Chapitania da la navigaziun interna AFQ
Chapitani da la navigaziun interna AFQ
![[object Object],[object Object]](https://media.sdbb.ch/transform/f2ee0eae-09d9-49d5-af52-4767622afdbe/PoS-24-jpg?io=transform:fill,width:740,height:490)
1. onn d’emprendissadi: CHF 900.–
2. onn d’emprendissadi: CHF 1200.–
3. onn d’emprendissadi: CHF 1500.–
Chapitanias e chapitanis da la navigaziun interna transportan rauba e persunas sin las auas europeicas. Els pratitgeschan lur professiun sin grondas navs sco bastiments da rauba, navs-cisterna u navs da cruschera. Chapitanias e chapitanis sustegnan la squadra da la punt a realisar transports segirs. Els gidan al sbartgament ed a la partenza da las navs, èn responsabels per la segirezza da las collavuraturas e dals collavuraturs sco er da las passagieras e dals passagiers e mainan lur team.
Incumbensas
- calcular la stabilitad per chargiar e per stgargiar las navs
- controllar la qualitad da la chargia
- manevrar navs en moda segira durant il sbartgament e la partenza
- fixar u schliar en moda professiunala e segira las navs cun sugas u cun fildarom a maun u cun meds auxiliars mecanics, p.ex. cun in turn da suga
- exequir ina manevra d'ancra segira
- avant e durant las manevras communitgar sur func cun la conductura u il conductur da la nav ed annunziar las distanzas al quai u a la porta da la sclusa
- navigar la nav sut la surveglianza da la conductura u dal conductur
- manipular rembels, motors e meds auxiliars nautics sco radar, func e GPS cun charta electronica
- surpigliar la responsabladad per ils sistems da surveglianza da las maschinas, da las pumpas e dals auters apparats a bord
- en cas da disturbis infurmar ils commembers da la squadra, per ch'els reparian p.ex. ina pumpa defecta u filters stuppads
- tenor las prescripziuns procurar per la segirezza da las passagieras e dals passagiers, per exempel instruir ils passagiers, tge che sto vegnir fatg en cas d'in alarm
- tgirar e mantegnair corps da navs, indrizs e sistems da bord
- en turnus surpigliar il servetsch da guardia e controllar il local da las maschinas sco er metter las bandieras e las glischs da signal
- observar las prescripziuns legalas ed ir enturn en moda professiunala cun la rauba privlusa e cun ils ruments
- manar il persunal
- procurar per la protecziun e per la segirezza da las collavuraturas e dals collavuraturs
- surpigliar la responsabladad per la planisaziun dal viadi, per che la rauba e las persunas vegnian transportadas en moda segira ed a temp
- realisar activitads administrativas, per exempel far plans da mantunar u plans d'acziun
Ambient da lavur
Chapitanias e chapitanis da la navigaziun interna lavuran per in med da traffic cun orientaziun internaziunala, quai vul dir per ina cumpagnia da possessurs da navs u per in possessur da navs independent. Las persunas directivas èn il post da contact tranter il manaschi da navs e la cumpagnia da possessurs da navs sin terra. Lur lavur sin l'aua è pretensiusa. Ellas vivan e lavuran a bord ed èn savens pliras emnas en gir ordaifer il cunfin naziunal. Per regla lavuran ellas en il team. Ellas lavuran da tutt'aura, er la notg e la fin d'emna, perquai ch'en gronds ports da mar vegn lavurà da tuttas uras. Segirezza e cumpetenza sociala giogan ina gronda rolla a bord. Igl è obligatoric da purtar in equipament da protecziun. A bord regia in scumond d'alcohol e da drogas.
L'emprendissadi po vegnir fatg a Basilea sin ina nav dal Rain. Persunas interessadas n'han per regla nagina difficultad da chattar ina plazza d'emprendissadi. Chapitanias e chapitanis da la navigaziun interna èn persunas spezialisadas fitg dumandadas. Tut tenor la cumpagnia da possessurs da navs e tut tenor las qualificaziuns persunalas pon els navigar independentamain cun ina nav da navigaziun interna suenter ch'els han ademplì durant 7 fin 10 onns lur professiun.
Pretensiuns e interess
- Abilitad da manar collavuraturas e collavuraturs
- Prontezza da viagiar a l'exteriur
- Buna vesida
- Prontezza da lavurar durant uras irregularas u servetschs da notg
- Gronda toleranza da canera
- Resistenza a la temperatura u a l'aura
- Resistenza corporala
- Dun d'observar
- Lavurar en il team
- Esser corporalmain activ
- Esser savens sin viadi
- Schliar incumbensas tecnicas
Scolaziun
Sin ina nav ch'è en gir sin las vias navigablas europeicas, p.ex. sin ina nav dal Rain. Il post spezialisà Surveglianza da la furmaziun professiunala Basilea-Citad infurmescha davart las instituziuns che porschan la scolaziun.
Instrucziun en bloc a la scola professiunala spezialisada Schiffer-Berufskolleg Rhein, Duisburg (D)
3.5 onns
Temp da scola obligatoric terminà
Maturitad professiunala a la scola professiunala spezialisada Schiffer-Berufskolleg Rhein, Duisburg
Chapitani / Chapitania da la navigaziun interna AFQ
Funcziun sco conductura u conductur da navs
Remartga: suenter il 2. onn d'emprendissadi vegn absolvì l'examen sco mariner / marinera.
Furmaziun cuntinuonta
Spezialisaziun
Certificat ADN per transports da rauba privlusa, certificat da func da Rain UUC, chapitani / chapitania (conductur / conductura da navs) e suenter examen da patenta da radar
Examen professiunal (EP)
Cun certificat professiunal federal: spezialist / spezialista da la duana e da la segirezza dals cunfins u polizist / polizista
Navigaziun d'auta mar
La scolaziun sin ina nav da navigaziun interna porscha la pussaivladad da fitgar pe en la navigaziun d'auta mar. In studi nautic sco uffizier / uffiziera è pussaivel.
Midada en auters secturs da la navigaziun interna
P.ex. conductura u conductur da navs sin bartgas dals pumpiers, da la protecziun da las auas, en la correcziun dals curs d'aua, survegliadra u survegliader da sclusas, guida u guid, possessura u possessur sco er chapitania u chapitani d'ina atgna nav a motor da rauba, ina nav-cisterna u ina nav da passagiers, navigatura u navigatur sin lais interns svizzers, activitad administrativa en ina cumpagnia da possessurs da navs u en in'agentura da port
Professiuns sumegliantas
