1. onn d’emprendissadi: CHF 800.–
2. onn d’emprendissadi: CHF 1010.–
3. onn d’emprendissadi: CHF 1340.–
Sco tecnologa u tecnolog da victualias elavuras ti materias primas a victualias, sco pastizarias, products finids, tschigulatta, dultscharias e products setgs. Ti has la responsabladad per l'entir process da producziun, manevreschas gronds indrizs ed intervegns en cas da problems en il process da producziun. Plinavant fas ti controllas da qualitad e coordineschas la lavur en il team.
Incumbensas
- empustar materias primas
- controllar la paisa e la qualitad da la rauba e guardar che la rauba vegnia magasinada a dretgas cundiziuns, uschia che l'umiditad da l'aria, la temperatura e las relaziuns da glisch constettian per il product
- prender emprovas da la rauba furnida e controllar p.ex. la parita, il gust sco er caracteristicas chemicas e microbiologicas da la rauba
- survegliar collavuraturas e collavuraturs, p.ex. cura ch'ellas ed els assorteschan, nettegian u taglian victualias
- configurar e metter en funcziun indrizs, p.ex. indrizs per maschadar, setgentar u cuschinar
- survegliar e documentar la producziun
- observar las directivas d'igiena e da nettezza e serrar giu las maschinas suenter che la producziun è terminada
- conservar e schelentar victualias
- emplenir e pachetar victualias, p.ex. en cuppas, satgets u stgatlas
- configurar ils indrizs da pachetar per novs products
- controllar ils emballadis e las unitads da spediziun, p.ex. il pais final u la stabilitad
- giustar e survegliar maschinas ed apparats, p.ex. areguard la sveltezza, la temperatura, il temp ed il squitsch
- collavurar al mantegniment dals indrizs tecnics e dals sistems dal provediment
- vesair sbagls e disturbis ed eliminar quels
- separar ils products secundars ed ils ruments da la producziun da victualias e reciclar u dismetter els
- meglierar ils process da producziun tenor las prescripziuns da l'interpresa
Ambient da lavur
Sco tecnologa u tecnolog da victualias lavuras ti en teams en locals da producziun u en labors. Durant la lavur stos ti supportar differentas odurs da las victualias sco er la canera dals indrizs. En ils locals da producziun poi esser fraid, chaud u umid. Bleras interpresas lavuran en squadra, intginas er durant la notg. Ils temps da lavur èn perquai savens irregulars. Ti stos observar strictamain las prescripziuns d'igiena e purtar vestgadira da lavur adattada.
Ti lavuras en interpresas da l'industria da victualias, en manaschis pitschens, mesauns e gronds, er en interpresas internaziunalas. Suenter in tschert temp d'introducziun sas ti er applitgar las enconuschientschas da l'emprendissadi en autras branschas da l'industria da victualias. Ti chattas pussaivladads da lavurar en la controlla da rauba ed en la garanzia da qualitad, en il svilup da products e da proceduras ubain en la producziun. Suenter intgins onns experientscha professiunala sas ti er manar in team. Las perspectivas professiunalas en l'industria da victualias èn bunas en Svizra ed a l'exteriur.
Pretensiuns e interess
- Abilitad da lavurar en in team
- Senn per igiena e per nettezza
- Fitg bun gust e bun nas
- Dun per cifras
- Moda da lavurar sistematica
- Chapientscha tecnica
- Moda da lavurar svelta
- Resistenza corporala
- Lavurar cun victualias
- Experimentar, perscrutar
- Lavurar cun maschinas
Scolaziun
Furmaziun pratica en in manaschi da l'industria da victualias
Curs da bloc da ca. 10 emnas per onn en la Scola professiunala spezialisada Strickhof a Wädenswil (ZH)
Scola professiunala spezialisada Strickhof: 7 fin 10 dis durant 3 onns tut tenor il sectur professiunal
3 onns
- pastizarias
- products precuschinads
- tschigulatta e dultschims
- products setgs
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Tecnolog / Tecnologa da victualias AFQ
Furmaziun cuntinuonta
Curs
Curs da l'associaziun Cuminanza da lavur Tecnologs da victualias
Examen professiunal (EP)
- Tecnolog / Tecnologa da victualias EP
Examen professiunal superiur (EPS)
- Tecnolog / Tecnologa da victualias EPS
Scola spezialisada superiura (SSS)
- Tecnicist / Tecnicista da victualias SSS
Scola auta spezialisada (SAS)
- Bachelor of science en tecnologia da victualias
Tut tenor la scola auta spezialisada valan differentas cundiziuns d'admissiun.
Professiuns sumegliantas
