Lainari / Lainaria AFQ

Lainaris e lainarias èn las persunas dal fatg per edifizis da lain da tut gener. Els mettan si dretg tetgaglias, bajegian chasas da lain, clavads e hallas da sport e construeschan punts e fatschadas. Els construeschan stgalas, ischs e portas, tavlegian paraids e plafonds, mettan palantschieus, installeschan fanestras ed isoleschan paraids e tetgs. Tut tenor diever elegian els il lain adattà ed al elavureschan fin al product final.

Lainaris dissegnan e construeschan elements da construcziun a maun u al computer cun agid da CAD. Tut ils elements – travs, lattas, plattas da fibras da lain, plattas cumprimidas e plattas da lain cruschà – vegnan transferids dal plan da construcziun sin il lain. En in proxim pass vegnan ils elements resgiads, fresads, splanads e furads. En il lavuratori prefabritgeschan els era elements cun plafonds e paraids. Latiers tutga era installar cabels e lingias e laschar chavas per fanestras e chamins. Ozendi han els per quest intent maschinas modernas: resgia, fresa, splauna da trav, splauna, maschinas da stgalprar e furar.

Ils elements preparads monteschan ils lainaris silsuenter sin il plazzal. En lavur da team collieschan els ils elements cun struvas e guttas. Indispensabel èsi per mintga lainari da lavurar exact ed en buna collavuraziun cun il team al plazzal, mintga acziun sto seser. Il product final po esser ina tetgaglia, ina chasa entira u ina stgala.

Sper lur lavur da construir edifizis novs e far construcziuns d’interiurs renoveschan ils lainarias era chasas veglias. Ultra da quai isoleschan els edifizis ed èn versads en products da cleantech. Lainaris san montar sistems da fotovoltaica e da solar.

Lainaris èn conscients dals privels en lur professiun e sa protegian bain. En il mintgadi da lavur resguardan els normas e reglaments che han da far cun la segirtad, prendan mesiras per evitar accidents e portan l’equipament da protecziun. Els respectan reglaments da protecziun da l’ambient e dismettan il material restant tenor prescripziun.