Elavuratur da lain AFP
Elavuratura da lain AFP
![[object Object],[object Object]](https://media.sdbb.ch/transform/0e87baa3-8e01-4e28-94b8-4371147433db/Zimmermann-MC-121-jpg?io=transform:fill,width:740,height:490)
1. onn d’emprendissadi: CHF 700.–
2. onn d’emprendissadi: CHF 960.–
Elavuraturas ed elavuraturs da lain produceschan differents products or da lain. Ellas ed els lavuran ubain en interpresas da construcziuns en lain, per exempel en lainarias, u en l'industria da lain, p.ex. en ina resgia. Ellas ed els gidan a producir u a montar elements da construcziun en lain ed èn responsabels per il pachetar e magasinar ils products.
Incumbensas
- planisar ed organisar cun superiuras e collavuraturs la producziun da products da lain e da construcziuns en lain
- enconuscher e tscherner differentas sorts da lain, p.ex pign, aviez, laresch, fau u ruver
- prender encunter empustaziuns da lain, controllar la qualitad e magasinar correctamain il lain
- enconuscher ed utilisar guaffens, utensils e maschinas per elavurar lain
- tegnair en urden guaffens, utensils e maschinas
- nettegiar il plaz da lavur
- procurar per la segirezza al plaz da lavur ed enconuscher ed applitgar las reglas da la protecziun da l'ambient e da lavur
- producir laina da tagl, pia aissas, travs squadradas e lattas or da lain nunelavurà, p.ex. da lain or dal guaud
- setgentar e magasinar products finids ed als preparar per il transport
- sche pussaivel reutilisar ils ruments da laina, p.ex. per pellets, pia producir pitschens tocs da lain u plattas cumprimidas
- resgiar, fresar, splanar e furar tocs da lain, per als furmar sco giavischà
- tractar lain, p.ex. impregnar u dar si lac
- magasinar elements da lain finids, preparar guaffens, utensils e maschinas ed als transportar ensemen cun las parts da lain sin il plazzal
- montar parts da lain ed eriger construcziuns da lain, p.ex. tetgaglias, tavlegiads e tavladiras dal palantschieu sura, stgalas, lautgas, roms da fanestras u plattas d'isolaziun
Ambient da lavur
Elavuraturas ed elavuraturs da lain lavuran en teams cun persunas spezialisadas da l'industria da lain, sco p.ex. lainarias u lainaris. Ellas ed els lavuran en lavuratoris e sin plazzals, nua ch'ellas ed els elavuran e monteschan parts da lain. Lur temps da lavur èn per il solit regulars. Tut tenor l'aura pon ils temps da lavur però esser irregulars. La glieud da professiun lavura cun differents geners da resgias. Perquai porta ella er in equipament da protecziun sco chapellinas da protecziun u guants.
Elavuraturas ed elavuraturs da lain lavuran en manaschis da lainaria e da construcziuns en lain, en resgias, en splanarias u en fabricas da lain collà, d'emballadis da lain, da saivs u da parchet. Mo paucas interpresas scoleschan emprendistas ed emprendists.
Pretensiuns e interess
- Abilitad da lavurar en in team
- Inschign manual
- Dun per cifras
- Imaginaziun tridimensiunala
- Gronda toleranza da canera
- Resistenza corporala
- Moda da lavurar conscienziusa ed exacta
- Lavurar cun ils mauns
- Lavurar en moda exacta
- Esser corporalmain activ
- Elavurar lain
- Lavurar cun maschinas
Scolaziun
En in manaschi d'elavuraziun da laina.
1 di per emna en la scola professiunala spezialisada.
Emprender, approfundar ed exercitar las basas professiunalas, 22 dis durant 2 onns per l'accent industria e 24 dis durant 2 onns per l'accent manaschi e construcziun.
2 onns
- Industria
- Manaschi e construcziun
Temp da scola obligatoric terminà
Elavuratur / Elavuratura da lain AFP
Furmaziun cuntinuonta
Curs
Purschidas da scolas spezialisadas e da scolas professiunalas spezialisadas sco er da Holzbau Schweiz
Emprendissadi supplementar
Elavuraturs / Elavuraturas da lain AFP pon per regla far in emprendissadi scursanì sco Spezialist / Spezialista d'industria da laina AFQ ubain sco Lainari / Lainaria AFQ: access al 2. onn d'emprendissadi.
Professiuns sumegliantas
