Start myBerufswahl

Interessen und Stärken - Schritt 1: Ich lerne meine Interessen und Stärken kennen

Berufe und Ausbildungen - Schritt 2: Ich lerne die Berufs- und Ausbildungswelt kennen

Stärken und Anforderungen - Schritt 3: Ich vergleiche meine Stärken mit den Anforderungen der Berufe und Ausbildungen, die mich interessieren

Schnuppern - Schritt 4: Ich schaue mir die interessanten Berufe genauer an

Überprüfen und entscheiden - Schritt 5: Ich überprüfe die möglichen Berufe oder Schulen und entscheide mich

Lehrstelle finden – Schule anmelden - Schritt 6: Ich setze meine Entscheidung um, suche eine Lehrstelle oder melde mich bei einer Schule an

Vorbereiten auf die Zukunft - Schritt 7: Ich bereite mich auf die Lehre oder die Mittelschule vor oder ich kläre ein Brückenangebot ab

Arbeitsmappe - Deine Ergebnisse

Einen Moment bitte...

myBerufswahl wird geladen.

Abgemeldet

Ihre Login-Session ist abgelaufen. Sie werden auf die Startseite weitergeleitet. Bitte melden Sie sich erneut an, um Ihr Login fortzusetzen.

Construider / Construidra da metal AFQ

Construiders e construidras da metal fabritgeschan elements da construcziun da metal, d’atschal, da fanestras e da fatschadas. En il lavuratori sa participeschan els a l’entir process da fabricaziun. A la fin monteschan els las construcziuns finidas al lieu.

Lavurs

Construiders e construidras da metal èn spezialisads en la construcziun da metal, la construcziun d’atschal u en lavurs da ferrer. Entaifer la domena da la construcziun da metal fabritgeschan els elements da construcziun sco portas, fanestras, fatschadas, stgalas, balcuns e penslas. Construiders da metal en il champ da la construcziun d’atschal lavuran en grondas hallas da montascha e fabritgeschan construcziuns purtantas per hallas, punts u ascensurs. Durant las lavurs da ferrer vegnan en funcziun tant tecnicas da fabricaziun da la construcziun da metal e da la construcziun d’atschal sco era il martè e la mazza. Il construider da metal fa vegnir cotschen il fier battì en il fuclar e fravegia lura a maun u cun agid dal martè da vapur.

Construiders da metal lavuran cunzunt cun atschal ed aluminium, dasperas utiliseschan els dentant era metals sco atschal cromà-niclà, mesch, bronz da construcziun u arom sco era materia sintetica, materialias d’isolar e vaider.

Construiders da metal sa participeschan a la construcziun ed a la montascha dals elements da construcziun da l’entschatta enfin la fin. Els planiseschan las lavurs uschia ch’ellas pon vegnir fatgas ad uras ed en la qualitad giavischada. Savens fan els era las empustaziuns necessarias.

En il lavuratori taglian construiders da metal stangas, bischens e tolas cun agid da maschinas dirigidas dal computer. Per far questas lavurs s’orienteschan els a dissegns tecnics. A maun u cun maschinas ed indrizs dattan els als profils adattads tras stanzar, furar, tagliar crennadiras, squadrar e fresar la furma giavischada. Quels elements da construcziun mettan els ensemen cun agid da tecnicas da collar, buglir e struvegiar. Lura adatteschan els ils scharniers, ils marschlos u las stuppadiras minuziusamain. Suenter avair surtratg cun colur u suenter avair zincà ils elements da construcziun vegnan els preparads per la montascha, transportads al plazzal e montads en lavur da team sin basa dals plans.

Construiders da metal controlleschan regularmain construcziuns existentas e las repareschan en cas da necessitad. Ultra da quai mantegnan e tgiran els ils guaffens e las maschinas.

Construiders da metal resguardan las prescripziuns davart la segirezza da lavur e davart la protecziun da la sanadad e da l’ambient. Els portan per exempel ina protecziun da l’udida ed egliers da protecziun. Els dismettan ils ruments en moda cumpetenta ed adattada a l’ambient.

Scolaziun

Basa legala

Ordinaziun federala 20-12-2006 cun midadas dal 12-6-2008

Durada

4 onns

Direcziuns

  • construcziun da metal
  • construcziun d’atschal
  • lavurs da ferrer

Furmaziun en la pratica

En in manaschi da l’industria d’atschal, da l’industria da metal u da la branscha da fanestras e fatschadas

Furmaziun en scola

1 di per emna a la scola professiunala

Roms professiunals

  • economia da manaschi ed organisaziun da manaschi
  • logistica ed economia da material
  • ambient e segirtad
  • construcziun
  • fabricaziun
  • montascha
  • mantegniment da la valur
  • basas planisatoricas
  • lavurs specificas entaifer las direcziuns da spezialisaziun

Curs ordaifer il manaschi

Tar differents temas

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "construider da metal / construidra da metal AFQ"

Premissas

Furmaziun preliminara
  • scola populara terminada
  • bunas prestaziuns en matematica, en il dissegn tecnic ed en lavurs manualas èn d’avantatg
Pretensiuns
  • plaschair vi da l’elavuraziun da metal
  • enclegientscha tecnica
  • inschign manual
  • constituziun dal corp ferma e sauna
  • movibladad
  • naginas allergias cunter metals
  • resistenza a l’aura
  • abilitad da lavurar en in team

Furmaziun supplementara

Curs

purschidas da scolas professiunalas, da scolas spezialisadas superiuras sco era da la Federaziun svizra dals lavurers da la metallurgia e da l’uraria FLMU

Furmaziun da basa scursanida

examen en in’autra direcziun da scolaziun suenter avair lavurà 1 onn en la domena specifica, constructur da metal / constructura da metal AFQ (entrada en il 3. onn da la furmaziun da basa)

Examen professiunal (EP)

manader / manadra da construcziun en metal, dal lavuratori e da la montascha cun certificat professiunal federal, constructur / constructura da metal cun certificat professiunal federal, spezialist / spezialista da buglir cun certificat professiunal federal

Examen professiunal superiur (EPS)

maister / maistra da construcziun en metal, manader da project diplomà / manadra da project diplomada en construcziun en metal

Scola spezialisada superiura (SSS)

tecnicist diplomà / tecnicista diplomada SSS construcziun en metal

Scola auta spezialisada (SAS)

p.ex. Bachelor of Science (SAS) en inschigneria da construcziun

Cundiziuns da lavur

A construiders da metal stat in grond champ da lavur a disposiziun: Els èn spezialists dumandads en firmas da construcziun en atschal e manaschis da la construcziun en metal, en fravgias, en l’industria, en fatschentas da construcziun, en lavuratoris communals, en lavuratoris da carossarias e sumegliants. Bleras firmas èn spezialisadas, per exempel en la construcziun en atschal u en la construcziun da fatschadas.

Las lavurs en il lavuratori, per exempel las lavurs cun il fieu, las lavurs da montascha da tutt’aura sco era il cumenzament da la lavur la damaun baud èn corporalmain fitg pretensiusas.

Ulteriuras infurmaziuns

AM Suisse
Seestr. 105
Postfach
8027 Turitg
Tel: 044 285  77 77
URL: www.metall-und-du.ch

Revista professiunala:
"Metall"




berufsberatung.ch