![[object Object],[object Object]](https://media.sdbb.ch/transform/86722594-599c-4736-afb3-8c4e8c6969e6/08_Betonwerker_Swissbeton-jpg?io=transform:fill,width:740,height:490)
1. onn d’emprendissadi: CHF 800–1000.–
2. onn d’emprendissadi: CHF 1100–1300.–
3. onn d’emprendissadi: CHF 1600–1800.–
Lavurers e lavureras da betun construeschan products da betun u crap artifizial. Quests products da betun vegnan duvrads tranter auter en la construcziun d’abitaziuns, construcziun d’edifizis da mastergn, construcziun bassa, construcziun da punts, orticultura, construcziun da stadions, construcziun da tunnels u sco protecziun cunter canera. Exempels per tals products èn elements da fatschada, bancs da fanestra, balcuns, roms da portas, stgalas, bancs da seser, chaschas da flurs u crappa per far urs da vias u passapes.
Incumbensas
- leger ed interpretar ils plans da construcziun
- definir il material ed il tip da las furmas da cular, las uschenumnadas armadiras
- transferir las mesiras da la part che sto vegnir producida sin il plan da construcziun
- calcular las quantitads da las materialias duvradas, per exempel sablun, glera, aua, cement u aditivs
- preparar l’armadira per ina producziun da seria
- preparar maschinas ed utensils da lavur
- fabritgar u montar a maun u cun maschinas armadiras ord atschal, lain u material sintetic
- tagliar e storscher l’atschal per construir rinforzaments che vegnan integrads en il betun
- tschentar ils rinforzaments e las parts accessoricas tenor ils plans da construcziun
- fabritgar il betun tenor recepts precis cun agid da maschinas automaticas che vegnan dirigidas dal computer, respectar latiers las normas vertentas
- derscher, smatgar e scurlattar il betun en las armadiras
- elavurar e nobilisar las surfatschas, per exempel tras sablunar, glimar u pulir
- allontanar l’armadira da la tocca finida e la controllar sin donns
- transportar e deponer la singula tocca a moda segira cun agid d’ascensur u tschaghegnas
- auzar la tocca da betun sin in vehichel e resguardar latiers las perscripziuns da segirezza
- tschentar ora documents da furniziun
- montar pitschnas parts da betun al lieu, serrar foras da francaziun e montascha e construir differents tips da stuppadiras
- nettegiar il plaz da lavur
- mantegnair maschinas ed apparats
- dismetter il rument e resguardar latiers las perscripziuns da la protecziun da l’ambient
Ambient da lavur
Lavurants da betun lavuran tar manaschis che produceschan elements da betun ed auters products da betun. Per regla èn quests manaschis da grondezza mesauna. Las glieud da professiun lavura en in team tenor in urari da lavur regulà. Els lavuran cunzunt en lavuratoris, èn dentant magari era sin ils plazzals per far mesiraziuns u per furnir e montar parts da construcziun.
La branscha ha memia paucs lavurers da professiun cun emprendissadi. Lavurers da betun èn perquai persunas da professiun tschertgadas ed han bunas perspectivas professiunalas.
Pretensiuns e interess
- Inschign manual
- Chapientscha tecnica
- Imaginaziun tridimensiunala
- Gronda toleranza da canera
- Abilitad da lavurar en in team
- Resistenza corporala
- Lavurar cun arschiglia, crap e vaider
- Lavurar cun maschinas
- Esser corporalmain activ
- Lavurar cun ils mauns
Scolaziun
En ina interpresa che producescha rauba da betun u che construescha elements prefabritgads da betun
1 di per emna a la scola professiunala a Zofingen/AG
Emprender ed exercitar a moda pratica la basa professiunala a Sursee. 60 dis durant 3 onns
3 onns
Temp da scola obligatoric terminà
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Lavurer / lavurera da betun AFQ
Furmaziun cuntinuonta
Curs
purschidas da scolas spezialisadas e professiunalas, sco er purschidas d’associaziuns, spezialmain da l’Associaziun professiunala per products svizzers da betun (SwissBeton)
Examen professiunal (EP)
controllader / controlladra da material da construcziun (betun e maulta) cun certificat professiunal federal
Examen professiunal superiur (EPS)
p.ex. maister constructur / maistra constructura, manader diplomà / manadra diplomada da construcziun bassa
Scola spezialisada superiura (SSS)
Curs da furmaziun per mastergns parentads, p.ex. tecnicist diplomà / tecnicista diplomada SSS en surveglianza da construcziun
Scola auta spezialisada (SAS)
percurs da studi da bachelor en direcziuns spezialas parentadas, p.ex. Bachelor of Science (SAS) inschignera da construcziun. Tut tenor scola auta superiura valan differentas cundiziuns d’admissiun.
Professiuns sumegliantas
