed elavuran offertas. Avant la realisaziun fan els tut las calculaziuns da detagl necessarias. Per la producziun e la montascha dissegnan els ils indrizs sanitars en il plan orizontal da l’architect. Tut ils plans vegnan fatgs u cun programs da construcziun (CAD) u a maun. Ils plans detagliads servan al persunal da montascha sco basa da lavur.

Planisaders da tecnica d’edifizis sanitars lavuran er sin il plazzal, nua ch’els discurran davart ils detagls cun il persunal da montascha, ils architects u ils patruns da construcziun. Per che las lavurs da montascha procedian senza difficultads, fan els glistas da material, empostan il material tar ils furniturs, surveglian ils termins ed observan las prescripziuns per la protecziun cunter incendis. Els mettan en funcziun ils indrizs installads e controlleschan, sch’els funcziunan. Ultra da quai scrivan els instrucziuns per l’utilisaziun segira dals indrizs sanitars. En il mintgadi da lavur protegian els lur atgna segirezza e sanadad.

Scolaziun

Basa legala

Ordinaziun federala 6-10-2009

Durada

4 onns

Furmaziun en la pratica

En in manaschi per indrizs sanitars u en in biro d’inschigneria per tecnica da construcziun; pratica en il magasin, en il lavuratori e sin il plazzal (almain 3 mais)

Furmaziun en scola

1 di per emna a la scola professiunala (cumplettà cun curs da bloc)

Roms professiunals

  • organisaziun dal manaschi
  • persistenza
  • segirezza da la lavur e protecziun cunter incendis
  • matematica
  • material da fabricaziun
  • basa da la chemia e da la fisica
  • terminologia e dinamica dals fluids
  • electrotecnica
  • mesirar – controllar – reglar, tecnica da construcziun e d’edifizis
  • process da planisaziun
  • indrizs sanitars

Curs ordaifer il manaschi

Tar differents temas

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "planisader / planisadra da tecnica d’edifizis sanitars AFQ"

Premissas

Furmaziun preliminara
  • scola populara terminada
  • bunas prestaziuns en geometria, matematica, fisica
Pretensiuns
  • plaschair da dissegnar tecnicamain, a maun u al computer
  • abilitad da s’imaginar chaussas en il spazi
  • moda da lavurar exacta e conscienziusa
  • talent d’organisar
  • plaschair da contact ed abilitad da communitgar, p.ex. lavur en il team e talent da contractar

Furmaziun supplementara

Curs

purschidas da centers da furmaziun da suissetec e da scolas professiunalas

Furmaziun da basa scursanida

en il champ professiunal "planisaziun da tecnica d’edifizis": planisader / planisadra da tecnica d’edifizis ventilaziun AFQ u planisader / planisadra da tecnica d’edifizis stgaudament AFQ

Examen professiunal (EP)

manader / manadra da project en tecnica d’edifizis cun certificat professiunal federal, cussegliader energetic / cussegliadra energetica edifizis cun certificat professiunal federal

Examen professiunal superiur (EPS)

planisader sanitar / planisadra sanitara cun diplom federal

Scola spezialisada superiura (SSS)

tecnicist / tecnicista dipl. tecnica d’edifizis

Scola auta spezialisada (SAS)

Bachelor of Science (SAS) en tecnica d’edifizis

Cundiziuns da lavur

Planisaders da tecnica d’edifizis sanitars lavuran en biros da planisaziun e d’inschigneria sco er en manaschis per installaziuns sanitaras.

La purschida da plazzas d’emprendissadi è buna. Per onn vegnan scolads en Svizra var 100 emprendists.

Planisaders da tecnica d’edifizis scolads èn tschertgads sin il martgà da lavur. Els chattan il pli senza problems ina plazza da lavur.

En la tecnica d’edifizis vegnan adina puspè introducids novs materials, novs sistems e novas prescripziuns, p.ex. en connex cun la minergia. Quai pretenda ina furmaziun supplementara regulara.

Ulteriuras infurmaziuns

Uniun da la tecnica d’edifizis da la Svizra e dal Principadi da Liechtenstein (suissetec)
Auf der Mauer 11
Chascha postala 1768
8021 Turitg
Tel: 043 244 73 00
URL: www.suissetec.ch

Revistas professiunalas:
"HK-Gebäudetechnik"
"Planer + Installateur"



berufsberatung.ch