Zum Titel springen

Vaschler / Vaschlera AFQ

Vaschleras e vaschlers fabritgeschan e reparan recipients da lain per l’economia da vin e l’agricultura. Els produceschan butschins, dentant era  recipients decorativs  u products spezials sco bogneras el liber (Hot Tubs) u vaschs da plantas.

Lavurs

Els exequeschan suandantas lavurs:

Artisanadi da lain
  • cussegliar la clientella e controllar sche lur giavischs èn ademplids
  • calcular termins e pretschs, far offertas
  • eleger, cumprar en, empustar e magasinar il material, tegnair en egl ils custs e far stim a la protecziun da l'ambient tar il lain (per il solit ruver)
  • prender la mesira, far skizzas, sco era calcular la grondezza e la furma dals  vaschs
  • preparar il material ed ils guaffens, valitar la qualitad, eleger e preparar materials auxiliars (p.ex. tschertgels da metal)
  • mesirar, tagliar, splanar e colliar las duvas (tocca da lain sturschì) cun ils tschertgels da metal e las storscher, p.ex. far in fieu en il bist dal recipient e bagnar las surfatschas da lain cun aua
  • montar manetschas da metal ed il material da fixaziun, fabritgar e montar ils funs, magari era portas dal butschin e spinas
  • surlavurar  surfatschas, controllar la qualitad e verifitgar la mesira (mesirar quant liquid che ha plaz en il butschin)
  • furnir ils vaschs a la clientella, als montar avant lieu sche necessari
  • far reparaturas e lavurs da mantegniment tar la clientella
  • mantegnair ils guaffens e las maschinas (la resgia circulara, la maschina da sfender, la maschina da splanar, differentas splaunas, il bloc d’enchastrar, il martè da tschentar)
Vinificaziun, administraziun e spediziun
  • enconuscher ils process da la vinificaziun per producir products correspundents
  • tut tenor manaschi er gidar tar la vinificaziun, torclar ivas, conservar il suc en butschins; filtrar, trair giu e vender il vin
  • nettegiar e reparar ils butschins sche necessari
  • far lavurs administrativas, tschantar quint e manar la contabilitad
  • far lavur publica e reclama, p.ex. administrar la pagina-web e las medias socialas u crear in negozi per agens products

Scolaziun

Basa legala

Ordinaziun federala 5-12-2008 (versiun dal 1-1-2018)

Durada

3 onns

Furmaziun en la pratica

En in lavuratori da vaschler u en ina torclera da vin

Furmaziun en scola

A la Scola da sculptura da lain a Brienz/BE (4 blocs à 2 emnas l'onn da scolaziun da basa)

Roms professiunals

  • incumbensa: contact cun la clientella ed accumpagnament, material da fabricaziun, AVOR, urden creativ
  • administraziun: calculaziun, marketing, documentaziuns
  • fabricaziun: istorgia, utensils a maun, preparaziun dal material da fabricaziun, schablonas / furmas, colliaziuns, maschinas, tractament da la surfatscha, elavuraziun da metal, logistica / montascha
  • preparaziun dal vin: bain d’ivas, fermentar, vinificar, embuttigliar, garanzia da la qualitad
  • Curs ordaifer il manaschi

    Emprender ed exercitar a moda pratica la basa professiunala

    Maturitad professiunala

    Fitg bunas prestaziuns da scola permettan da frequentar la scola da maturitad professiunala durant la furmaziun da basa.

    Diplom

    Attestat federal da qualificaziun "vaschler / vaschlera AFQ"

Premissas

Furmaziun preliminara
  • temp da scola obligatoric terminà
Pretensiuns
  • inschign manual
  • imaginaziun dal spazi
  • sanadad robusta e forza corporala
  • senn per lavurs nettas ed exactas
  • conscienza da l’igiena

Furmaziun supplementara

Curs

purschidas da scolas spezialisadas e professiunalas, da la Scola auta spezialisada da Berna – architectura, lain e construcziun, da l'Associaziun svizra dals maisters scrinaris e fabricants da mobiglias ASSFM e da la ZHAW, Wädenswil (viticultura)

Furmaziun da basa scursanida

tecnolog / tecnologa da vin AFQ, viticultur / viticultura AFQ

Scola spezialisada superiura (SSS)

studis en direcziuns spezialas parentadas, p.ex. tecnicist / tecnicista SSS tecnica da lain

Scola auta spezialisada (SAS)

studis en direcziuns spezialas parentadas, p.ex. Bachelor of Science (SAS) en tecnica da lain u Bachelor of Science (SAS) tecnologia da victualias, direcziun tecnologia da bavrondas. Tut tenor scola auta spezialisada valan differentas cundiziuns d'admissiun.

Cundiziuns da lavur

Vaschlers e vaschleras lavuran per ordinari en in team. Lur lavur po esser corporalmain stentusa.

Blers onns è il dumber da lavuratoris da vaschlers stà fermamain regressiv. Entant exista in martgà da nischa per lur lavur. Per pudair surviver ston lavuratoris da vaschlers adattar cuntinuadamain lur paletta da products als basegns da la clientella u svegliar ils basegns da la clientella cun products innovativs.

Ulteriuras infurmaziuns

Cuminanza d'interess artisanadi da lain IGKH
3855 Brienz BE
Tel: 079 853 88 99
URL: www.kunsthandwerk-holz.ch

Schule für Holzbildhauerei Schleegasse 1
3855 Brienz BE
Tel: 033 952 17 51
URL: www.holzbildhauerei.ch



berufsberatung.ch