Chanastrer AFQ
Chanastrera AFQ
![[object Object],[object Object]](https://media.sdbb.ch/transform/507ade93-f90b-415b-ab3d-d1d753868ae0/06_Korbflechterin_MJ-jpg?io=transform:fill,width:740,height:490)
Sco chanastrera u chanastrer fas u reparas ti chanasters da salesch, rattan u d'in auter material. Ti reparas canapés e pultrunas e fabritgeschas elements entretschads per la chasa ed il curtin. Ti lavuras tenor atgnas ideas u realiseschas incumbensas da la clientella.
Incumbensas
- prender encunter dumondas e cussegliar la clientella
- stimar, tge material che vegn duvrà e quant ditg che las lavurs duran e far offertas
- tscherner ed empustar il material, controllar la qualitad e magasinar correctamain il material
- planisar ils differents pass da lavur
- tscherner il material e la tecnica d'entretschar e definir, co ch'il material vegn fixà
- preparar sche necessari material auxiliar sco schablonas u furmas
- tut tenor l'incumbensa èsi da fabritgar sco emprim ina structura da lain per alura entretschar enturn quella
- entretschar a maun objects e sche necessari prender en agid utensils sco cuntels, taraders, resgias u siblas
- entretschar elements en objects u fixar rauba entretschada vi da mobiglias, p.ex. cuvridas da sutgas
- surtrair objects finids, per ch'els sajan p.ex. resistents a l'aura
- reparar objects sin empustaziun, p.ex. colliaziuns donnegiadas
- furnir objects u producir objects al lieu, p.ex. saivs u installaziuns en in curtin
- preschentar e vender atgnas creaziuns en la butia, la vitrina, online u sin ina fiera
- far reclama per ils products, p.ex. sin in'atgna pagina d'internet
- participar ad concurrenzas u ad exposiziuns
- liquidar lavurs administrativas en la fatschenta, p.ex. far la contabilitad
Ambient da lavur
Sco chanastrera u chanastrer lavuras ti – tut tenor il project –suletta u sulet ubain ensemen cun persunas spezialisadas per lain, p.ex. cun scrinarias u lainaris. Ti sesas e dovras mo tes mauns durant la gronda part da tias lavurs. Sco manadra u manader dal lavuratori has ti en emprima lingia da survegliar la lavur. Sezza u sez fas ti mo paucs chanasters.
Per regla mainas ti in agen atelier u es engaschà sco manadra u manader d'in lavuratori en instituziuns, chasas da dimora u en praschuns. En Svizra èsi fitg difficil da chattar ina plazza d'emprendissadi. Er suenter l'emprendissadi datti mo paucas pussaivladads. Bleras persunas cun activitad da gudogn independenta han anc ina segunda professiun. Questa professiun artisanala pretenda blera experientscha ed in svilup permanent da tes inschign. Pervia da la concurrenza tras products industrials stos ti esser fitg flexibla u flexibel e ta far valair sin il martgà cun tocs unics, originals, fatgs sin mesira e d'auta qualitad.
Pretensiuns e interess
- Moda da lavurar independenta
- Senn per estetica
- Creativitad
- Inschign manual
- Perseveranza e capacitad da tegnair la dira
- Plaschair da vender e da cussegliar
- Lavurar cun ils mauns
- Dissegnar, decorar, crear
- Elavurar lain
Scolaziun
Furmaziun pratica en in atelier, en ina chasa da dimora u en in lavuratori protegì
Curs da bloc dad 8 emnas per onn en la Scola per sculptura en lain a Brienz (BE)
Scola per sculptura en lain, Brienz 16 dis durant 3 onns
3 onns
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Chanastrer / Chanastrera AFQ
Furmaziun cuntinuonta
Scola spezialisada superiura (SSS)
- Designer / Designra da products SSS
Scola auta spezialisada (SAS)
- Bachelor of arts en design
Tut tenor la scola auta spezialisada valan differentas cundiziuns d'admissiun.
Professiuns sumegliantas
