Spezialista da la navigaziun interna AFQ
Spezialist da la navigaziun interna AFQ
Correspunda questa professiun a mai?![[object Object],[object Object]](https://media.sdbb.ch/transform/f2ee0eae-09d9-49d5-af52-4767622afdbe/PoS-24-jpg?io=transform:fill,width:740,height:490)
1. onn d’emprendissadi: CHF 900.–
2. onn d’emprendissadi: CHF 1200.–
3. onn d’emprendissadi: CHF 1500.–
Persunas spezialisadas da la navigaziun interna transportan rauba e persunas sin las auas europeicas. Ellas pratitgeschan lur professiun sin grondas navs sco bastiments da rauba, navs-cisterna u navs da cruschera. Ellas sustegnan la squadra da la punt a realisar transports segirs sco er a mantegnair la nav. La glieud da professiun gida tranter auter al sbartgament ed a la partenza da las navs.
Incumbensas
- preparar las navs per chargiar e per stgargiar rauba
- controllar la martganzia (la chargia) e la stabilitad da las navs
- preparar las manevras da sbartgament e da partenza da las navs
- schliar u fixar en moda professiunala e segira las navs cun sugas u cun fildarom a maun u cun meds auxiliars mecanics, p.ex. in turn da suga
- durant las manevras communitgar sur func cun la conductura u il conductur da la navs ed annunziar las distanzas al quai u a la porta da la sclusa
- navigar la nav sut la surveglianza da la conductura u dal conductur
- manipular rembels, motors e meds auxiliars nautics sco radar, func e la charta electronica
- survegliar ils apparats a bord sco las maschinas principalas, ils turns e las pumpas
- en cas da disturbis prender mesiras tenor la situaziun, per exempel pitschnas reparaturas da las pumpas
- tenor las prescripziuns procurar per la segirezza da las passagieras e dals passagiers, per exempel instruir ils passagiers, tge che sto vegnir fatg en cas d'in alarm
- tgirar e mantegnair corps da navs, indrizs e sistems da bord
- en turnus surpigliar il servetsch da guardia e controllar il local da las maschinas sco er metter las bandieras e las glischs da signal
- observar las prescripziuns legalas ed ir enturn en moda professiunala cun la rauba privlusa e cun ils ruments
Ambient da lavur
Persunas spezialisadas da la navigaziun interna lavuran per in med da traffic cun orientaziun internaziunala, quai vul dir per ina cumpagnia da possessurs da navs u per in possessur da navs independent. Ellas pratitgeschan lur professiun sin in bastiment da rauba, ina nav-cisterna u ina nav da cruschera. Lur lavur sin l'aua è pretensiusa. Ellas vivan e lavuran a bord ed èn savens pliras emnas en gir ordaifer il cunfin naziunal. Per regla lavuran ellas en il team. Ellas lavuran da tutt'aura, er la notg e la fin d'emna, perquai ch'en ports gronds da mar vegn lavurà da tuttas uras. Segirezza e cumpetenza sociala giogan ina gronda rolla a bord. Igl è obligatoric da purtar in equipament da protecziun. A bord regia in scumond d'alcohol e da drogas.
L'emprendissadi po vegnir fatg a Basilea sin ina nav dal Rain. Persunas interessadas n'han per regla nagina difficultad da chattar ina plazza d'emprendissadi. Spezialistas e spezialists da la navigaziun interna lavuran entaifer il plaun dal manaschi suprem d'ina nav en la funcziun sco timuniera u timunier e pon absolver l'examen sco chapitania u chapitani da la navigaziun interna. Els èn persunas spezialisadas fitg dumandadas. Tut tenor la cumpagnia da possessurs da navs e tut tenor las qualificaziuns persunalas pon els navigar independentamain cun ina nav da navigaziun interna suenter ch'els han ademplì durant 7 fin 10 onns lur professiun.
Pretensiuns e interess
- Abilitad da lavurar en in team
- Prontezza da viagiar a l'exteriur
- Buna vesida
- Prontezza da lavurar durant uras irregularas u servetschs da notg
- Gronda toleranza da canera
- Resistenza a la temperatura u a l'aura
- Resistenza corporala
- Senn d'orientaziun
- Esser corporalmain activ
- Schliar incumbensas tecnicas
- Lavurar en il team
Scolaziun
Sin ina nav ch'è en gir sin las vias navigablas europeicas, p.ex. sin ina nav dal Rain. Il post spezialisà Surveglianza da la furmaziun professiunala Basilea-Citad infurmescha davart las instituziuns che porschan la scolaziun.
Instrucziun en bloc a la scola professiunala spezialisada Schiffer-Berufskolleg Rhein, Duisburg (D)
3 onns
- Viadi da navs da martganzia: bastiment da rauba u nav-cisterna
- Navigaziun da persunas: navs da cruschera cun manaschi d'hotel
Temp da scola obligatoric terminà
Maturitad professiunala a la scola professiunala spezialisada Schiffer-Berufskolleg Rhein, Duisburg
Spezialist / Spezialista da la navigaziun interna AFQ
Funcziun sco timuniera spezialisada u timunier spezialisà (autorisescha d'annunziar per l'examen da chapitani)
Remartga: suenter il 2. onn d'emprendissadi vegn absolvì l'examen sco marinera resp. mariner.
Furmaziun cuntinuonta
Chapitani / Chapitania da la navigaziun interna AFQ
Suenter l'examen intermediar mariner / marinera suenter 2 onns e bunas prestaziuns da scola èsi pussaivel da midar en il 3. onn d'emprendissadi chapitani / chapitania da la navigaziun interna.
Examen professiunal (EP)
Cun certificat professiunal federal: spezialista u spezialist da la duana e da la segirezza dals cunfins ubain polizista u polizist
Spezialisaziun
Certificat ADN per transports da rauba privlusa, certificat da func da Rain UUC, chapitania u chapitani (conductura u conductur da navs)
Navigaziun d'auta mar
La scolaziun sin ina nav da navigaziun interna porscha la pussaivladad da fitgar pe en la navigaziun d'auta mar. In studi nautic sco uffiziera u uffizier è pussaivel.
Midada en auters secturs da la navigaziun interna
P.ex. conductura u conductur da navs sin bartgas dals pumpiers, da la protecziun da las auas, en la correcziun dals curs d'aua, survegliadra u survegliader da sclusas, guida u guid, possessura u possessur sco er chapitania u chapitani d'ina atgna nav a motor da rauba, ina nav-cisterna u ina nav da passagiers, navigatura u navigatur sin lais interns svizzers, activitad administrativa en ina cumpagnia da possessurs da navs u en in'agentura da port.
Professiuns sumegliantas
