Ferrer da chavals AFQ
Ferrera da chavals AFQ

Ferrers da chavals s’occupan per il bainstar da chavals, ponis, asens e mils. Mintga sis fin otg emnas vegnan ils chavals enferrads perquai ch’ils chalzers-chaval creschan suenter, ils fiers-chaval èn isads u ina correctura ortopedica è necessaria. Ils spezialists ston era tractar regularmain animals betg enferrads e curreger lur fiers-chaval.

Suenter avair analisà il pass rumpan ils ferrers da chavals l’emprim giu ils fiers-chaval vegls. Suenter tgiran els il chalzer-chaval. Els nettegian la sola, taglian enavos la pel dira dal chalzer e raspan l’ur purtant, la part dal chalzer-chaval en furma da mez rudè sin il qual l’animal passa. Silsuenter stgaudan els ils fiers-chaval e tractan els cun il martè e la mazza enfin ch’els han la furma dal chalzer-chaval. Lura controlleschan els la furma e l'adatteschan, sche necessari.

Els adattan mintga fier-chaval individualmain al tip da chaval. Ferrers resguardan il pass ed il diever da l’animal. Els miran per exempel, schebain il chaval vegn duvrads per il temp liber, per il sport u sco animal da lavur. Ils fiers-chaval preparads ferman els cun guttas. Ils pizs da las guttas vegnan or da las paraids dals chalzers-chaval. Là nua ch’ellas vegnan or, vegnan ellas rebattidas. Ferrers da chavals controlleschan ch'ils animals n'hajan naginas malsognas e blessuras. Els percorschan spezialmain chalzers-chaval malsauns e pass incorrects. Per mantegnair la sanadad dals chalzers-chaval respectivamain curreger pass anormals fan els ferradiras spezialas. Per far questas ferradiras spezialas ston ins avair enconuschientschas da l’anatomia e da furmas da terapia per animals cun chalzers.

Las ferreras da chavals na cusseglian betg mo la clientella areguard la dretga schelta da fiers-chaval, mabain era davart il tegnair animals a moda adequata a lur natira, il pavlar, la tgira e la prevenziun cunter malsognas.

Ellas lavuran en in lavuratori, èn dentant era savens en viadi. Las lavurs d’enferrar fan ellas il pli directamain tar la clientella, per exempel sin bains d’ir a chaval, tar possessurs da chavals privats u en clinicas d’animals. Ils utensils, l’equipament da fravgia ed ils fiers-chaval preparads prendan ellas gist cun sasezzas. Ellas n'enferran betg mo en stalla, mabain savens er en il liber.