Lavurs
Materialias tradiziunalas per construir bartgas èn diversas sorts da laina, rascha artifiziala rinforzada cun fibra da vaider e metals en furma da tola. Ozendi lavuran construiders e construidras da bartgas dentant adina pli savens cun material cumponì da hightec. Els resgian, fresan, splanan e collan lain, lamineschan material sintetic, storschan e collian atschal e tola d’aluminium. Quests materials tractan els cun guaffens a maun sco er cun maschinas.
Tar ina nova construcziun d’ina bartga fan ils construiders da bartgas cun agid da plans sco emprim il bist. Tar la moda da construir cun material sintetic vegn fatga ina furma adattada per il material da construcziun e per la moda da construir. En questa furma vegnan integradas mattas da vaider bognadas en materia sintetica liquida, quellas vegnan silsuenter diras. A la fin gliman ils construiders da bartgas la surfatscha, la surtiran e vernischeschan. Cun quests pass na vegn ella betg mo pli bella, mabain er resistenta a l’aura.
Silsuenter cumpletteschan els las bartgas cun motors sco er cun indrizs da cumond e propulsiun. Tar bartgas a vela monteschan els l’apparatura nautica che consista da las pitgas, las velas e las sugas. Tar lur lavurs tutgan er la construcziun da la cabina, las installaziuns dals indrizs electrics sco er l’installaziun dals indrizs radiofonics e da navigaziun ed auters accessoris navals.
Sper la construcziun nova e las renovaziuns da bartgas s’occupan construiders da bartgas er da lavurs da reparatura e da restauraziun. Els mantegnan ils indrizs tecnics, megliereschan ils corps da las bartgas, nettegian e tgiran la punt e repareschan e remplazzan accessoris defects. Ultra da quai èn els responsabels per in deposit d’enviern professiunal.
Per il pli lavuran els suttetg en ils chantiers, mintgatant dentant er sut tschiel avert en il doc sitg u sin l’aua. Tar tut lur lavurs resguardan els las prescripziuns da protecziun da l’ambient e da la sanadad e sa tegnan vi da las mesiras da segirtad da lavur.
Scolaziun
Basa legala
Ordinaziun federala 6-8-2015
Durada
4 onns
Furmaziun en la pratica
en chantiers
Furmaziun en scola
1 di per emna a la scola professiunala a Zofingen, Morges u Bellinzona
Roms professiunals
- fabritgar/reparar tocca da bartgas or da lain
- fabritgar/reparar tocca da bartgas or da material sintetic u da metal
- exequir lavurs da montascha e da modificaziun dals indrizs tecnics da bartgas
- manevrar bartgas e manischar cun sistems da transport e d‘auzar
- exequir lavurs da planisaziun, da controlla e da mantegniment
Permiss dad ir cun bartga
Tar la scolaziun da basa tutga er l’acquist dal permiss d’ir cun bartga categoria A (bartgas a motor) e categoria D (navs a vela). Il manaschi da scolaziun surpiglia ils custs per mintgamai 10 lecziuns per l’instrucziun pratica.
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "construider / construidra da bartgas AFQ"
Premissas
Furmaziun preliminara
- scola populara terminada
- stgalim da scola mesaun è giavischà
Pretensiuns
- inschign manual
- enclegientscha tecnica
- imaginaziun dal spazi
- movibilitad corporala
- buna sanadad e constituziun robusta
- plaschair vi dal sport d’aua
Furmaziun supplementara
Curs
purschidas da l’Associaziun svizra dals constructurs da bartgas tar divers temas sco electrotecnica, construcziun, cussegliaziun da clientella e vendita etc.
Furmaziun da basa scursanida
survegliader / survegliadra da bartgas AFQ
Examen professiunal superiur (EPS)
maister constructur da bartgas / maistra constructura da bartgas
A l’exteriur
cun scolaziun correspundenta vegnan purschids studis da las scolas autas spezialisadas en la Germania ed en l’Engalterra, p.ex. studi da Bachelor en construcziun da bartgas u tecnica da mar a las scolas autas spezialisadas da Bremen e da Kiel
Cundiziuns da lavur
Construiders da bartgas lavuran en chantiers pitschens u mesauns. Er la polizia da mar/lai e l’autoritad da duana dovran construiders da bartgas. Ulteriuras lavurs èn: scolast d’ir cun bartga a motor u a vela u ina funcziun sco expert dal donn tar ina assicuranza.
Tut tenor stagiun variescha il temp da lavur. Per regla lavuran construiders da bartgas il pli ditg la primavaira e l’atun.
Schegea che la branscha da construcziun da bartgas e survesaivla, datti per interessads avunda plazzas d’emprendissadi.
Ulteriuras infurmaziuns
Schweiz. Bootbauer-Verband
Bündtengasse 2
4800 Zofingen
Tel: 062 751 91 88
URL: www.traumberuf-bootbauer.ch
Revistas professiunalas:
URL: www.marina-online.ch