Start myBerufswahl

Interessen und Stärken - Schritt 1: Ich lerne meine Interessen und Stärken kennen

Berufe und Ausbildungen - Schritt 2: Ich lerne die Berufs- und Ausbildungswelt kennen

Stärken und Anforderungen - Schritt 3: Ich vergleiche meine Stärken mit den Anforderungen der Berufe und Ausbildungen, die mich interessieren

Schnuppern - Schritt 4: Ich schaue mir die interessanten Berufe genauer an

Überprüfen und entscheiden - Schritt 5: Ich überprüfe die möglichen Berufe oder Schulen und entscheide mich

Lehrstelle finden – Schule anmelden - Schritt 6: Ich setze meine Entscheidung um, suche eine Lehrstelle oder melde mich bei einer Schule an

Vorbereiten auf die Zukunft - Schritt 7: Ich bereite mich auf die Lehre oder die Mittelschule vor oder ich kläre ein Brückenangebot ab

Arbeitsmappe - Deine Ergebnisse

Einen Moment bitte...

myBerufswahl wird geladen.

Abgemeldet

Ihre Login-Session ist abgelaufen. Sie werden auf die Startseite weitergeleitet. Bitte melden Sie sich erneut an, um Ihr Login fortzusetzen.

Lavurant / Lavuranta al tagl d‘edifizi AFQ

Lavurants e lavurantas al tagl d‘edifizi fan lavurs da tagl en edifizis novs e bajetgs da renovaziun. Els taglian, foran e resgian betun ed auter material da construcziun, demonteschan ils elements da construcziun allontanads e dismettan els.

Lavurs

Lavurants e lavurantas al tagl d‘edifizi èn responsabels per foras en il betun armà, en la miraglia ed en autras materialias da construcziun. Els allontaneschan elements da construcziun ed enconuschan differentas tecnicas da lavur: furar, resgiar, tagliar, cumprimer e rumper. Tut tenor las cundiziuns da basa e da segirtad elegian lavurants al tagl d‘edifizi la tecnica adattada.

Cun inschign dovran lavurants al tagl d‘edifizi maschinas modernas per exequir a moda precisa e controllada lur lavurs da tagl. Lur pli impurtants guaffens èn ils guaffens da diamant: resgias, fresas e sugas cun segments da diamants pussibiliteschan da lavurar senza vibraziuns. Il mantegniment da quests isegls tutga er tar lur lavurs.

Tar edifizis novs vegni savens renunzià or da motivs finanzials da far foras durant la fasa da la construcziun brutta. Las foras per las installaziuns e las lingias tecnicas vegnan fatgas pli tard dals lavurants al tagl d‘edifizi. Ellas ston vegnir fatgas en il lieu correct ed exactamain sin il milimeter. Edifizis che vegnan renovads u che vegnan adattads pervia da midada da funcziun  basegnan savens diversas lavurs: p.ex. foras en ils palantschieus, en ils palantschieus sura ed en las paraids per installar ascensurs, foras en portas e fanestras per lingias e bischens, foras per fixar il fundament, foras per regruppaments da stanzas ed etaschas etc.

Lavurants al tagl d‘edifizi s’occupan era da la demontascha parziala u da la demontascha totala da substanza architectonica existenta. Per quella lavur dovran els proceders da la tecnologia per tagliar betun. En cumparegliaziun cun ina spazzada usitada vegn la lavur dals experts fatga a moda pli schubra e favuraivla sco er cun pli pauca canera e pulvra.

Lavurants al tagl d‘edifizi èn responsabels per la demontascha e la dismessa dals elements da construcziun allontanads. Auzar e far resortir la tocca da betun da pliras tonnaschas pretenda gronda precauziun. Els resguardan las prescripziuns da prevenziun d’accidents. Lavurants al tagl d‘edifizi guardan ch’il conturn dal plazzal na vegnia betg tartagnà da pulvra ed aua.

Suenter che l’incarica è terminada vegnan las lavurs exequidas nudadas en in rapport. Perquai ch’ils lavurants al tagl d‘edifizi midan savens plazzal, disponan els d’in auto da servetsch che transporta las maschinas e guaffens impurtants.

Scolaziun

Basa legala

Ordinaziun federala 16-10-2009

Durada

3 onns

Furmaziun en la pratica

en ina interpresa da sondagi da betun u da tagliar betun

Furmaziun en scola

1 di per emna a la scola professiunala a Zofingen/AG

Roms professiunals

  • savida fundamentala, lavurs da preparaziun, furar e tagliar, demontaschas spezialas
  • segirar, dischlocar e dismetter elements da construcziun
  • diever da maschinas, apparaturas e guaffens
  • administraziun
  • Curs ordaifer il manaschi

    Tar divers temas

    Maturitad professiunala

    Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

    Permiss dad ir cun auto

    Lavurants al tagl d‘edifizi survegnan la pussaivladad da far il permiss dad ir cun auto durant la furmaziun professiunala.

    Diplom

    Attestat federal da qualificaziun "lavurant / lavuranta al tagl d‘edifizi AFQ"

Premissas

Furmaziun preliminara
  • scola populara terminada
Pretensiuns
  • enclegientscha pratica
  • inschign manual
  • imaginaziun dal spazi
  • enclegientscha tecnica
  • sanadad robusta

Furmaziun supplementara

Curs

purschidas da scolas spezialisadas e professiunalas, purschidas da l’Associaziun svizra per interpresas che foran e taglian betun (tud. : Schweiz. Verbandes der Betonbohr und Betonschneidunternehmungen SVBS) sco era da la Societad Svizra dals Impressaris-Constructurs (tud.: Schweiz. Baumeisterverbandes SBV)

Furmaziun da basa scursanida

en ina professiun parentada, p.ex. sco miradur / miradura AFQ, lavurer / lavurera da betun AFQ, dissegnader / dissegnadra AFQ

Examen professiunal (EP)

cun certificat professiunal federal, p.ex. polier / poliera al tagl d’edifizi,  polier / poliera da construcziun

Examen professiunal superiur (EPS)

p.ex. maister constructur / maistra constructura

Scola spezialisada superiura (SSS)

tecnicist diplomà / tecnicista diplomada SSS en surveglianza da construcziun u tecnicist diplomà / tecnicista diplomada SSS en planisaziun da construcziun

Scola auta spezialisada (SAS)

percurs da studi da bachelor en direcziuns da studi parentadas, p.ex. Bachelor of Science (SAS) en la domena d’inschigner / inschignera da construcziun

Cundiziuns da lavur

Lavurants al tagl d‘edifizi lavuran en la branscha dal tagl d’edifizi. I dat manaschis spezialisads sco er partiziuns en manaschis da construcziun.

La situaziun da las empustaziuns dependa da la conjunctura da la branscha da construcziun, però vegn la branscha dal tagl d’edifizi adina pli impurtanta. Ils motivs èn il svilup da la tecnica da construcziun industriala ed il volumen gigantic da renovaziuns. Bleras construcziuns autas, dentant er construcziuns d’art en la construcziun bassa sco punts, tunnels ed implants atomars ch’èn vegnids bajegiads durant il boom da betun, ston vegnir sanads, renovads u demontads ils proxims onns.

Radund 40 interpresas en Svizra prendan emprendists da lavurant al tagl d‘edifizi.

Ulteriuras infurmaziuns

Schweiz. Verband der Betonbohr- und Betonschneidunternehmungen SVBS
Bahnhofstr. 7d
4512 Bellach
Tel: 032 618 10 50
URL: www.svbs.ch




berufsberatung.ch