![[object Object],[object Object]](https://media.sdbb.ch/transform/29def612-e217-4a74-9218-e5c0ffc14c9b/Pferdefachfrau-FB-117-jpg?io=transform:fill,width:740,height:490)
1. onn d’emprendissadi: CHF 600.–
2. onn d’emprendissadi: CHF 700.–
3. onn d’emprendissadi: CHF 900.–
Spezialists e spezialistas da chavals provedan, tgiran e muventan ils chavals dad in manaschi da chavals. Sco persunas dal fatg vi da chavals e sin chavals treneschan els ils animals ed instrueschan persunas che vulan emprender ina tecnica da chavaltgar da lur direcziun.
Incumbensas
Il mastergn porscha sis direcziuns da sa spezialisar: tgira da chavals, chavaltgar classic, chavaltgar a moda da western, chavaltgar chavals da pass, cursas da chavals e charrar cun manadira. Spezialists e spezialistas da chavals da tut las direcziuns cumenzan lur scolaziun cun la tgira da chavals.
La tgira da chavals vala sco premissa per il sport a chaval cun success. Spezialists da chavals da tut las direcziuns passentan bler temp da lavur cun s’occupar da lur chavals en tgira. Els han quità dals chavals e bajegian si cun els ina relaziun da confidenza. En in center da sport a chaval u en in manaschi da commerzi pavlan e bavrentan, nettegian e muventan els ils animals. Latiers tutga la tgira da chavals malsauns e blessads, metter si bandaschas per proteger las giugadiras, nettegiar enturn ils fiers-chaval, barschunar e stregliar. Els mantegnan net e pulit las stallas, l’equipament ed il plazzament.
Spezialists da chavals da la direcziun tgira da chavals èn oravant tut responsabels per las lavurs surnumnadas. Ultra da quai sa gidan els da scolar ils animals e mussan a principiants ed a principiantas da chavaltgar.
En las direcziuns chavaltgar classic, chavaltgar a moda da western, chavaltgar chavals da pass, cursas da chavals e charrar cun manadira muventan las persunas dal fatg mintga di ils animals, per ils quals els èn responsabels. Els treneschan la tecnica da chavaltgar u da charrar, p.ex. en la dressura, en siglir u per ina cursa. Ils animals vegnan scolads cun lonschar, cun lavurar sin il terren e cun lavur manuala ed en sella.
Cun lur pazienza, lur premura e lur sensibilitad scoleschan spezialists da chavals era scolaras e scolars d’ir a chaval, en la tgira da chavals e da chavaltgar sin ils chavals. Instruir sin in livel aut è ina da lur lavurs principalas. Quai fan els cun sa tegnair vi da princips pedagogics. Durant il contact cun lur clientella patratgan ed ageschan els a moda servetschaivla.
En il mintgadi da lavur resguardan spezialists da chavals las prescripziuns da protecziun da l’animal, da la sanadad e da l’ambient. Els dismettan p.ex. il rument tenor las prescripziuns e reageschan a moda correcta e calma tar accidents.
Ambient da lavur
Spezialists da chavals lavuran en centers da sport a chaval u en manaschis da commerzi, tar possessurs privats ed en centers da trenament per chavals che prendan part a concurrenzas.
Ils dis da lavur cumenzan fitg baud, èn per ordinari lungs, irregulars e corporalmain stentus. Ils chavals ston era vegnir survegliads durant las fins d’emna e durant firads. Las stallas ston vegnir nettegiadas mintga di.
Tut tenor il manaschi d’emprendissadi e direcziun sa differenzieschan las cundiziuns da lavur. Il dumber da plazzas d’emprendissadi è creschida ils ultims onns perquai ch’i ha dà in lev augment da l’effectiv da chavals. La dumonda suenter spezialists è però relativamain stabila ed i vegn plitost scolà memia blers emprendists. Spezialists da chavals cun la direcziun tgira da chavals chattan en general pli svelt ina plazza che quels ch’èn sa spezialisads en ina direcziun specifica da chavaltgar.
Pretensiuns e interess
- Resistenza corporala
- Savair supportar odurs dischagreablas
- Abilitad da lavurar en in team
- Abilitads pedagogicas
- Prontezza da lavurar er sin dumonda
- Resistenza cunter stress
- Esser corporalmain activ
- Lavurar cun animals
Scolaziun
En in center per sport a chaval, en ina manaschi d’allevament u da commerzi
1 di per emna a la scola professiunala a Winterthur, Zollikofen u Moudon
Tar differents temas
3 onns
- Tgira da chavals
- Chavaltgar classic
- Chavaltgar a moda da western
- Chavaltgar chavals da pass
- Cursas da chavals
- Charrar cun manadira
Scola populara terminada
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Spezialist / Spezialista da chavals AFQ
Furmaziun cuntinuonta
Curs
Purschidas da scolas professiunalas, da l’organisaziun dal mund da lavur da mastergns che s’occupan cun chavals u d’associaziuns, sco p.ex. da SWISS Horse Professionals SHP, Swiss Western Riding Association SWRA, Islandpferde Vereinigung Schweiz IPV CH u dal Schweizer Rennreiter-Verband SRV
Sa spezialisar en ina direcziun
- En la direcziun elegida: p.ex. direcziun sport da chavals: titel "jockey" u "chavaltgader / chavaltgadra da chavals da cursa al trot"
- En in champ parentà: p.ex. pedagog / pedagoga da chavaltgar dipl. SG-TG / PT-CH
Furmaziun da basa scursanida
Suenter avair terminà la furmaziun da basa po vegnir absolvida ina furmaziun da basa scursanida dad 1 onn en ina da las autras 6 direcziuns.
Examen professiunal (EP)
Spezialist / spezialista da la branscha da chavals cun certificat professiunal federal
Examen professiunal superiur (EPS)
Expert / experta management da chavals cun diplom federal (en planisaziun)
Scola spezialisada superiura (SSS)
P.ex. Bachelor of Science (SSS) en agronomia cun spezialisaziun en la scienza da chavals
Professiuns sumegliantas
